ЯтIонэрэ еджэгъум фагъэхьазырыгъ
Къихьащт 2026-рэ илъэс бюджетым ыкIи 2027 — 2028-мкIэ агъэнэфагъэхэм афэгъэхьыгъэ хэбзэгъэуцугъэм ипроектэу АР-м и ЛIышъхьэу КъумпIыл Мурат къыхилъхьагъэм гъэтэрэзыжьынэу фашIыщтхэм зыщатегущыIэгъэхэ игъэкIотыгъэ зэхэсыгъо АР-м и Къэралыгъо Совет — Хасэм бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ и Комитет иIагъ.
Iофтхьабзэм хэлэжьагъэх Къэралыгъо Советым – Хасэм и Тхьаматэу Владимир Нарожнэр, ащ игуадзэу Цэй Эдуард, АР-м и Правительствэ и Тхьаматэ игуадзэу, финансхэмкIэ министрэу Виктор Орловыр, Парламентым идепутатхэр, нэмыкIхэр. Зэхэсыгъор зэрищагъ республикэ Парламентым и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ Комитетым ипащэу Iэщэ Мухьамэд.
Хэбзэгъэуцугъэм ипроектэу ятIонэрэ еджэгъум фагъэхьазыррэм мызыгъэгум гъэтэрэзыжьын 15 фашIыгъ. Депутахэм апэрэ еджэгъумкIэ аштэгъэ законопроектым къыфагъэзэжьи 5-р ащ фашIыжьыгъ, гъэтэрэзыжьыни 10-р ятIонэрэ еджэгъум фагъэхьазырырэм хагъэхьагъ.
ФинансхэмкIэ министрэу Виктор Орловым къызэриIуагъэмкIэ, зымыгъэзэжьыщт федеральнэ ахъщэу сомэ миллиарди 2,9-рэ республикэм къыфэкIощт. Ащ къыпкъырыкIыгъэх гъэтэрэзыжьынхэр. Ахъщэр псауныгъэм икъэухъумэн, социальнэ Iофхэм, гъэсэныгъэм, культурэм, спортым, гъогу инфраструктурэм апэIуагъэхьащт.
Комитетыр гъэтэрэзыжьын пэпчъ тегущыIагъ, зэкIэми адыригъэштагъ. Ахэр зэрэхэтхэу 2026-рэ илъэс бюджетым хахъохэмкIэ иIахь сомэ миллиард 47,8-рэ, хъарджэхэмкIэ сомэ миллиард 50,2-рэ зэрэхъущтхэр. Сомэ миллиарди 2,4-рэ щыкIагъэ фэхъущт.
Бюджетым фэгъэхьыгъэ хэбзэгъэуцугъэм ипроект АР-м и Парламент изичэзыу зэхэсыгъо щытегущыIэнхэшъ, ятIонэрэ еджэгъумкIэ аштэнэу къыхалъхьащт.
ШIокI зимыIэ медицинэ страхованиемкIэ АР-м и ЧIыпIэ фонд 2026-рэ илъэсымкIэ ибюджет ыкIи 2027 — 2028-мкIэ агъэнэфагъэхэм афэгъэхьыгъэ хэбзэгъэуцугъэм ипроект гъэтэрэзыжьыни 4 фашIыгъ. Фондым ипащэу Хъут Светланэ къызэриIуагъэмкIэ, 2-р апэрэ еджэгъумкIэ аштэгъэ законопроектым, адри 2-р ятIонэрэм фагъэхьазырырэм афэхъущтых. АхъщэкIэ къапIомэ ар сомэ миллион 474,4-рэ мэхъу.
Гъэтэрэзыжьынхэм адырагъэштагъ. Ахэр къыдыхэлъытагъэхэу 2026-рэ илъэс бюджетым хахъохэмкIэ иIахь сомэ миллиарди 10,05-рэ хъущт, хъарджэхэри ащ фэдизыщтых, щыкIагъэ фэхъущтэп.
Мы проектыми Парламентым изэхэсыгъоу къэблагъэрэм депутатхэр щыхэплъэщтых.
ХЪУТ Нэфсэт.