Мыекъопэ районым ипсэупIэу Тульскэм адыгэ культурэм и Мафэ фэгъэхьыгъэ мэфэкI щызэхащагъ. Творческэ куп зэфэшъхьафхэр зыхэлэжьэгъэхэ зэхахьэр къутырым дэт лъэпкъ культурэм и Гупчэ щыкIуагъ.

ХьакIэхэри мыщ щыпсэухэрэри ­адыгэ шэн-хабзэхэм нэIуасэ афашIыгъэх. ­Адыгэ лъэпкъ IэпэщысэхэмкIэ IофшIагъэхэм якъэгъэлъэгъон программэм хэтыгъ. Ды­шъэ ыкIи тыжьын IуданэхэмкIэ пкъы­гъо зэфэшъхьафхэр гъэкIэрэкIэгъэн­хэмкIэ ижъыкIэ къыщегъэжьагъэу лъэпкъым хэлъ хъугъэ IэпэIэсэныгъэм нэIуасэ фа­шIыгъэх. ПIуаблэм ишIын, дышъэ блэрым афэгъэхьыгъэ егъэджэн сыхьатмэ ныбжьыкIэхэр ахэлэжьагъэх. Ащ нэмыкIэу зышIоигъо пстэуми адыгэ къуаер зыщагъэфедэгъэ шхыныгъо зэ­фэшъхьафхэм ахэIэнхэ амал яIагъ — пэлъкъау, хьалыжъу, гуубат, къурамбый зыфэпIощтхэм.
IэшIагъэмэ якъэгъэлъэгъонхэм ауж республикэм итворческэ купхэр зы­хэлэжьэгъэхэ мэфэкI концерт щыIагъ. Къэгъэлъэгъонхэр амыублэзэ, къекIолIагъэхэм шIуфэс къарихыгъ Мыекъопэ районым иадминистрацие культурэмкIэ игъэIорышIапIэ ипащэу Дмитрий Губерт.
— Республикэм ис лъэпкъ зэфэшъхьафхэм яшэн-хабзэхэр къэухъумэгъэнхэмкIэ адыгэ культурэм и Мафэ мэхьанэшхо иI. Адыгеим щыпсэухэрэм азыфагу зэгурыIоныгъэрэ зыкIыныгъэрэ зэрилъыр текIоныгъэу ыкIи гъэхъагъэу тиIэхэм ащыщ. Адыгэ ыкIи урыс шэн-хабзэхэм ятарихъ ныбжьыкIэхэм зыщамыгъэгъупшэным, якультурэ къаухъумэным мыщ фэдэ Iофтхьабзэхэр фэIорышIэх, — къыIуагъ ащ.
— Тинепэрэ Iофтхьабзэ адыгэ лъэпкъым икультурнэ-тарихъ шIуагъэхэр ыкIи ихэбзэ дахэхэр къэухъумэгъэнхэм, хэ­хъо­ныгъэ ягъэшIыгъэным фытегъэпсы­хьагъ. Концертым къыщыдгъэлъэгъорэ ислъамые къашъом итарихъ ныбжьыкIэ­хэм къафэтIотагъ, ар къэтшIыгъ. Джащ фэдэу шIэныгъэхэр зэхахъохэзэ адыгэ культурэм ныбжьыкIэхэр щыгъозэщтых, — къыIуагъ лъэпкъ культурэм и Гупчэ ихудожественнэ пащэу Светлана Уклеевам.
— Непэ адыгэ культу­рэм и Мафэ хэтэгъэу­нэфыкIы, ащ ылъапсэ чыжьэу къыщежьэ, лъэ­ныкъуабэ къызэлъеубыты ыкIи бай дэдэу щыт. Лъэпкъым ыпсэр — ыбз, ылъапсэр — ишэн-хабз. КъыткIэхъухьэрэ лIэ­ужыкIэм Адыгэ чIыгум щыпсэурэ лъэпкъхэм якультурэ ышIэн ыкIи ыгъэлъэпIэн фае, — къы­Iуагъ Тульскэм дэт лъэпкъ культурэм и Гупчэ ипащэу Ольга Золоторевам.
МэфэкIым къекIолIагъэхэр творческэ купхэм къагъэхьазырыгъэ къэгъэлъэ­гъонхэм яплъыгъэх, зэнэкъокъухэм ахэ­лэжьагъэх.
Лъэпкъым икультурэ, ишэн-хабзэхэр ныбжьыкIэмэ япIуныгъэ-гъэсэныгъэ щы­гъэфедагъэхэ хъумэ, ащ шIуагъэ къызэ­рихьыщтым щэч хэлъэп. АщкIэ Адыгеим непэ амалышIухэр IэкIэлъых.

