ПцэжъыеешэнымкIэ Урысыем и Кубок икъыдэхын иятIонэрэ едзыгъо Адыгеим щыкIуагъ. Мыекъопэ районым ит псыубытыпIэу «Кужорэм» щызэхащэгъэ зэнэкъокъум къэралыгъом ишъолъыр 23-мэ къарыкIыгъэ командэ 29-рэ хэлэжьагъ.

Iофтхьабзэр сыхьат 72-рэ кIуа­гъэ, а уахътэм анахь лъэшхэр къыщынэфагъэх. Мы спорт лъэпкъыр зыгу рихьыхэрэм язэнэкъо­къу уеплъыныр гъэшIэгъоныгъ, пцэжъыеу къыхадзырэр защэчырэм ыуж командэхэм чIыпIэу аIыгъыр ренэу зэблэхъущтыгъ.
Спортсменхэм зэкIэмкIи пцэ­жъые 2612-рэ къыхадзыгъ, ахэм килограмм 7388-рэ къарыкIыгъ. ЯтIонэрэ едзыгъом изэфэхьысыжьхэмкIэ апэрэ чIыпIэр афагъэшъошагъ Сергей ыкIи Алексей Артюхинхэм (Адыгэ Республикэр), ятIонэрэ хъугъэх Сергей Разлатрэ Роман Курашинрэ (Брянскэ хэкур), ящэнэрэ чIыпIэр къыда­хыгъ Вадим Гасановымрэ Руслан Брызгуновымрэ (Адыгеир). Пцэ­жъые анахь иныр, килограмм 11,9-рэ къыщэчыщтыгъ, къэзыубытыгъэхэр тиреспубликэ илIыкIохэу Александр Нитиевскэмрэ Сергей Ткаченкэмрэ.
УцугъуитIум изэфэхьысыжьхэмкIэ Урысыем и Кубок къыдахыгъ Адыгеим илIыкIохэу Вадим Гасановымрэ Руслан Брызгуновымрэ. Тыжьын медальхэр афагъэшъошагъэх Сергей Разлатрэ Роман Курашинрэ. Сергей ыкIи Алексей Артюхинхэр ящэнэрэх.
Iофтхьабзэм изэфэшIыжьын фэгъэхьыгъэ зэхахьэм хэлэжьагъ Урысыем пцэжъыеешэнымкIэ и Федерацие ивице-президентэу Завурбек Вагидовыр. Зэнэкъо­къум текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэм УФ-м спортымкIэ иминистрэу Михаил Дегтяревым ыцIэкIэ ар къафэгушIуагъ, дипломхэр ыкIи ахъщэ шIухьафтынхэр (сомэ мин 300, мин 200 ыкIи мини 100) аритыжьыгъ.