Къэгъэлъэгъонэу «ЧIыгу Iэбжыб» зыфиIорэр Лъэпкъ театрэу И. С. Цэим ыцIэ зыхьырэм апэрэу къыгъэлъэгъуагъ. Абхъаз тхакIоу Баграт Шинкуба итхыгъэу «Последний из ушедших» техыгъэр шэпхъэшIухэм ади­штэу агъэпсыгъ. Адыгэ труппэм хэт артистхэм зыфэдэ къэмыхъугъэ спектаклыкIэр урысыбзэкIи адыгабзэкIи къашIыгъ.

Сценэр къагъэлъагъорэм елъытыгъэу ямышIыкIэу къызэрэнэфырэр, мэкъа­мэхэр зэрагъэфедэхэрэр, артистхэм ащыгъ шъуашэхэр зэрэшIыгъэхэр, спектаклэм икъэгъэлъэгъон шIыкIэу къы­фагъоты­гъэр умыгъэшIэгъонхэ плъэкIырэп. КъохьэпIэ Кавказым икъушъхьэхэм ижъыкIэ ащы­псэугъэ убыххэм ятарихъ гууз цIыфхэр хащагъэх. 1864-рэ илъэсым къухьэхэм арытIысхьэхи, убыххэм егъэ­шIэрэу ­ячIыгу гупсэ къабгынагъ. ЛIэшIэгъум ехъу блэ­кIыгъ, тарихъ бай зиIэ лъэпкъыр дунаим текIодыкIыжьыгъ.
Спектаклэм герой шъхьаIэу хэтыр аужырэ убыххэу къэнэгъэ Золэкъо Заур­къан ары. Илъэсишъэ къэзыгъэшIэгъэ, зипсауныгъэкIэ къызэтенэгъэ, акъыл чан джыри зиIэ лIыжъым илъэпкъ къырыкIуагъэр дэгъоу къешIэжьы. Ащ иунэ мазэ хъугъэу щэпсэу шIэныгъэлэжь-лингвистэу Шарах Квадзба. ЗичIыгу гупсэ егъэшIэрэу зышIокIодыгъэ лъэпкъым тхьамыкIагъоу пэкIэкIыгъэр ащ къытхыжьы шIоигъоу научнэ экспедицием хэлажьэ.
АР-м инароднэ артистэу Тхьаркъохъо Теуцожь (Зауркъан ироль), АР-м искусствэхэмкIэ изаслуженнэ IофышIэшхоу Ацумыжъ Рустам (Зауркъан иныбжьыкIэгъум, Шарах Квадзба) ярольхэр шъошэ лъагэм илъэу къашIыгъэх.
БлэкIыгъэм иуахътэ Лъэпкъ театрэм иартистхэм нэм къыкIагъэуцоу цIыфхэр хащагъэх. Гум хэтIысхьэу, лыр агъэузэу, нэпсыр къагъакIоу ярольхэр къырагъэлъэгъукIыгъ.
— Къэгъэлъэгъоным икIэухым Тхьаркъохъо Теуцожь ироль хэт гущыIэхэу убыххэм афэгъэхьыгъэхэр сыгу нэсыгъэх. Лъэпкъыр хыорхэм, къушъхьэ псыхъохэм, чъыг пкIашъэхэм, чIыгум, бзыухэм амакъэ къызэрахэнагъэм гу­пшысэ куу сигъэшIыгъ. Гум хэтIысхьэу, нэпсыр къыгъакIоу къэгъэлъэгъоным кIэух лъэш фашIыгъ, — къыIуагъ Адыгеим щызэлъашIэрэ орэдыIоу Нэхэе Тэмарэ.
Лъэпшъыкъо Фатим.