Сымаджэхэм япсауныгъи, ящыIэныгъи къарыкIощтыр бэкIэ зэлъытыгъэр игъом апэрэ медицинэ IэпыIэгъур зэрарагъэгъотырэр ары.

Шэуджэн районымкIэ IэпыIэгъу псынкIэм фельдшер шъхьаIэу щылэжьэрэ Бэчмыкъо Азэ бэмэ ящыIэныгъэ къыгъэ­нэжьын ылъэкIыгъ. ИIофшIэн шIу ылъэгъоу, гукIэгъуныгъэ зэрэхэлъым фэшI мы сэнэхьатым илъэси 7 хъугъэу рэлажьэ. НыбжьыкIэм ятэу Цуамыкъо Руслъан апэрэ медицинэ IэпыIэгъум имашинэ шоферэу илъэс 27-рэ щылэ­жьагъ. Тым иIофшIапIэ пшъэшъэжъыем сыдигъуи шIогъэшIэгъоныгъ. Хьатыгъу­жъыкъое гурыт еджапIэм ыуж Краснодар дэт медицинэ колледжыр къыухыгъ. Шэуджэн район сымэджэщым фельдшерэу Iухьагъ.
ИIофшIэнкIэ анахь шъхьаIэу ащ къы­хигъэщыгъэр IэпыIэгъу зищыкIэгъэ сымаджэм псынкIэу ыдэжь унэсыныр ары.
— Сыд фэдэрэ лъэхъани IэпыIэгъу псынкIэм иIофшIэн мэхьэнэ ин иI. ГуIэрэ цIыфыр апэ зэуалIэрэр, къызаджэрэр тэры. Сымаджэхэм зэрифэшъуашэу сафыщытыныр анахь шъхьаIэу сэлъытэ. IэпыIэгъу зищыкIагъэм сыдеIэн зэрэфаем имызакъоу, ащ ипсауныгъэ, ары пакIошъ, ищыIэныгъэ сIэ зэрилъыр зэхасшIэзэ сымаджэм дэжь сэкIо, илажьэр псынкIэу згъэунэфыным сыпылъ, — къе­Iуатэ Азэ.
Шэуджэн район сымэджэщым щыIэ подстанцием епхыгъэх Кощхьэблэ, Красногвардейскэ, Джэджэ районхэри.
— БэмышIэу илъэс 42-рэ нахь зымыныбжь хъулъфыгъэр инфаркт хъугъэу сиIофшIэгъоу Ламыкъо Оксанэрэ сэрырэ тыкIогъагъ. ЛIы зишIугъом зы такъикъым ыпсэ зэрэхэкIын ылъэкIыщтыр къыдгурыIозэ, апэрэ IэпыIэгъур етхьылIагъ. ТинасыпкIэ Iэзэгъу уцхэм яшIуагъэ къэ­кIуагъ, республикэ сымэджэщым псынкIэу нэдгъэсыгъ. Анахьэу тыгу къыдэзыщэя­гъэр, лIыр нахьышIу зэхъум къытфытеуи, «шъопсэу, хьадэгъум сыкъыIэкIэшъу­хыжьыгъ» къызэрэтиIуагъэр ары, — къе­Iуатэ тигущыIэгъу.
Сымаджэ пэпчъ екIолIэкIэ гъэнэфагъэ къыфагъоты, хэти игумэкIыгъо дэгъэ­зыжьыгъэ зэрэхъущтым чэщи мафи мыхэр пылъых.
— Инфарктымрэ инсультымрэ уз мэхъаджэх. ГухэкI нахь мышIэми, аужырэ лъэхъаным ахэр «къэныбжьыкIагъэх», ныбжь зиIэхэм нахьыбэрэмкIэ къяузыщтыгъэхэмэ, джы ныбжьыкIэ дэдэхэми алъэIэсых. ЛъыдэкIуаер, гу-лъынтфэ ыкIи шъхьэкуцI узхэр зидагъохэр гузэжъогъу зыхафэхэкIэ, къытфытеох. Ахэм Iэпы­Iэгъу псынкIэу зэрядгъэгъотыщтым тыпылъ. Нахь сымэджэ хьылъэхэр республикэ сымэджэщым тэщэх, — къеIуатэ тигущыIэгъу.
Бэчмыкъо Азэрэ IэпыIэгъу псынкIэм имашинэ ис шоферэу Гъот Аслъанрэ илъэсыбэ хъугъэу зэдэлажьэх. Сымаджэм ыдэжь ежьэгъэ машинэу ащ IэпыIэгъу фэхъущт врачхэр зэрысхэр игъом нэмысэу мэхъу.
— Мобильнэ отрядым сыдигъуи гъэлъэшыгъэ шIыкIэм тетэу Iоф ешIэ. Гузэжъогъу хэфэгъэ сымаджэм тызэригугъапIэр зыхасшIэзэ, зыфаIогъэ чIыпIэм псынкIэу нэсэгъэсых. ГущыIэм пае, гъо­гум хъугъэ-шIагъэ бэу щэхъу, къыхэкIы автомобильмэ тыбламыгъэкIэу. Джащ дэжьым лъэшэу сыгу къео такъикъ пэпчъ сымаджэмкIэ мэхьанэ зэриIэм цIыфмэ язэхэшIыкI зэрэнэмысырэр, — къыIуагъ Гъот Аслъан.
ЗиIофшIэн шIу зылъэгъоу, гу пытэ зиIэу, гукIэгъуныгъэ зыхэлъыр ары мыщ Iоф щызышIэн зылъэкIыщтыр.
— Зы мафи сыIукIыжьынэу сыгу къи­хьагъэп. СыгукIэ сыфаеу мыр къыхэс­-хыгъ. ПшъэдэкIыжь инэу пылъыр къызгурыIозэ, медицинэм сыщэлажьэ, — еIо Азэ.
Лъэпшъыкъо Фатим.
Сурэтыр: Iэшъынэ Аслъан.