Адыгеим илIыкIохэр хэлэжьагъэх
Теннис цIыкIумкIэ зэнэкъокъоу «Предгорье Кубани» зыфиIорэм иапэрэ тур Апшеронскэ районым ипсэупIэу Николаенкэм щыкIуагъ.
Адыгеим икъэлэ шъхьаIэ нэбгыри 6-м къагъэлъэгъуагъ, ахэм спорт еджапIэу С. М. Джэнчатэм ыцIэ зыхьырэм зыщагъасэ.
Турнирыр лигищэу зэтеутыгъ: апшъэрэр, апэрэр ыкIи ятIонэрэр. Апшъэрэ лигэм зыщаушэты Бзаго Дамиррэ Ирина Славновамрэ. Мыхэм зэIукIэгъу хырых яIагъ, тIуми щырыщ къахьыгъ. Мы лигэм нэбгырэ 20 хэт, ахэр нэбгырэ пшIырыпшIэу гощыгъагъэх. ЯтIонэрэм теннисист 12 хэхьэ. Джырэ уахътэм апэрэ чIыпIэм щыт Мыекъуапэ къэзыгъэлъэгъорэ Пэфыф Суанда, джащ фэдэу ящэнэрэ чIыпIэм фэбанэ Дамир Бабабековыр. Апэрэ лигэм пэублэ турыр щаухыгъ, мыщ нэбгыри 7 хэтыгъ. ТекIоныгъэр къыдихыгъ станицэу Ханскэм щыщ София Рычковам, ащ ешIэгъуи 6 иIагъ, зэкIэри къыхьыгъэх. Ящэнэрэ чIыпIэр къыдихыгъ Бзаго Даринэ.
Турнирыр турищэу гощыгъэ, апэрэр жъоныгъуакIэм и 17-м аухыщт.