Къэралыгъом ипащэ пшъэрылъ къызэрэфишIыгъэм тетэу Адыгеим и ЛIышъхьэу КъумпIыл Мурат УФ-м и Президент ишъолъыр приемнэ цIыфхэр щыригъэблэгъагъэх.

ЛъэIу тхылъхэр къэзытхыгъэхэр Мые­къопэ, Джэджэ, Тэхъутэмыкъое ыкIи Теуцожь районхэм ащыщых. Iофыгъоу къаIэтыхэрэр социальнэ мэхьанэ зиIэхэм ащыщых: инфраструктурэм, гъэсэныгъэм, кIэлэцIыкIухэм языгъэпсэфын ыкIи гъэ­сэныгъэ тедзэм изэхэщэн.
ЗэIукIэгъум хэлэжьагъэх федеральнэ инспектор шъхьаIэу Сергей Дрокиныр, Адыгэ Республикэм ипрокурорэу Игорь Шевченкэр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, чIыпIэхэм япащэхэр.
Мыекъопэ районым щыпсэурэ Татьяна Шахно илъэIу зыфэгъэхьыгъэр псэупIэу Краснооктябрьскэм иурамэу Цветочнэм шIоипс рыкIуапIэу иIэхэр гъэцэкIэжьыгъэнхэр ары. Мыекъопэ районым ипащэу Михаил Марьиным къызэриIуагъэмкIэ, проект-сметэ документациер ащкIэ зэхагъэуцогъах, ищыкIэгъэ ахъщэри муниципальнэ бюджетым къыхагъэкIыгъ. Мы илъэсым ыкIэм ехъулIэу IофшIэнхэр аухыщтых, ахэм сомэ миллиони 9,4-рэ апэIухьащт.
Джэджэ районым щыщ Елена Будаевам Iофыгъоу къыIэтырэр зэпхыгъэр кIэлэцIыкIу творчествэмкIэ Джэджэ гупчэр зычIэт унэм игъэфэбапIэхэр гъэ­цэкIэжьыгъэнхэр ары. Муниципалитетым ипащэу Андрей Таранухиным къызэриIуа­гъэмкIэ, чIыпIэ бюджетым сомэ мин 570-м ехъу къыхагъэкIынышъ игъэкIотыгъэ гъэцэкIэжьынхэр зэшIуахыщтых.
Тэхъутэмыкъое районым щыщ Константин Макаренкэм илъэIу зэпхыгъэр псэупIэу Инэм дэт гурыт еджапIэу N 25-р зычIэт унэм игъэцэкIэжьын. Му­ниципалитетым ипащэу Шъао Аскэр къызэриIуагъэмкIэ, еджапIэхэр гъэкIэ­жьыгъэнхэм тегъэпсыхьэгъэ къэралыгъо программэм къыдыхэлъытагъэу ащ игъэкIотыгъэ гъэцэкIэжьынхэр рашIылIэщтых. Федеральнэ бюджетым ащ пэIухьащтым щыщ сомэ миллиони 131-м ехъу къыхагъэкIыщт, ащ щыщэу миллиони 8,5-р зэтегъэпсыхьан Iофхэм апэIухьащт. 2026-рэ илъэсым шышъхьэIум зэкIэ IофшIэнхэр ыкIэм нагъэсынхэ мурад яI.
Гъэсэныгъэм ылъэныкъокIэ лъэIу тхылъэу Теуцожь районымкIэ Ирина Миленькаям къаIэкIигъэхьагъэр зыфэгъэхьыгъэр къэлэ гъэпсыкIэ зиIэ псэупIэу Лъэустэнхьаблэ дэт кIэлэцIыкIу IыгъыпIэу N 2-м («Золотая рыбка» зыфиIорэм) игъэкIотыгъэ гъэцэкIэжьынхэр ешIылIэгъэнхэр ары. Теуцожь районым ипащэу УдыкIэко Адам къызэриIуагъэмкIэ, гъэ­сэныгъэ зыщарагъэгъотырэ муниципальнэ организациехэу еджапIэм джыри мыкIорэ кIэлэцIыкIухэр зыщаIыгъхэрэм ягъэцэкIэжьын тегъэпсыхьэгъэ программэм тетэу 2026-рэ илъэсым игъэкIотыгъэ гъэцэкIэжьынхэр ащ рашIылIэщтых. Федеральнэ бюджетым субсидиеу къыхагъэкIыщтыр сомэ миллион 38,6-рэ, зэтегъэпсыхьан IофшIэнхэм сомэ миллиони 4 апэIуагъэхьащт.
ЛъэIу тхылъхэм республикэм и ЛIышъхьэ ынаIэ атыригъэтынэу зафигъэзагъ ыкIи къыхигъэщыгъ пIалъэхэу ахэмкIэ агъэнэфагъэхэм адэхыхэ зэрэмыхъущтыр.
«ЦIыфхэм ялъэIу тхылъхэм Iоф адэшIэгъэныр — зыгъэгумэкIырэ Iофыгъохэр къытлъыIэсынхэмкIэ мэхьанэшхо зиIэ лъэныкъоу щыт, чIыпIэхэм зэшIохыгъэн фэе Iофы­гъоу арылъхэр игъом тшIэнхэм, хэукъоныгъэхэр къыхэдгъэщынхэм ахэр якъэкIуапIэх. Муниципа­литетхэм япащэхэм, къулыкъу зэфэшъхьафхэм яIэшъхьэтетхэм пшъэ­рылъ афэсэшIы цIыфхэм ренэу яIофыгъохэм защагъэгъозэнэу, яIоф­шIэнкIэ ахэм яшIоигъо­ныгъэхэр къыдалъытэхэзэ ашIынэу. «Единэ Россием», «Народнэ фронтым», общественнэ организациехэм, нэмыкIхэу лъэгэпIэ шъхьаIэхэм ащы­Iэхэм амалэу яIэхэр зэкIэ къыз­фэгъэ­федэгъэн фае. ЦIыфхэмрэ хэбзэ къулыкъухэмрэ язэдэлэжьэныгъэ-зэгурыIоныгъэ а пстэуми нахь агъэлъэшын алъэкIыщт», — къыIуагъ АР-м и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.