УФ-м и Президент къафигъэуцугъэ пшъэрылъым тетэу къэралыгъо фондэу «Хэгъэгум иухъумакIохэм» хэушъхьафыкIыгъэ дзэ операцием иветеранхэм «федеральнэ перечень» зыфиIорэм хэмыхьэрэ ТСР-р, джащ фэдэу шэпхъэшIухэм адиштэрэ спорт протезхэр аIэкIигъэхьанхэ фае. ИлъэситIум къыкIоцI щыIэныгъэм зэрэхэгъозэщтхэ техническэ амал зэфэшъхьафхэр нэбгырэ 3200-м ехъумэ фондым аIэкIигъэхьагъ.

Фондым амалэу аригъэгъотыхэрэм япчъагъэ зеушъомбгъу. ИкIыгъэ илъэсым къыщегъэжьагъэу Президентыр яIэпыIэгъоу IэкIэ агъэIорышIэрэ автомобильхэр аратых. Сэкъатныгъэ хьылъэ зиIэхэр ары ар анахьэу зытефэхэрэр — зылъэ­къуитIу пымытыжьхэр е курэжъыем исэу зекIохэрэр. Ахэм машинэ 400-м ехъу афащэфыгъ, а пчъагъэр илъэсыр екIыфэ 500-м нагъэсын гухэлъ яI.
Тызыхэт илъэсым сэкъатныгъэ зиIэ ветеранхэм адаптивнэ шъуашэхэр фондым аритыхэу ыублагъ. А купым хэхьэрэ цIыфхэм япсауныгъэ изытет елъыты­гъэу ахэр дыгъэх, едзыгъуищэу зэхэт — гъэмэ­фэ, кIымэфэ, лъэхъэнэ зэблэкIыгъом зыщалъэн алъэкIыщтхэр. Нэбгырэ пэпчъ илъэIу тхылъ хэушъхьафыкIы­гъэу хэплъэх, ащ тегъэпсыхьагъэр къы­фыхахы. Шъошэ зэхэт 1300-м ехъу аратыгъах.
ШэпхъэшIухэм адиштэрэ протезхэр, ортезхэр, курэжъыехэр, зэрыдаIохэрэ пкъыгъохэр ветеранхэм зэрагъэгъотынхэм фэшI Урысыем и Социальнэ фонд къаритырэ электроннэ сертификатым итхэгъэ ахъщэм фондым тегъахъо фе­шIы.
Фондэу «Хэгъэгум иухъумакIохэр» зыфиIорэм икъутамэу АР-м щыIэм хэушъхьафыкIыгъэ дзэ операцием иветеранхэр щыIэныгъэм хэгъозэжьынхэмкIэ ищыкIэгъэ техническэ амалхэр аре­гъэгъотых. Непэрэ мафэм ехъулIэу «федеральнэ перечень» зыфиIорэм хэмыхьэрэ пкъыгъохэр сэкъатныгъэ зиIэ ветеран 13-мэ аIэкIигъэхьагъэх, нэбгыритIумэ IэкIэ агъэIорышIэрэ машинэхэр афищэфыгъэх, ящэнэрэр шIэхэу къэсынэу ежэх. Ветерани 7-мэ адаптивнэ шъошэ зэхэтхэр, электроннэ сертификатхэмкIэ нахь къякIущт амалхэр зэрагъотынхэм фэшI нэбгыритIумэ ахъщэ тедзэ аритыгъ.
ТСР-р зэратыщтыр къыхэхыгъэнымкIэ унашъор зышIырэр фондым иэкспертнэ совет. Медицинэ шапхъэу ветераным къыфагъэнэфагъэхэр къыдалъытэхэзэ Iофым хэплъэх, нэбгырэ пэпчъ тегъэ­псыхьагъэр осэшIу купым къыхехы.
Мыщ фэдэ IэпыIэгъум иамал ветераным ыгъотыным фэшI зыщыпсэурэ чIыпIэм щыIэ фондым икъутамэ лъэIу тхылъкIэ зыфигъэзэн ыкIи социальнэ координаторым иучет хэуцон фае. Координаторым зэкIэ тхылъхэр фегъэпсых.
ТСР-у къэралыгъо фондым аригъэгъотыхэрэм хахьэхэрэр:
— спорт протезхэр ыкIи спорт тIысыпIэ-курэжъыехэр;
— пкIэрэ, къиныгъохэм апхырыкIырэ тIысыпIэ-курэжъыехэр;
— IэкIэ агъэIорышIэрэ автомобильхэр;
— сэкъатныгъэ зиIэхэм апае тIысыпIэхэр автомат шIыкIэм тетэу дэзыщаехэрэр;
— вертикализаторхэр;
— реабилитационнэ тренажёрхэр;
— зэрыплъэхэрэ ыкIи зэрэдаIохэрэ пкъыгъохэр;
— адаптивнэ шъошэ зэхэтхэр.
— Реабилитацием ыкIи протезированием иIофыгъохэм къэралыгъо фондым ынаIэ атырегъэты. ШэпхъэшIухэм адиштэрэ протезхэр ветеранхэм аIэкIэдгъэхьанхэм зэпымыоу ыуж тит, амалыкIэу къежьэхэрэм талъэплъэ, щыIэныгъэм хэгъэгъо­зэжьыгъэнхэмкIэ зэрэдунаеу щагъэфедэрэ шIыкIэхэр зэтэгъа­шIэх. Мамыр щыIакIэм нахь шIэхэу къызэрэфагъэзэжьыщтым тыдэлажьэ, — хи­гъэунэфыкIыгъ УФ-м зыкъэ­ухъумэжьынымкIэ иминистрэ игуадзэу, къэралыгъо фондэу «Хэгъэгум иухъумакIохэр» зыфиIорэм ипащэу Анна Ци­вилевам.