Адыгеим и ЛIышъхьэу КъумпIыл Мурат дунэе мэхьанэ зиIэ зэнэкъокъухэм гъэхъэгъэшхохэр ащызышIыгъэ тренерхэмрэ спортсменхэмрэ тыгъуасэ правительствэм и Унэ зэIукIэгъу щадыриIагъ.

Ащ къыщызэрэугъоигъэх Тэхъутэмыкъое районым испорт еджапIэу N 1-м ипащэу Джарымэкъо Нурбый, Адыгэ Республикэм боксымкIэ и Федерацие итхьаматэу Сихъу Аскэрбый, самбэмкIэ тренерэу Джарымэкъо Рустам, боксымкIэ тренерхэу Карлен Восканянрэ Александр Кимрэ, джащ фэдэу самбэмкIэ Урысыем ыкIи дунаим и Первенствэ, дунэе зэнэкъокъухэм текIоныгъэ къащыдэзыхыгъэ, Урысыем ыкIи дунаим ячемпионэу, Урысыемрэ дунаимрэ я Кубок къызфагъэшъошэгъэ Наш Расул, боксымкIэ Урысыемрэ Европэмрэ я Первенствэ пчъагъэрэ текIоныгъэр къа­щыдэзыхыгъэ, Урысыем и Чемпионат джэрз медаль къызщыфагъэшъошэгъэ Мушег Баяндурян, боксымкIэ дунаим и Первенствэ тыжьын медаль къызщыфагъэшъошэгъэ, Урысыем гъогогъуитIо и Первенствэ, Европэм и Первенствэ текIоныгъэ къащыдэзыхыгъэ Евгений Жоровыр.
Мы зэдэгущыIэгъум хэлэжьагъэх АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, физкультурэмкIэ ыкIи спортымкIэ АР-м и Комитет итхьаматэу Дэгужъые Мурат.
Республикэм и ЛIышъхьэ спортсмен IэпэIасэхэм ыкIи ахэр зыгъасэхэрэм афэгушIуагъ текIоныгъэшхоу къыдахы­гъэм пае ыкIи Адыгеимрэ Урысыемрэ спортымкIэ щытхъоу апылъым хэхъоным яIахь зэрэхашIыхьэрэмкIэ зэрафэразэр къы­Iуагъ.
«ЛъэгэпIэ ин дэдэхэм атегъэпсыхьэгъэ зэнэкъокъухэм гъэхъэгъэшхохэр ащышъу­шIыхэзэ, спортсмен ныбжьыкIэхэм щысэшIу шъуафэхъу, физкультурэмрэ спортымрэ къыткIэхъухьэхэрэр нахь игъэкIотыгъэу ахэщэгъэнхэм шъунаIэ тешъогъэ­ты. Шъо шъуитекIоныгъэхэм республикэм щыпсэухэрэр арэгушхох. Титренерхэу яIэпэIэсэныгъэкIэ спортсменыбэмэ нахь зыкъызэIуахынымкIэ зишIуагъэ языгъэ­кIыгъэхэми сызэрафэразэр къэсIонэу сыфай», — къыхигъэщыгъ АР-м и ЛIышъхьэ.
Чемпионхэм загъэхьазырынымкIэ ама­лэу яIэхэм КъумпIыл Мурат защигъэ­гъозагъ, тренерхэм ыкIи ахэм агъасэхэрэм ягухэлъхэм, зэнэкъокъухэу зыхэлажьэхэмэ ашIоигъохэмкIэ гугъапIэу щыIэхэр зэригъэшIагъэх. Ахэм адакIоу вице-премьерымрэ а Iофым фэгъэзэгъэ комитетымрэ пшъэрылъхэр афишIыгъэх спортым нахьыбэ хэщэгъэнымкIэ, гъэхъэ­гъэшхохэр ашIынхэм пае IэпыIэгъу ятыгъэнымкIэ Iофтхьабзэхэм ахагъэхъонэу. Ахэм ахэхьэх чемпионхэр зыгъэсэрэ тренерхэм шIухьафтынэу аратырэр на­хьыбэ шIыгъэныр, гъомылапхъэмкIи, Iоф­тхьабзэхэм ахэлэжьэнхэмкIи, нэмыкI лъэны­къохэмкIи мылъку гъэнэфагъэ апэIуагъэхьанэу.
ЗэIукIэгъум икIэухым Адыгеим и ЛIышъхьэ спортсменхэм ыкIи ахэр зыгъасэхэрэм ахъщэ сертификатхэр аритыгъэх: самбэмкIэ дунаим ичемпионэу Наш Расул сомэ миллион 1,6-рэ, ащ итренерэу Джарымэкъо Рустам сомэ мин 400, боксымкIэ Европэм ипервенствэ текIоныгъэ къыщыдэзыхыгъэхэ Евгений Жоровымрэ Мушег Баяндурянрэ сомэ мин 500 зырыз, ахэр зыгъэсэхэрэ Александр Кимрэ Карлен Восканянрэ сомэ мини 125-рэ зырыз аратыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.