Мыекъопэ районым дэт псэу­пIэу Абдзэхэхьаблэ урыс культурэм и Мафэ щыкIуагъ. Федеральнэ программэу «Къэралыгъо лъэпкъ политикэм игъэцэ­кIэн» зыфиIорэм къыдыхэлъытагъэу Iофтхьабзэр зэхащагъ.

МэфэкI концертыр рамыгъажьэзэ, къэгъэлъэгъонэу къызэIуахыгъэм къэзэ­рэугъоигъэхэр еплъынхэ амал яIагъ. Урыс лъэпкъым игъомылапхъэхэр, ипкъы­гъохэр, инысхъапэхэр, пхъэм хэшIыкIыгъэхэр ащ щызэхэугъоягъэх.
Мыщ къекIолIагъэхэм ащыщэу Iэпэ­Iасэу Альвина Козьменкэм гущыIэгъу тыфэхъугъ.
— НыбжьыкIэхэр лъэпкъ культурэм, тарихъым ащыдгъэгъозэнхэр IэпэIасэхэм типшъэрылъ шъхьаI. Сэ матэхэм яшIын ныбжьыкIэхэр фэсэгъасэх. Тхы­лъы­пIэм игъэчэрэгъун щыублагъэу, ма­тэм иблэн нэсыжьэу егъэджэн десэхэм щясэгъэлъэгъу. Ахэм ашIогъэшIэгъонэу IофшIэныр зэрагъэцакIэрэм гухахъо хэсэгъуатэ, — еIо IэпэIасэм.
Концертым ипэублэ къоджэ псэупIэм иадминистрацие ипащэу Юрий Михайленкэм Iофтхьабзэм Абдзэхэхьаблэ хэ­лажьэхэрэм шIуфэс къарихыгъ.

— Урыс культурэм и Мафэ къыдыхэ­лъытэгъэ Iофтхьабзэр апэрэу типсэупIэ щырекIокIы. Лъэпкъ зэфыщытыкIэхэр жъугъэпытэхэу, творческэ зэдэлэжьэны­гъэр, мамырныгъэр шъуазыфагу илъэу шъупсэунэу сышъуфэлъаIо. Урыс культурэм идэхагъэ, ишэн-хабзэхэм ябаиныгъэ къызщыдгъэлъэгъорэ зэхахьэм шъукъесэгъэблагъэ, — къыIуагъ ащ.
— Лъэпкъ хабзэхэр — урыс культурэм ибаиныгъ. Непэрэ мафэр зыфэгъэ­хьыгъэр урыс культурэм имэхьанэ къэ­Iэты­гъэныр ыкIи къэухъумэгъэныр ары. ЛIэужыкIэм къэгъэлъэгъон хьалэмэт фы­зэхэтщагъ, — къыIуагъ культурэм и Унэ ипащэу Татьяна Сотниковам.
— Мы мафэр зэрэдгъэмэфэкIырэм къыгъэлъагъорэр Адыгеим зэгурыIоныгъэ зэрилъыр, лъэпкъ зэфэшъхьафэу мыщ щыпсэухэрэм шъхьэкIэфэныгъэ зэра­фэтшIырэр ары, — къыIуагъ псэупIэм дэт культурэм и Унэ ихудожественнэ пащэу Полина Князевам.
Урыс орэдхэр, къэзэкъ къашъохэр къызщашIыгъэ концертым Мыекъопэ районым иорэдыIо-къэшъокIо кIэлэцIыкIу купхэр хэлэжьагъэх.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет Iофтхьабзэм кIэщакIо фэхъугъ.
Лъэпшъыкъо Фатим.
Сурэтхэр: Iэшъынэ Аслъан, авторыр.