Адыгэ Республикэм и Къэралыгъо быракъ и Мафэ фэгъэхьыгъэ Iофтхьабзэ непэ филармонием щыкIуагъ.

Ащ хэлэжьагъэх АР-м иминистрэхэм я Кабинет хэтхэр, АР-м и Къэралыгъо Совет — Хасэм идепутатхэр, ­общественнэ объединениехэм, ветеран организациехэм, патриотическэ клуб­хэм, научнэ, творческэ интеллигенцием, ныбжьыкIэхэм ялIыкIохэр.
Адыгэ Республикэм и ЛIышъхьэу КъумпIыл Муратрэ депутат­хэмрэ ацIэкIэ мы Iофтхьабзэм къекIолIагъэхэм шIуфэс къари­хыгъ АР-м и Къэралыгъо Совет — Хасэм и Тхьаматэ игуа­дзэу Цэй Эдуард.
Адыгеим ибыракъ мэхьанэшхо зэриIэр ащ хигъэунэфы­кIыгъ. Тиреспубликэ и Къэралыгъо тамыгъэ дгъэлъапIэзэ, тичIыгу гупсэ непэ щыпсэухэрэ лъэпкъ зэфэшъхьафхэр зэгурыIонхэм, зыкIыныгъэ ахэлъыным ипсалъэ къыфэджагъ.
Зэхахьэр лъигъэкIотагъ Адыгэ Хасэм итхьаматэу ЛIымыщэ­къо Рэмэзан. Хэгъэгум илъ лъэпкъ зыкIыныгъэр гъэпытэ­гъэным мэхьанэшхо зэриIэр ащ игущыIэ къыщыхигъэщыгъ. Быракъым чIэтэу мамырэу тилъэпкъ зэрэпсэурэр хигъэунэфыкIыгъ.
МэфэкI Iофтхьабзэр къагъэдэхагъ «Налмэсым», творческэ зэхэт купэу «Ошъадэм», АР-м изаслуженнэ артисткэу Даутэ Сусанэ, ансамблэхэу «Ошъутенэм», «Мыекъуапэ инэфылъэ­хэм», нэмыкIхэми.
Iофтхьабзэр рамыгъажьэзэ филармонием ичIэхьапIэ ­лъэпкъ искусствэм ибаиныгъэ къыщагъэлъэгъуагъ. Лъэпкъ культурэм иIэпэщысэу псэ къызпыкIэжьыгъэр непэрэ мафэм зэрагъэфе­дэрэ шIыкIэр зышIогъэшIэгъонхэм ар зэрагъэлъэгъугъ. ­Лъэпкъ искусствэм зиушъомбгъуным Адыгеим иIэпэIасэхэр дэлажьэх, лIэужхэр зэзыпхырэ кIэныр агъэлъапIэ.
Быракъым ыкIуачIэ гъунэнчъ. Лъэпкъым ыцIэ зыхьырэ Адыгэ Республикэм ибыракъ хэгъэгу быракъ хъуныр инасып къыхьыгъ, зэрэкъэралыгъоу ар зэдэтIэтыгъ, Адыгеир Урысые Федерацием изы шъолъырэу ифитыныгъэхэмкIэ пстэуми зэрафэдэр тинэрылъэгъу, Урысыем, хэхэс ткъошхэм ячIыгужъ аригъэгъотыжьын зэрилъэкIыщтым ар игугъапI.
МэфэкI Iофтхьабзэр зэфашIыжьыгъ адыгэ джэгукIэ.
Лъэпшъыкъо Фатим.