Гъэсэныгъэ гупчэу «Полярис-Адыгеям» игъэмэфэ спорт еджа­пIэ иIофшIэн Мыекъопэ районым щы­ригъэжьагъ.

Адыгэ къэралыгъо университетым епхыгъэ зыгъэпсэфыпIэ чIыпIэу «Горная легенда» зыфиIорэм ар мэкъуогъум и 2-м къыщызэIуа­хыгъ ыкIи тхьамэфищэ кIощт.
Iофтхьабзэм республикэм икIэлэеджэкIуи 110-рэ хэлажьэ, ахэм илъэси 9-м щегъэжьагъэу 17-м нэс аныбжь ыкIи баскетболымкIэ, кушъхьэфэчъэ спортымкIэ, волейболымкIэ, теннис цIыкIумкIэ, лазертагымкIэ заушэтыщт. Спортым дакIоу, культурнэ Iофтхьабзэхэр ыкIи шIэныгъэ лекциехэр программэм къыдыхэлъытагъэх.