УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым Урысыем и Президент пшъэрылъ къызэрэфишIыгъэм тетэу пэIудзыгъэ конференциеу зэхищагъэм цIыфхэр щыригъэблэгъагъэх. Шъолъырым щыпсэухэрэм яIофыгъо заулэхэм ащ щахэплъагъэх, ахэм зыкIэ ащыщыгъ къалэу Мыекъуапэ и ТОС-у N 15-м итхьаматэу Татьяна Пурисовам къыIэтыгъэ Iофыгъор.
Iофтхьабзэм хэлэжьагъэх Адыгеим и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, Мыекъуапэ имэрэу Геннадий Мит­рофановыр.
Татьяна Пурисовам илъэIу зыфэгъэ­хьыгъэр урамэу Бонивур ыцIэкIэ щытым (псэупIэу Севернэм иурамхэу Лениным ыцIэ зыхьырэмрэ Степноимрэ азыфагу) игъогу Iахьэу муниципальнэ образованиеу «Къалэу Мыекъуапэ» хахьэрэм гъэцэкIэжьын IофшIэнхэр ешIылIэгъэнхэмкIэ яшIуагъэ къарагъэкIыныр ары. ПсэупIэм транспортымкIэ иинфраструктурэ а гъогум мэхьанэшхо щыриI, шъо­лъыр трассэм ылъэныкъокIэ псэупIэм екIурэ гъогоу ар щыт. Гъогум иутыгъабэ иIэшъ, транспортыр тэрэзэу щызекIошъурэп.
Республикэм и ЛIышъхьэ Владимир Устиновым зэрэриIуагъэмкIэ, илъэсэу къихьащтым гъатхэм а гъогу Iахьым игъэ­цэкIэжьын рагъэжьэщт. Ар зэрэпсаоу асфальткIэ агъэпкIэщт. Ащ нэмыкIэу тамыгъэхэр къэзгъэнэфыщтхэр тырагъэу­цощтых, гъогур агъэтхъыхьащт. Проектым сомэ миллион 24,6-рэ пэIухьащт.

КъумпIыл Мурат Мыекъуапэ имэр пшъэрылъ фишIыгъ гъогухэм ягъэцэ­кIэжьын дакIоу ахэр щынэгъончъэу щы­тынхэм фытегъэпсыхьэгъэ IофшIэныр лъагъэкIотэнэу.
«НепэкIэ проект IофшIэнхэр ыкIэм фэкIох. Илъэсэу къихьащтым гъатхэм гъэцэкIэжьын IофшIэнхэм тафежьэщт ыкIи гъэмафэм ехъу­лIэу ахэр тыухыщтых. Зэхэубытагъэу къэпIон хъумэ, къалэу Мые­къуапэ игъогухэм ямызакъоу, рес­публикэм имуниципалитет пстэуми ягъогухэр шапхъэхэм адиштэнхэм лъэшэу тынаIэ тетэгъэты. Илъэс къэс гъогухэм ягъэцэкIэ­жьынкIэ гухэлъэу щыIэр тэгъэцакIэ. Лъэпкъ проектэу «ЩыIэныгъэм пае инфраструктурэр» зыфиIорэм тетэу гъогухэм ягъэкIэжьынкIэ пэрытныгъэ зыIыгъ шъолъырхэм мы илъэсым Адыгеир джыри ахэ­хьагъ. Лъэныкъо пстэумкIи IофшIэныр лъытэгъэкIуатэ, сыд фэдэрэ гъогуи тэркIэ мэхьанэ иI. Ау Iофэу дгъэцакIэрэм нахь шIуагъэ къытыным пае гъогу Iахьхэу гъэцэкIэжьыгъэн фаехэр къыхэтхыхэ зыхъукIэ экспертхэм яеплъыкIэхэм ямыза­къоу, цIыфхэм Iофыгъохэу къаIэтхэрэми такъыпкъырэкIы», — къы­Iуагъ КъумпIыл Мурат.
Владимир Устиновым къызэрэхигъэщыгъэмкIэ, гъогур игъом ыкIи дэгъоу гъэцэкIэжьыгъэн фае. АР-м и ЛIышъхьэу КъумпIыл Мурат ежь ышъхьэкIэ проектыр гъэцэкIагъэ зэрэхъурэм ынаIэ тыригъэтыщт.
Шъолъыр мэхьанэ иIэу
Партиеу «Единэ Россиер» зызэхащагъэр илъэс 24-рэ зэрэхъурэм фэгъэхьыгъэу тыгъэгъазэм и 1-м къыщегъэжьагъэу и 10-м нэс цIыфхэр республикэ общественнэ приемнэмрэ партием дезыгъаштэхэрэм яштабрэ щарагъэблэ­гъэщтых. Партиеу «Единэ Россием» и Тхьаматэу Дмитрий Медведевым ишъо­лъыр общественнэ приемнэ тыгъуасэ цIыфхэр щезыгъэблэгъагъэр Адыгеим и ЛIышъхьэу, Урысые политическэ пар­тиеу «Единэ Россием» ишъолъыр къутамэ и Секретарэу КъумпIыл Мурат.
