Дэеу зэхэзыхыхэрэм тхэквондомкIэ яурысые чемпионат Адыгеим илIыкIо медаль къыщихьыгъ.

Спорт лъэпкъэу сурдотхэквондомкIэ анахь IэпэIасэр къы­зыщылъэгъогъэ зэнэкъокъухэр Къэ­бэртэе-Бэлъкъарым икъэлэ шъхьаIэу Налщык мэфэ заулэрэ щыкIуагъэх. Урысыем ишъолъыр 13-мэ къарыкIыгъэ спортсмени 107-рэ ахэм къякIолIагъ. Адап­тивнэ спортымкIэ республикэ спорт еджапIэм зыщызыгъэсэрэ Мария Притула а зэнэкъокъухэм ахэлэжьагъ ыкIи ящэнэрэ чIыпIэр ыубытыгъ. Ар ыгъэхьазырыгъ тренер IэпэIасэу Сергей Воло­диным.
Марие итекIоныгъэ Адыгеим испорт щыIакIэкIэ мэхьанэшхо зиIэ хъугъэ-шIагъ. Ащ иджэрз медаль ежь ышъхьэкIэ игъэхъэгъэ закъоп, тишъолъыр мы спорт лъэпкъым зыщиушъомбгъуным игугъапIэ къэзытырэу щыт.
Тренер IэпэIасэу Сергей Володиныр ипащэу спортсменкэм Iофышхо зэрэзыдишIагъэр а гу­шIуагъом ылъапс. Къэбэртэе-­Бэлъкъарым тхэквондомкIэ щыкIогъэ чемпионатэу дэеу зэхэзы­хыхэрэм яIэпэIэсэныгъэ къы­зыщагъэлъэгъуагъэм къыушы­хьатыгъ тикъэралыгъо мы спорт лъэпкъым зызэрэщиушъомб-­
гъу­рэр, ар зышIогъэшIэгъонхэм япчъагъэ зэрэхахъорэр.
Зэнэкъокъухэр гъэшIэгъонэу кIуагъэх. Ащ дакIоу шъолъыр зэфэшъхьафхэм къарыкIыгъэ спортсменхэр яIэпэIэсэныгъэкIэ зэхъожьыгъэх, язэпхыныгъэхэр агъэпытагъэх. Марие гъэхъагъэу ышIыгъэм зипсауныгъэ пыч фэ­хъугъэ ныбжьыкIэхэр мы спорт лъэпкъым хэщагъэ хъунхэм нахь фигъэчэфыщтых, акIуачIэ нахь цыхьэ фашIыщт. Спортсменкэм итекIоныгъэ нафэ къешIы уимурад пытагъэ, щэIагъэ пхэлъэу уфа­кIомэ, спортми, нэмыкI IофхэмкIи гъэхъагъэхэр пшIынхэ зэрэплъэ­кIыщтыр.
Адыгэ Республикэр спорт­сменкэ IэпэIасэм рэгушхо, урысые ыкIи дунэе зэнэкъокъухэм текIоныгъэ къащыдихынэу фэ­лъаIох.
Урысыем адаптивнэ спортым зыщиушъомбгъуным, зипсауныгъэ пыч фэхъугъэхэми спортым зыкъыщагъотыным Iоф дэшIэгъэным мэхьанэшхо раты. Налщык щыкIогъэ чемпионатыр ащкIэ лъэбэкъушIу хъугъэ.