Мыгъэрэ мэкъэтынхэр рагъэжьагъэх
УФ-м и Президент кIэщакIо зыфэхъугъэ лъэпкъ проектхэм ащыщэу «ПсэупIэр
ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу Iэрыфэгъу къэлэ щыIакIэ гъэпсыгъэным фэгъэхьыгъэм къыдыхэлъытагъэу псэупIэхэм яобщественнэ чIыпIэу зэтырагъэпсыхьащтхэр къыхахынхэу мэкъэтынхэр илъэс къэс зэхащэх.
Нэбгырэ мин 20-м къыщымыкIэу зыдэсхэр ары ащ хэлажьэхэрэр. Урысыем ишъолъырхэм зэкIэми онлайн шIыкIэм тетэу ар ащэкIо. АдыгеимкIэ къалэу Мыекъуапэ, поселкэхэу Инэмрэ Яблоновскэмрэ ары чIыпIэу гъэкIэжьын зищыкIагъэхэр къызщыхахыгъэхэр.
Мыгъэ мэкъэтынхэр мэлылъфэгъум и 21-м ежьагъэх, мэкъуогъум и 12-м зэфашIыжьыщтых. Адыгеим икъэлэ шъхьаIэ щашIырэ чылысэу «Успение Пресвятой богородицы» зыфиIорэм къыпэIулъ чIыпIэр, Хэгъэгу зэошхом хэкIодагъэхэм ясаугъэт зэхэт къызэлъиубытырэр ыкIи къалэм ирайон цIыкIоу «Восходым» иурамэу Шоссейнэм тет скверыр зэнэкъокъум хагъэлэжьэнхэу къырагъэуцуагъэх.
Къэлэ гъэпсыкIэ зиIэ Инэм псэупIэ коимкIэ къутырэу Суповскэмрэ къуаджэу БжыхьэкъоякIэмрэ якIэлэцIыкIу джэгупIэхэм цIыфхэм амакъэхэр афатыщтых.
Поселкэу Яблоновскэм иурамхэу Космическэмрэ Краснодарскэмрэ атет спорт площадкэхэр, пстэумкIи щы мэхъух, ары къыхахыгъэхэр.
ГъэрекIо мыщ тетэу цIыфхэм амакъэхэр атыхи МыекъуапэкIэ Лениным ыцIэ зыхьырэ площадыр,
Инэм псэупIэ коимкIэ поселкэу Дружнэм иурамэу Крестьянскэм тет кIэлэцIыкIу джэгупIэр, поселкэу Яблоновскэм иурамэу Кочубей ыцIэ зыхьырэм тет спорт площадкэр къыхахыгъэх. Ахэм мы уахътэхэм гъэцэкIэжьын IофшIэнхэр ащэкIох.