Урысые Федерацием ишъолъыр пстэуми афэдэу, Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэр игъэкIотыгъэу Адыгеими щыхагъэунэфыкIыгъ.

Мэфэ псаум мэфэкI Iофтхьабзэхэр районым ипсэупIэ пэпчъ щыкIуагъэх, анахь шъхьаIэхэр зыщызэхащагъэр Мые­къуап, Гупчэ саугъэт зэхэтым къэгъагъэ­хэр ыпэрапшIэу кIэлъыралъхьагъэх. Хэгъэгум иухъумакIохэу фэхыгъэхэм яшIэжь ыгъэлъэпIэнэу республикэм и ЛIышъхьэу КъумпIыл Мурат ащ щыIагъ.
Джащ фэдэу Iофтхьабзэм хэлэжьа­гъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Адыгеим ыцIэкIэ ФедерациемкIэ Советым хэтхэу Хъопсэрыкъо Муратрэ Владимир Наролинымрэ, Адыгеим иминистрэхэм я Кабинет хэтхэр, республикэм и Къэралыгъо Совет — Хасэм идепутатхэр, хэбзэухъумэкIо къулыкъухэм япащэхэр, общественнэ, патриотическэ зэхахьэхэм ахэтхэр, юнармейцэхэр.

Хэгъэгум пае зыпсэ зытыгъэхэм яшIэжь агъэлъэпIэнэу ЕгъэшIэрэ машIом цIыфыбэ къекIолIэгъагъ. Хэгъэгу зэошхом хэлэжьагъэхэм ясурэтхэр бэмэ аIы­гъыгъ. Къэзэрэугъоигъэхэр фэхыгъэхэм такъикъэ афэшъыгъуагъэх. АР-м и ЛIышъхьэ зэрэхигъэунэфыкIыгъэмкIэ, мыщ фэдэ мэфэкI лъапIэм тинахьыжъхэм, цIыфхэм гукIочIэшхоу яIагъэм, лIыхъужъныгъэшхоу зэрахьагъэм тарэгушхо.
«Непэ ЕгъэшIэрэ машIом къэгъагъэхэр кIэлъырытлъхьэзэ, ТекIоныгъэр къытфыдэзыхыгъэхэу псэемыблэжьныгъэрэ лIыхъужъныгъэшхорэ зыхэлъыгъэхэм шъхьащэ афэтэшIы. Илъэс 80 тешIэжьыгъэми, шIэжьым имашIо тыгухэм джыри къызэращыблэрэм мэхьанэшхо иI. Урысыем илIэужхэр зэкIэ а шIэжьым зэрепхых, нацизмэмрэ фашизмэмрэ ашъхьэ къамыIэтыжьыным, хэушъхьафыкIыгъэ дзэ операцием хэлажьэхэрэм хэгъэгум ишъхьафитыныгъэ къаухъумэным, ядзэ­кIолI пшъэрылъхэр зэрифэшъуашэу агъэ­цэкIэнхэм афэIорышIэ. ТидзэкIолIхэм тицыхьэ ателъ, текIоныгъэр къыдахынышъ, ядэжь шIэхэу къагъэзэжьынэу ахэм тапэплъэ. ЛIыхъужъхэу фэхыгъэхэр егъа­шIи тыгу илъыщтых. Ахэм яшIэжь ренэу дгъэлъэпIэщт!» — къыIуагъ АР-м и ЛIышъхьэ.
Шъугу къэтэгъэкIыжьы Хэгъэгу зэ­ошхом илъэхъан Адыгеим щыщ нэбгырэ мин 80 фронтым зэращэгъагъэр. Нэбгырэ мин пчъагъэ зэо кIыбым щылэжьагъ. ТичIыпIэгъу 52-мэ Советскэ Сюзым и ЛIыхъужъыцIэ, нэбгырэ 13-мэ Щытхъум иордени 3 къафагъэшъошагъ. Советскэ Союзым и ЛIыхъужъэу Андырхъое Хъусен лIыхъужъныгъэшхоу зэрихьагъэр Хэгъэгу зэошхом итарихъ егъэшIэрэу хэхьагъ.