Красногвардейскэ, Мыекъопэ районхэм, Адыгэкъалэ адэсхэм ащыщхэм республикэм и ЛIышъхьэ зыкъыфагъэзагъ. Ашъхьэ Iофхэми, общественнэ мэхьанэ зиIэхэми ахэр агъэгумэкIыщтыгъэх. Iофыгъоу закъызэрафагъэзагъэхэр зэрэзэшIуахыщт шIыкIэр министерствэхэм, псэупIэхэм япащэхэм къафызэхафыщтыгъ.
ПсэупIэу Красногвардейскэм дэт кIэ­лэцIыкIу IыгъыпIэу N 6-р гъэцэкIэжьыгъэным епхыгъэ IофыгъомкIэ АР-м и ЛIышъхьэ зыкъыфагъэзагъ. Красногвардейскэ районым ипащэу Гъубжьэкъо Темур къызэриIуагъэмкIэ, лъэпкъ проектэу «Унагъу» зыфиIорэм диштэу кIэлэцIыкIу IыгъыпIэм гъэцэкIэжьынэу ра­­шIылIэщтхэр рахъухьагъэх. Къихьащт илъэсым IофшIэнхэм афежьэщтых, шы­шъхьэIум и 1-м ехъулIэу гъэцэкIэ­жьынхэр аухыщтых. КъумпIыл Мурат район администрацием ипащэ пшъэрылъ фишIыгъ Iофхэр ипIалъэм агъэцэкIэнхэм гъунэ лъифынэу. Мы аужырэ илъэсхэм район гупчэм хэпшIыкIэу итеплъэ нахьышIу зэрэхъугъэр, ар джыри нахь дахэ шIыгъэным акIуачIэ зэ­дырахьылIэн зэрэфаер АР-м и ЛIышъхьэ къыхигъэщыгъ. Социальнэ псэуалъэхэм яшIынкIэ ыкIи ягъэцэкIэжьынкIэ, об­щественнэ чIыпIэхэм язэтегъэпсыхьанкIэ къоджэдэсхэм гухэлъэу яIэхэм адегъэштэгъэным мэхьанэшхо зэриIэр КъумпIыл Мурат хигъэунэфыкIыгъ.
Къуаджэу Хьалъэкъуае иурамэу я 9-рэ ЖъоныгъуакIэм тесхэр лъэсгъогу афэгъэпсыгъэным къыкIэлъэIугъэх. Адыгэ­къалэ имэрэу Хьачмамыкъо Азэмат Iофыр къызэрэзэхифыгъэмкIэ, ащкIэ проект-сметэ документациер агъэхьазырыгъах, муниципальнэ мылъкуи къыхагъэкIыгъах. Къихьащт илъэсыр имыкIызэ а лъэсгъогур агъэпсын ягухэлъ.
Станицэу Дагестанскэм дэс хъулъфыгъэр урамэу Почтовэм ипсырыкIуапIэ агъэцэкIэжьынэу къялъэIугъ. Къуаджэм иинфраструктурэ уахътэм диштэу зэтегъэпсыхьэгъэнэу АР-м и ЛIышъхьэ пшъэ­рылъ афишIыгъ. Мыекъопэ районым ипащэу Михаил Марьиным къызэриIуагъэмкIэ, мы Iофыгъор зэрэзэшIуахыщт шIыкIэр рахъухьагъ. 2026-рэ илъэсымкIэ псэупIэм ибюджет урамэу Почтовэм ипсырыкIуапIэ гъэцэкIэжьыгъэным те­лъытэгъэ мылъкур къыщыдэлъытагъ. Къи­хьащт илъэсым игъэтхапэ ыкIэм нэс IофшIэнхэр аухынэу рахъухьэ.
Мирнэм дэс хъулъфыгъэм Адыгеим и ЛIышъхьэ зыфигъэзагъ япсэупIэ екIолIэрэ гъогум игъэцэкIэжьынкIэ, ­гъогу напцэхэм яукъэбзынкIэ IэпыIэгъу къа­фэхъунэу.
Мы Iофыгъом изэшIохын пае КъумпIыл Мурат пшъэрылъ гъэнэфагъэхэр къулыкъу заулэмэ афишIыгъ. АР-м псэо­лъэшIынымкIэ, транспортымкIэ, псэу­пIэ-коммунальнэ, гъогу хъызмэтымкIэ и Министерствэрэ Адыгеим мэзхэмкIэ и ГъэIорышIапIэрэ джырэ шапхъэхэм ади­штэу автомобиль гъогур зэтырагъэпсы­хьажьын, гъогу напцэхэр агъэкъэбзэ­нхэ фае. 2026-рэ илъэсым гъэтхапэм ыкIэм нэс IофшIэнхэр аухынэу АР-м и ЛIы­шъхьэ афигъэнэфагъ.
