Медицинэ IэпыIэгъу псынкIэм иIофышIэхэу лъытэныгъэ зыфэтшIыхэрэр!

Шъуисэнэхьат епхыгъэ мэфэкIымкIэ тышъуфэгушIо!
Шъо шъузфэгъэзэгъэ Iофым IэпэIэсэныгъи, щэIагъи, гукIэгъуи ищыкIагъ, сыд фэдэрэ уахъти медицинэ IэпыIэгъу зищыкIагъэм шъулъыIэсыным шъуфэхьазырын фае.
Апэрэ медицинэ IэпыIэгъоу цIыфым ратырэм мэхьанэшхо иIэу бэрэ къыхэкIы нэужым ащ ипсауныгъэ къырыкIощтымкIэ.
Зэпахырэ узэу COVID-м илъэхъан а къулыкъур тищыкIэгъэ дэдэу зэрэщытыр нахь къыдгурыIуагъ. Сымаджэхэр хэпшIыкIэу нахьыбэ зэхъухэм, медицинэ учреждениехэм ачIэмыфэжьхэу зэкIэхэри чIыпIэ зэжъу зефэхэм, вирусым пэуцужьыгъэнымкIэ къулыкъум иIофышIэхэм лIыхъужъныгъэ зэрахьагъ тIоми тыхэукъощтэп.
ОшIэ-дэмышIагъэ зыхэлъ тхьамыкIагъохэр къызщыхъухэрэ лъэхъаным тэрэзэу зиIофшIэн зэхэщэгъэ къулыкъум мэхьанэшхо зэриIэр пандемием къыгъэлъэ­гъуагъ.
Мы мэфэкI мафэм IэпыIэгъу псынкIэм иIофышIэ пстэуми ягуетыныгъэ, яIэпэIэсэныгъэ, япсэемыблэжьыныгъэ апае тызэрафэразэр къэтэIо.
Ныбджэгъу лъапIэхэр, зэкIэми тышъуфэлъаIо псауныгъэ пытэ, щыIэкIэшIу шъуиIэнэу, шъуисэнэхьаткIэ гъэхъэгъакIэхэм шъуафэкIонэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу
Владимир Нарожнэр