МэфэкIыр къагъэдэхагъ
ТекIоныгъэшхом имэфэкI игъэкIоты­гъэу Адыгеим щыхагъэунэфыкIыгъ, зэо илъэс­хэм аусыгъэ мэкъамэхэр къырагъэIуагъэх. Мыекъопэ гарнизонымрэ Адыгэ Республикэм ихэбзэухъумэкIо къулыкъу­хэмрэ ядзэкъулыкъушIэхэр зэготхэу урамым къызэрэрыкIуагъэхэр Iофтхьэбзэ пстэуми анахьэу къахэщыгъ.

ХьакIэхэр ашIогъэшIэгъонэу ахэм алъыплъагъэх. Республикэм ис нэбгырабэмэ ягупсэхэу Хэгъэгу зэошхом хэлэжьагъэхэм ясурэтхэр аIыгъыгъэх. Анахь хьакIэ лъапIэу щытыгъэхэр Хэгъэгу зэошхом иветеранхэр ары. Ухъумэгъэ чIыпIэхэу тIысыпIэ зиIэхэр ахэм афагъэ­шъошэгъагъэх.
Къэзэрэугъоигъэхэм апашъхьэ Мыекъо­пэ чIыпIэ гарнизоным идзэкъулыкъушIэ­хэр, АР-м хэгъэгу кIоцI IофхэмкIэ и Министерствэ, пщыныжь ягъэхьыгъэнымкIэ Федеральнэ къулыкъум АР-мкIэ и ГъэIорышIапIэ, Урысыем ошIэ-дэмышIэ IофхэмкIэ и Министерствэ АР-мкIэ и ГъэIорышIапIэ, Дзэ-егъэджэн гупчэм яIофышIэхэр, юнармейцэхэм якуп зэхэугъоягъэ Мыекъуапэ иурамэу Жуковскэм ыцIэ зыхьырэм къыщызэхэуцуагъэх. Дзэ оркестрэр зэкIэми ауж итыгъ. МэфэкI IофтхьабзэмкIэ пэщэныгъэ зезыхьагъэр Мыекъопэ чIыпIэ гарнизоным ипащэ ипшъэрылъхэр пIалъэкIэ зыгъэцакIэу, подполковникэу Николай Деменюк. Зэхэугъоегъэ ротэхэр маршым зэрэфэхьазырхэр ащ АР-м и ЛIышъхьэу КъумпIыл Мурат риIуагъ.
Iофтхьабзэм ипэублэ ТекIоныгъэм и Быракъ, Урысые Федерацием и Къэралыгъо быракъ, Адыгэ Республикэм и Къэралыгъо Быракъ пчэгум къырахьа­гъэх. Зэготхэу урамым къырыкIонхэм ыпэкIэ КъумпIыл Мурат дзэкIолIхэм, республикэм щыпсэухэрэм, ихьакIэхэм закъыфи­гъэ­загъ.
Къэзэрэугъоигъэхэр лIыхъужъхэм та­къи­къэ афэшъыгъуагъэх. АР-м и ЛIы­шъхьэ къызэриIуагъэмкIэ, ТекIоныгъэр къыдэзыхыгъэ лIэужыр ренэу тищысэтехыпI, тицыхьэ зытелъыжьэу тапэкIэ тылъызгъэ­кIотэрэ, сыд фэдэрэ къини зэпытэзыгъэ­чырэ кIэгъэкъон пытэу ахэр сыдигъуи къэнэжьых.
Iофтхьабзэм икIэух АР-м и ЛIышъхьэ республикэм щыпсэухэрэми, урамым къырыкIогъэ дзэкъулыкъушIэхэми ТекIоныгъэм ия 80-рэ илъэскIэ джыри зэ къафэгушIуагъ.
ТекIоныгъэшхом ия 80-рэ илъэс ихэгъэунэфыкIынкIэ мэфэкI программэшхо Адыгеим щызэхагъэуцогъагъ. Жъоныгъуа­кIэм и 9-р къэмысызэ ащ фэгъэхьыгъэ Iоф­тхьэбзэ зэфэшъхьафхэр рагъэжьэгъа­гъэх. МэфэкI Iофтхьэбзэ шъхьаIэхэр зыкIуагъэхэр ТекIоныгъэм и Маф ары.