Бюджет мылъкур шIуагъэ къытэу гъэфедэгъэным мэхьанэшхо зэриIэр КъумпIыл Мурат шъхьафэу къыхигъэ­щыгъ, зыкъызэрэфагъэзэгъэ Iофыгъохэм язэшIохынкIэ пшъэрылъхэр зэрагъэцакIэхэрэм гъунэ лъафынэу афигъэпытагъ. АР-м и ЛIышъхьэ социальнэ мэхьанэ зиIэ инфраструктурэр зэрагъэфедэрэмкIэ зыкъыфэзыгъэзагъэхэм яупчIыгъ. ЗэхъокIыныгъэшIухэм цIыфхэр чанэу ахэлэжьэнхэм мэхьанэшхо зэриIэр, япсэупIэхэр нахь зэтегъэпсыхьагъэ хъунхэм ныбжьыкIэхэр ыгъэгумэкIынхэ зэрэфаер республикэм ипащэ къыхигъэщыгъ.
«Адыгеим ипсэупIэхэм хэхъоныгъэ ягъэшIыгъэнымкIэ бэ зэшIотхырэр. Мы аужырэ лъэхъаным республикэм икъуаджэхэм социальнэ псэолъабэхэр къадэтэджагъ, гъогухэр, коммунальнэ инфраструктурэр тэгъэцэкIэжьых, паркхэр, скверхэр зэтетэгъэпсыхьэх, диспансеризацием пае врачхэр зыхэт бригадэхэр къуаджэхэм тэгъакIох, еджэнымкIэ, творчествэмкIэ, спор­тымкIэ, зыгъэпсэфынымкIэ ищыкIэгъэ амалхэр зетэхьэх. Къуа­джэхэм адэсхэр япсэупIэ нахь зэ­тегъэпсыхьагъэ хъуным кIэщакIо фэхъунхэ фае. Тызэгъусэмэ ары цIыфхэм ящыIэкIэ-псэукIэ на­хьы-шIу тшIын, кIэухышIухэм та­къыфэкIон, лIэхэрэр нахь макIэ тшIын, сабыйхэр нахьыбэу къэд­гъэхъун, спортым, гъэсэныгъэм, творчествэм нахьыбэу гъэхъагъэхэр ащытшIын, бизнес цIыкIумрэ гу­рытымрэ зядгъэушъомбгъун, мэкъу-мэщым проектышхохэр щыпхырытщынхэ зытлъэкIыщтыр. Зэ­кIэми тызэгъусэу ыпэкIэ тылъыкIотэн фае», — къыIуагъ КъумпIыл Мурат.
АР-м и ЛIышъхьэ джащ фэдэу партиеу «Единэ Россием» къыдезгъа­штэхэрэм яштаб щыкIогъэ Iофтхьабзэми хэлэжьагъ. Зыныбжь хэкIотэгъэ гуфакIохэм лъэпкъ IэшIагъэхэмкIэ ыкIи хъытыухэм яхъынкIэ кIэлэеджакIохэм мастер-класс афызэхащагъ. Iофышхо зэрэзэшIуахырэм пае ахэм зэрафэразэр КъумпIыл Мурат ариIуагъ. Республикэм ипащэ къызэрэхигъэщыгъэмкIэ, мыщ фэдэ Iофтхьабзэхэм яшIуагъэкIэ кIэлэцIыкIухэм якъулайныгъэ нахь зыкъеIэты. Нахьыжъхэр къадеIэхэзэ, нэмыкIхэм IэпыIэгъу афэхъунхэу кIэлэеджакIохэм загъасэ.
АР-м и ЛIышъхьэ зекIозещэхэм атегъэпсыхьэгъэ лекцием едэIунэу къырагъэблэгъагъ. Президент грантхэм я Фонд иIэпыIэгъукIэ пхыращырэ проектым къыдыхэлъытагъэу автоном мысатыу организациеу «Заповедный Кавказ» зыфиIорэм ар зэхищагъ. Республикэм ипащэ къызэрэхигъэщыгъэмкIэ, зекIозещэхэм яIэпэIэсэныгъэ зыкъегъэIэтыгъэным, шъолъырым итарихъ, икультурэ, ишэн-хабзэхэм яхьылIэгъэ къэбар тэ­рэзхэр зекIохэм аIэкIэгъэхьэгъэным мэхьанэшхо иI. Тыкъэзыуцухьэрэ дунаир къызэтегъэнэжьыгъэным, джырэ шап­хъэхэм адиштэу Адыгеим зекIоныр щызэхэщэгъэным хэбзэ къулыкъухэми, зекIоным пылъхэми акIуачIэ зэрэзэ­дырахьылIэн фаер хигъэунэфыкIыгъ.
Адыгэ Республикэм и ЛIышъхьэ ипресс-къулыкъу
къытырэ къэбархэмкIэ ЛIышэ Саниет.