Адыгеим и ЛIышъхьэу КъумпIыл Мурат рес­публикэм и Прави­тельствэ зычIэт унэм щыригъэблэгъагъ гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым ипащэу ЛIыIужъу Адам.

ЗэIукIэгъум Iофыгъоу къыщаIэтыгъэхэм анахь шъхьаIэхэм ащыщых адыгабзэм изэгъэшIэн, икъэухъумэн ыкIи изегъэу­шъомбгъун япхыгъэхэр. ЛIыIужъу Адам адыгабзэм икъэухъумэн-
кIэ ыкIи изэгъэшIэнкIэ зэхэубытэгъэ екIолIакIэ гъэпсыгъэнымкIэ проект офисым ипащэуи зэрэщытым елъытыгъэу а лъэныкъомкIэ Iофэу ашIэрэм къытегущыIагъ.
«Мы аужырэ илъэси 5 — 6-м проект офисым Iофышхо зэришIагъэр тинэрылъэгъу. Адыга­бзэр къэухъумэгъэнымкIэ, зэгъэшIэгъэнымкIэ амалыкIэу щыIэхэр агъэфедэнхэм пае непэкIэ ящыкIагъэр зэкIэ агъо­ты. КIэу къыхэшъухыгъэхэр щыIэныгъэм щагъэфедэнхэм, къыткIэхъухьэхэрэм ахэр ашIогъэшIэгъонынхэм ыкIи къызфагъэфедэнхэм мэхьанэшхо иI», — къыIуагъ КъумпIыл Мурат.
Шъугу къэтэгъэкIыжьы: 2019-рэ илъэсым гуманитар ушэ­тынхэмкIэ Адыгэ республикэ институтым тегъэпсыхьагъэу адыга­бзэмкIэ проект офисыр зэхащэгъагъ. А уахътэм къыкIоцI адыгабзэм изэгъэшIэнкIэ клубым иIофшIэн зэхащэгъагъ, ныбжь зиIэхэмрэ кIэлэцIыкIу­хэмрэ апае бзэмкIэ курсхэр зэ­хащэгъагъэх, ахэм нэбгырэ 1000-м ехъу ащеджагъ. Ащ да­кIоу специалистхэм адыгабзэм изэгъэшIэнкIэ программэхэр, мобильнэ гуадзэхэр агъэхьазырыгъэх. Проектэу «Шъэожъые ыкIи пшъэшъэжъые анахь цIыкIу­хэм апае кушъэ орэдхэр» зыфиIорэм Iофэу дашIэрэр ыкIэм фэкIуагъ. Урысые ыкIи IэкIыб къэрал мультфильм цIэ­рыIохэм ащыщхэр зэрадзэкIыгъэх.
Республикэм имуниципальнэ образованиехэм илъэс къэс Iофыгъо гъэнэфагъэхэм япхыгъэ зэIукIэгъухэр, Iэнэ хъураехэр, бзэхэм язэгъэшIэнкIэ лагерьхэр, зэнэкъокъухэр ащы­зэхащэх. Мыекъуапэ хьакIэщхэр щызэхащэх, районхэми ащ фэдэ IофшIэкIэшIур ащагъэфедэщт.
ЛIыIужъу Адам къызэриIуагъэмкIэ, проект офисым къыдыхэлъытагъэу IофышIэ купхэм яIофшIэн зэшIуахы, адыгабзэм икъэухъумэнкIэ ыкIи изэгъэшIэнкIэ пшъэрылъэу щытхэр нахь шIогъэ ин хэлъэу гъэцэкIэгъэнхэм иамал ащ къеты. Гущы­Iэм пае, мыщ фэдэ лъэныкъо­хэмкIэ IофшIэныр зэшIохыгъэ мэхъу: адыгабзэм игъэфедэн иIофыгъохэм хэбзэгъэуцугъэ лъапсэ яIэныр, бзэм изэгъэшIэнкIэ адыгэ общественностым гъусэныгъэ дыряIэныр, еджапIэхэм ыкIи курсхэм бзэр ащызэгъэшIэгъэныр, езгъэджэщт­хэр гъэхьазырыгъэнхэр, культу­рэмкIэ, къэбарлъыгъэIэс амал­хэмкIэ ыкIи социальнэ хъытыухэмкIэ нахь игъэкIотыгъэу бзэм иIофыгъохэр алъыгъэIэсы­гъэнхэр.
ЗэIукIэгъум илъэхъан ЛIы­Iужъу Адам ягугъу къышIыгъ кIэу институтым къыдигъэкIыгъэхэм ащыщхэм, пстэуми апэу къыхигъэщыгъэр кIэлэцIыкIухэм апае адыгэ пшысэхэр зыдэт тхылъэу «Пхъонтэжъый» зыфиIорэр ары. КIэлэцIыкIухэмкIэ гурыIогъошIу зэрэхъущтым тетэу адыгэ IорыIотэ баим иамал­хэр агъэфедэхэзэ хъугъэ-шIэгъэ зэфэшъхьафхэу щыIэныгъэм къыхэхъухьэхэрэр ахэм къаIуа­тэх. Тхылъым дэлэжьагъэхэр институтым иIофышIэхэмрэ шIэ­ныгъэлэжьхэмрэ ары. Ахэм къы­далъытагъ пшысэхэм ядэIунхэм иамал яIэныр (макъэр кIэ­тыныр).
Республикэм и ЛIышъхьэ къызэрэхигъэщыгъэмкIэ, проект офисым иIофшIэн кIэухышIухэр фэхъух ыкIи Адыгеим икультурэ кIэн изы Iахьэу щыт адыгабзэм икъэухъумэнрэ ихэхъоныгъэ­рэ­кIэ IофшIэнэу агъэцакIэрэм мэ­хьанэшхо зэриIэр къыIуагъ.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.