Мысатыу организациехэр къэралыгъо IэпыIэгъу зыкIэлъэIунхэ алъэ­кIыщт мазэр макIо. Шъугу къэдгъэ­кIыжьын, мэлылъфэгъум и 1-м къыще­гъэжьагъэу и 30-м нэс ащ ипIалъ. АщкIэ зэнэкъо­къур резгъэкIокIырэр граждан обществэм ихэхъоныгъэ тегъэпсыхьэгъэ грантхэр зыгощырэ Оператор шъхьафэу Адыгеим щыла­жьэрэр ары. Ащ ухэлэжьэным шапхъэ­хэр пылъых. Проектэу къэбгъэ­лъа­гъорэм социальнэ мэхьанэ иIэу, цIыфхэм хэхъоныгъэ ашIы­ным тегъэ­псыхьэгъэн фае. АщкIэ лъэныкъо шъхьаIэхэри гъэнэфагъэх: социальнэ фэIо-фашIэхэр, псауныгъэм икъэухъу­мэн, ным, унагъом, ныбжьыкIэхэм япроектхэм IэпыIэгъу афэхъугъэныр, тарихъ шIэжьыр къэухъумэгъэ­ныр ыкIи нэмыкIхэр.
— Мы уахътэм ехъулIэу грантым къыкIэлъэIугъэхэм япчъагъэ къэтIо­шъунэу щытэп, ар къызынэфэщтыр мэлылъфэгъум и 30-р ары. БлэкIыгъэ илъэсым, гущыIэм пае, лъэIу тхылъ 60 фэдиз къагъэхьыгъагъ. Мыгъэрэ къэралыгъо IэпыIэгъум пстэумкIи сомэ миллион 50 фэдиз къыдыхэлъытагъ. Пчъагъэм щыщэу миллион 35-р рес­публикэ бюджетым, 15-р къэралыгъом къатIупщы. Зыкъытфэзыгъазэрэмэ япроектхэр анахьэу зыфэгъэхьыгъэхэр ныбжьыкIэхэр хэкупсэу пIугъэнхэр, тарихъ шIэжьым икъэухъумэн, чIы­опсым икъызэтегъэнэн, гъэсэныгъэм ылъэныкъокIэ шIэныгъэгъозэ Iофтхьабзэхэр зэхэщэгъэнхэр, сэкъатныгъэ зиIэхэм IэпыIэгъу афэхъугъэныр, — къыщытаIуагъ мысатыу организациеу «Гра­ждан обществэм ихэхъоныгъэ тегъэ­псыхьэгъэ грантхэр зыгощырэ Опе­ратор» зыфи­Iорэм.
Мыр хэушъхьафыкIыгъэу шъолъырым зыщылажьэрэр 2024-рэ илъэсым къыщегъэжьагъ. АР-м IофшIэнымрэ социальнэ хэхъоныгъэмрэкIэ и Министерствэ ар епхыгъ. Грантхэм алъэныкъокIэ ащ ыгъэцакIэщтыгъэхэр джы Операторым зэшIуехых. Къэралыгъо ахъщэм кIэлъэIухэрэмкIэ мыщ фэдэ IофшIэныр нахь Iэрыфэгъоу ыкIи псынкIэу алъытагъ.
Мысатыу организациехэм ялъэIу­хэр зэкIэ мы мазэм аугъоихэмэ, зэфэхьысыжьхэр къэнэфэщтых, грантхэр зэратыщтхэм ацIэхэр къыраIощтых. ЗыгорэкIэ ащ хэлажьэ зышIоигъоу, ау ишIыкIэ зымышIэхэрэм е упчIэ зиIэхэм шъолъыр Операторыр IэпыIэгъу афэхъущт.
Анцокъо Ирин.