КъэгъэлъэгъоныкI
ТекIоныгъэр къыздахыгъэр илъэс 80 зэрэхъугъэм къыдыхэлъытагъэу «ДзэкIолI гъогухэр» зыфиIорэ къэгъэлъэгъон АР-м и Лъэпкъ музей къыщызэIуахыгъ.
Советскэ цIыфхэр шъхьафит шIыжьыгъэнхэм зиIахьышIу хэзылъхьагъэхэм ар афэгъэхьыгъ. Ащ игъэпсын дэлэжьагъэхэм анахьэу анаIэ зытырагъэтыгъэр заом хэлэжьагъэхэм ящыIэныгъэ гъогу, язэоуж илъэсхэр ары. Джащ фэдэу къэгъэлъэгъоным хэхьагъэх унэе сурэтхэу 1941 — 1945-рэ илъэсхэм дзэкIолIхэм зытырахыгъэхэр, бгъэхалъхьэхэр, зэокIо шъуашэм щыщ пкъыгъохэр, тхыгъэ зэфэшъхьафхэр, зэо лъэхъаным атхыщтыгъэ джэпсалъэхэр, фашист техакIом ицIэпIагъэ къизыIотыкIырэ тхылъ зэфэшъхьафхэр ыкIи нэмыкIхэр. Пстэури Лъэпкъ музеим ихъарзынэщ щыщых, апэрэу къагъэлъагъох. Интерактивнэ экраным иамалкIэ мыщ хэмылэжьэгъэ пкъыгъохэр шIоигъоныгъэ зиIэхэм зэрагъэлъэгъушъущтых.
Iофтхьабзэм икъызэIухын хэлэжьагъэх АР-м культурэмкIэ иминистрэу Аулъэ Юрэ, АР-м иветеранхэм я Совет итхьаматэу Къоджэ Аслъан, УФ-м и Следственнэ комитет иследственнэ гъэIорышIапIэ илIыкIохэр.
Аулъэ Юр — АР-м культурэмкIэ иминистр:
— Мы къэгъэлъэгъоным мэхьанэшхо иI. ШIэжьыр къэухъумэгъэнымкIэ ащ ыкIуачIэ лъэшы. Непэ тарихъыр зэблэзыхъу зышIоигъохэр зыщыбэм анахьэу ар къыбгурэIо. Арышъ, къэралыгъом хигъэунэфыкIырэ мэфэкIышхомкIэ, ТекIоныгъэм ия 80-рэ илъэскIэ зэкIэми сышъуфэгушIо.
Къоджэ Аслъан – АР-м иветеранхэм я Совет итхьамат:
— Заор окIофэ лъэхъанышIухэри дэйхэри тидзэкIолIхэм яIагъэх. Анахьэу хьылъагъэхэр апэрэ илъэсхэр ары. Илъэсныкъорэ зызэкIэкIогъэхэ уахътэм ыуж апэрэ текIоныгъэшхор Москва дэжь тидзэхэм къыщыдахыгъагъ, нэмыц техакIохэр щызэхакъутэхи, зэкIафэгъагъэх. Шъыпкъэ, заом ихьылъэ зыхьыщтыгъэхэр дзэкIолI къызэрыкIохэр ары. Ау ахэр ыпэкIэ зыщэщтыгъэхэ дзэ пащэхэм яухьазырыныгъэ зэфэхьысыжьыр зыфэдэщтымкIэ мэхьанэшхо иIагъ. Ащ фэдэ пэщэ 11къэралыгъом иIагъ. ЕтIанэ, къытпэуцужьхэрэм ашIагъэп Советскэ цIыфым ихэкупсэныгъэ ылъапсэ зыфэдэ шъыпкъэр.
Къэгъэлъэгъоным икъызэIухын къыдыхэлъытагъэу, УФ-м и Следственнэ комитет иследственнэ гъэIорышIапIэ иIофышIэхэм лIэужыкIэхэм афагъэхьыгъэ лъэIухэр зытетхэгъэ тхьапэр зэрылъ къэмланыр АР-м и Лъэпкъ музей къыратыгъ. Илъэс 20-кIэ, 2045-рэ илъэсым, ТекIоныгъэр илъэси 100 зыщыхъурэм ар къызэIуахыщт.
Анцокъо Ирин.
Сурэтхэр: авторыр.