ТекIоныгъэм ия 80-рэ илъэс зыщыхагъэунэфыкIыщтым ехъу­лIэу Хэгъэгу зэошхом хэлэжьагъэхэм, сэкъатныгъэ хэзыхыгъэхэм, Ленинград къыза­дзыхьэм дэсыгъэхэм, зыныбжь имы­къугъэхэу гъэрэу фашист конц­лагерьхэм ащаIыгъы­гъэ­хэм сомэ мини 100 зырыз, Хэгъэгу зэошхом хэлэжьагъэ­хэм яшъхьэгъусэхэу шъузабэу къэ­на­гъэхэм, заом илъэхъан тылым щылэжьагъэхэм сомэ мин 25-рэ зырыз аратыгъ. ПстэумкIи республикэм щыпсэурэ нэбгырэ 667-мэ ащ фэдэ ахъщэ къаIукIагъ, ахэм ащыщэу 66-р заом хэлэжьагъэх е ахэм афагъадэх. Джащ фэдэу Хь. М. Шъэумэным ыцIэкIэ щыт Фондым къыхэкIыгъэ сомэ ми­ни 100 зырызи ахэм аратыгъ.
Творческэ куп зэфэшъхьафхэм яконцертхэр ТекIоныгъэм и Мафэ республикэ, район гупчэхэм къащатыгъэх, дзэкIолI пщэрыхьапIэхэм Iоф ащашIагъ, кIэлэцIыкIу зэнэкъокъухэр, къэгъэлъэгъонхэр, патриотическэ Iофтхьабзэхэр, флешмобхэр ащызэхащагъэх.
Мыекъуапэ икъэлэ парки дахэу мэфэкIыр щыхагъэунэфыкIыгъ. Творческэ купхэр зыхэлэжьэгъэ мэфэкI Iофтхьабзэхэр мыщ щыкIуагъэх, дзэкIолI пIастэкIэ щахьэкIагъэх. АР-м и ЛIышъхьэ мы чIыпIэм щыIагъ. КъумпIыл Мурат къэлэдэсхэмрэ хэушъхьафыкIыгъэ дзэ операцием иветеранхэмрэ адэгущыIагъ, ТекIоныгъэм и МафэкIэ пстэуми афэгушIуагъ.
ХэушъхьафыкIыгъэ дзэ операцием хэлажьэхэрэм атегъэпсыхьэгъэ пкъыгъо­хэу гуфакIохэм къагъэхьазырыгъэхэм якъэгъэлъэгъонрэ шэф остыгъэхэм яшIын­кIэ, хъытыухэм яхъынкIэ мастер-классхэу зэхащагъэхэмрэ ашIогъэшIэгъонэу цIыфыбэ яплъыгъ. Къэралыгъо фондэу «Хэгъэгум иухъумакIохэр» зыфиIорэм иреспубликэ къутамэ, АР-мкIэ Народнэ фронтыр, «Единэ Россиер», нэмыкI организациехэр, мылъку зиIэ цIыфхэр, республикэм исхэр къызыхэлэжьэхэрэ шIушIэ Iофтхьабзэхэм язэхэщэнкIэ, хэушъхьафыкIыгъэ дзэ операцием хэлажьэхэрэм IэпыIэгъу афэхъугъэнымкIэ Адыгеим ихэбзэ къулыкъухэм Iофэу ашIэрэм мэхьанэшхо зэриIэр АР-м и ЛIышъхьэ къыхигъэщыгъ.
Творческэ купхэм республикэм ичIыпIэ зэфэшъхьафхэм мэфэ реным закъы­щагъэлъэгъуагъ, зышIоигъо пстэуми ахэм ахэлэжьэнхэу, зэо илъэсхэм зэхалъхьэгъэ орэдхэр къадаIонэу, ТекIоныгъэм фэгъэ­хьыгъэ усэхэм къяджэнэу амал яIагъ.
Патриотическэ Iофхьабзэхэмрэ флешмобхэмрэ Мыекъуапэ игупчи, микрорайонхэу Черемушкэми, Восходми ащыкIуа­гъэх. Пчыхьэм сыхьатыр 7-м зэрэ Урысыеу зыщэшъыгъохэ нэуж В. И. Лениным ипчэгу концертышхоу къыщатыгъэм АР-м культурэмрэ искусствэм­рэкIэ иIэпэIасэхэм зыкъыщагъэлъэ­гъуагъ. МэшIоустхъокIэ мэфэкI Iофтхьабзэхэр аухыгъэх.

АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.