Нэбгырэ 300 хэлэжьагъ
Теннис цIыкIумкIэ зэнэкъокъухэр Мыекъуапэ щыкIуагъэх.
Мы спорт лъэпкъымкIэ Федерацием ипрограммэу «Урысыем инеущырэ маф» зыфиIорэм къыдыхэлъытагъэу спортсмен ныбжьыкIэхэм заушэтыгъ.
Турнирым иаужырэ мафэм хагъэунэфыкIырэ чIыпIэ къыщыдихыгъ республикэ спорт еджапIэу N 3-м зыщызыгъэсэрэ Дмитрий Работяга. Нэбгырэ 65-рэ зыхэт купым рейтингымкIэ Адыгеим илIыкIо ящэнэрэ чIыпIэр щиIыгъыгъ ыкIи ар къыгъэшъыпкъэжьыгъ. Джэрз медалым фэбанэзэ, Ставрополь краим къикIыгъэ Владислав Кревенцевым 3:0-у текIуагъ. Зыныбжь илъэс 18-м емыхъугъэхэм якуп анахь щылъэшыгъ Луганскэ Народнэ Республикэм испортсменэу Владислав Дикович. Ар Ставрополь краир къэзыгъэлъэгъогъэ Амар Канаматовым финалым щыIукIагъ ыкIи 3:0-у текIуагъ.
Пшъашъэхэм язэнэкъокъу текIоныгъэр къыщыдихыгъ Ставрополь краим къикIыгъэ Виктория Сидоровам. Краснодар краим щыщ Аэлита Забунян ятIонэрэ хъугъэ, Ставрополь краим испортсменкэу Вероника Кривенцевам джэрз медаль къыфагъэшъошагъ. Адыгеим щыщ Гъыдзэ Самирэ я 14-рэ чIыпIэр къыхьыгъ. Урысыем ишъолъыр зэфэшъхьафхэм къарыкIыгъэ нэбгырэ 300 зэнэкъокъум хэлэжьагъ.