АР-м и Къэралыгъо Совет — Хасэм зичэзыу я XLV-рэ зэхэсыгъоу тыгъуасэ иIагъэм къулыкъу зэфэшъхьафхэм яIофшIагъэ щызэфахьысыжьыгъ, респуб­ликэ хэбзэгъэуцугъэхэр, федеральнэ гупчэм фэгъэзэгъэ джэ­псалъэ щаштагъэх.

Зэхэсыгъом министрэхэм я Кабинет хэтхэр, шъолъыр ыкIи федеральнэ къулы­къухэм, народнэ депутатхэм ясоветхэм япащэхэр хэлэжьагъэх. Iофтхьабзэр зэ­рищагъ Парламентым и Тхьаматэу Владимир Нарожнэм.
ЗэкIэмэ апэ «Правительственнэ сы­хьат» яIагъ. Пыдзэфэ пытэхэм яIущынкIэ системэм изытет ар фэгъэхьыгъагъ. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ иминистрэ игуадзэу Лафышъэ Рэмэзан къызэриIуагъэмкIэ, цIыф­хэм хэкIэу къырахырэр зэрахьылIэщт площадкэ 3025-рэ псэупIэхэм ащагъэпсыгъ, контейнер 5302-рэ ахэм атырагъэу­цуагъ. Мы уахътэм ар екъу, ахагъэхъонэу ищыкIагъэп. ХэкIэу къаугъоирэр аращалIэу Мыекъуапэрэ Адыгэ­къалэрэ адэжь полигонхэр ащагъэпсыгъэх.
Пыдзэфэ пытэхэм яIущынкIэ системэр гъэкIэжьыгъэным фэшI «экотехнопарк» шъолъырым щырагъэжьагъ. Зэрагъэнэфагъэм тетэу, къэкIощт 2026-рэ илъэсым ар аухэу атIупщымэ, хэкIэу дащырэм ипроцент 55-р гъэкIодыгъэнэу, 45-р зэхэупкIэтэгъэнэу амал къытыщт.
УФ-м и Президент коммунальнэ пыдзэфэ пытэу къаугъоирэр зэкIэ, хэзыгъэ имыIэу, зэхадзыным 2030-рэ илъэсым нэс къыфэкIонхэу пшъэрылъ къыгъэуцугъ. Ар гъэцэкIэгъэным «экотехнопаркыр» фэIорышIэщт.
Мы зэхэсыгъом апэрэ ыкIи ятIонэрэ еджэгъухэмкIэ щаштагъ АР-м ихэбзэ­гъэуцугъэу гъэсэныгъэм, медицинэм, культурэм, физкультурэм ыкIи спортым япхыгъэ учреждениехэр, псэуалъэхэр зыхэт унэхэм спирт зыхэмылъэу, ау цIыфыр зыгъэчэфырэ шъонхэр, «энергетиккIэ» заджэхэрэри ахэхьэх, ащыIуа­гъэкIынхэ фимытхэу къызщиIорэр. Мыр зымыгъэцакIэхэрэм административнэ пшъэдэкIыжьэу ахьыщтыр зыщыгъэнэ­фэгъэ законыр Парламентым егъэхьазыры, охътэ благъэм ащ тегущыIэнхэшъ, ­аштэщт.
ЦIыфхэм яфитыныгъэхэр къэухъумэгъэнхэмкIэ Уполномоченнэу АР-м щыIэм 2024-рэ илъэсым Iофэу ышIагъэм депутатхэр къыщигъэгъозагъэх а IофшIэныр зыгъэцэкIэрэ Михаил Шебанец. Ащ къызэриIуагъэмкIэ, а уахътэм гъогогъу 433-рэ цIыфхэм закъыфагъэзагъ. ЗэкIэми упчIэжьэгъу афэхъугъэх, тхыгъэу е жэрыIокIэ джэуапхэр аратыжьыгъэх, ягумэкIыгъохэм ядэгъэзыжьынкIэ аде­Iагъэх.
ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ анахьэу анаIэ зэратырагъэтырэр Уполномоченнэм къыхигъэщыгъ. Нэбгыри 130-рэ ащ фэдэу закъыфэзыгъэзагъэр. Iофыгъоу къарахьылIагъэхэр Iэзэгъу уцхэм, ахъщэ тынхэм, зэо-зэпэуцужьхэм яветеран статусым игъэпсын, зыдэхъугъэр амышIэу кIодыгъэхэм, нэмыкIхэм афэгъэхьыгъэх. Мыхэм яIофхэр зэхэфыгъэнхэм фэшI Уполномоченнэм иаппарат УФ-м зыкъэухъумэжьынымкIэ и Министерствэ, Урысыем ыкIи Къыблэ дзэ округым япрокуратурэхэм, цIыфэу кIодыгъэхэм алъыхъугъэнымкIэ Гупчэм, АР-м и ЛIышъхьэ, министрэхэм я Кабинет зэпхыныгъэ пытэ адыриI.
Ахэм анэмыкIэу АР-м и Уплъэ­кIокIо-лъытэкIо палатэ ипэщэ IэнатIэм Iугъэ­хьэжьыгъэнымкIэ Павел Стаценкэм икан­дидатурэ квалификационнэ шапхъэу федеральнэ хэбзэгъэуцугъэм щыгъэнэфагъэхэм зэрадиштэрэм фэгъэ­хьыгъэ джэпсалъэу УФ-м и ЛъытэкIо палатэ фэгъэзагъэр, 2025-рэ илъэс бюд­жетым, организациехэм ямылъку пае атырэ хэбзэIахьхэм, АР-м и Общественнэ палатэ афэгъэхьыгъэ хэбзэ­гъэуцугъэхэм зэхъокIыныгъэу афэхъущтхэмкIэ законопроектхэр, законхэр мы зэхэсыгъом щаштагъэх.
ХЪУТ Нэфсэт.