СССР-м изаслуженнэ тренерэу Кобл Якъубэ ишIэжь фэгъэхьыгъэ я XII-рэ Урысые зэнэкъокъухэр Мыекъуапэ щыкIуагъэх. МэфитIум къыкIоцI Къыблэ, Темыр-Кавказ, Гупчэ, Поволжскэ ыкIи Уральскэ федеральнэ шъолъырхэм яспортсменхэм заушэтыгъ. Турнирым бзылъфыгъэхэри хъулъфыгъэхэри хэлэжьагъэх.

Хабзэ зэрэхъугъэу, Адыгеим илIыкIохэм ухьазырыныгъэ дэгъу къагъэлъэгъуагъ, хагъэунэфыкIырэ чIыпIэхэр къыдахыгъэх. Гъэ­хъэгъэшIу зышIыгъэ тидзюдоистхэм ыкIи ахэм ятренерхэм къа­фэгушIуагъ АР-м и ЛIышъхьэу КъумпIыл Мурат.
ХъулъфыгъэхэмкIэ текIоныгъэр къыдахыгъ ЦIыкIу Рэмэзан, Мыс Казбек, Датхъужъ Алый ыкIи Бэгъ Аслъан. ЯтIонэрэ чIыпIэр къафагъэшъошагъ Мерэм Дамиррэ Ордэн Зауррэ. Ящэнэрэ хъу­гъэх Бэслъэнэй Темирланрэ Джарымэкъо Долэтрэ.

Бзылъфыгъэхэм язэнэкъокъу ащытекIуагъэх Милана Дзагаловамрэ Татьяна Шаталовамрэ. Тыжьын медальхэр къахьыгъэх Диана Лобановам ыкIи Шумэфэ Марьянэ. Джащ фэдэу Камилла Дзагаловар ящэнэрэ хъугъэ.