Урысые-китай зэфыщытыкIэхэм хэхъоныгъэ ­ягъэшIыгъэным къыды­хэлъытагъэу Адыгеим IофшIэным епхыгъэ гъусэ­ныгъэу Китаим дыриIэм нахь зырегъэушъомбгъу.

Ащ пае АР-м и ЛIышъхьэу КъумпIыл Мурат пшъэрылъ зэрафишIыгъэм тетэу Адыге­им илIыкIохэр зыхэт купыр мэлылъфэгъум и 6-м къы­щыублагъэу и 10-м нэс Китайскэ Народнэ Республикэм щыIагъ. Урысые Федерацием и Посольствэу КНР-м щыIэм ыкIи Урысыем сатыушIынымкIэ илIыкIохэм я IофшIапIэу Китаим щыIэм яIэпыIэгъу хэлъэу ащ кIуагъэх. ЛIыкIо купым хэтыгъэх Мыекъуапэ имэрэу Геннадий Митрофановыр, АР-м и ЛIышъхьэ Iэ­кIыб зэпхыныгъэхэмкIэ ыкIи инвестициехэмкIэ иIэпыIэ­гъоу Хьакъунэ Бэлэ, АР-м экономикэ хэхъоныгъэмкIэ ыкIи сатыумкIэ иминистрэ игуа­дзэу Андар Руслан, АР-м предпринимательствэм Iэпы­Iэгъу етыгъэнымкIэ и Гупчэ ипащэу КIыкI Артур.

Адыгеим илIыкIохэр КНР-м икъэлэ анахь инхэм — Гуанчжоу, Цюаньчжоу ыкIи Шанхай япромышленнэ гупчэшхо­хэм ащыIагъэх. ГущыIэм пае, Адыгеим илIыкIохэр экономикэ ыкIи технологическэ хэхъоныгъэшхо зышIырэ Гуанчжоу кIогъагъэх. Китаим илъэпкъ экономическэ хэхъоныгъэкIэ анахь мэхьанэшхо зэратырэ шъолъырхэм ар ащыщ, предприятие 500-м ехъу къалэм дэт. НахьыбэрэмкIэ ахэр зыфытегъэпсыхьагъэхэр машинэшIыныр, химическэ промышленностыр, металлургие шIуцIэр ыкIи шъо зэфэшъхьафхэр, шэкIымрэ щыгъынымрэ якъыдэгъэкIын, автомобильхэм ахалъхьэрэ пкъыгъохэм, медицинэм щагъэфедэрэ Iэмэ-псымэхэм якъыдэгъэкIын.
Гуанчжоу Адыгеим икIыгъэхэр зыщэIэхэм промышленностым ылъэныкъо­кIэ кIэу агъэфедэхэрэм защагъэгъозагъ, псышъохэр зэрытыщтхэм якъыдэгъэкIын­кIэ Iэмэ-псымэхэр къызщашIырэ предприятием щыIагъэх. КъыдэгъэкIын линиехэр автоматизацие шIыгъэнхэм епхы­гъэ проектхэр компанием пхырещых, технологиякIэхэм атетэу продукцием икъыдэгъэкIын нахьышIоу зэхэщэгъэным пае программэ зэфэшъхьафхэр къызыфегъэфедэх. Адыгэ Республикэм икIыгъэхэр Урысые Федерацием и Гене­ральнэ консулэу къалэу Гуанчжоу щыIэ Александр Черноусовым IукIагъэх.
Ащ ыужым къалэу Цюаньчжоу имэр зэрэригъэблэгъагъэхэм тетэу ащ щыIагъэх. Нафэу зэрэщытымкIэ, а къалэмрэ Мыекъуапэрэ блэгъэныгъэ зэфыщытыкIэхэр зэдыряIэх. Дунаим анахь компание инэу щалъытэри 5-мэ зыкIэ ащыщэу сабыйхэм акIадзэхэрэм якъыдэгъэкIын фэгъэзагъэм иIофшIэн зэрэзэхэщагъэм зыщагъэгъозагъ. Ащ нэмыкIэу бетоным хэшIыкIыгъэхэм якъыдэгъэкIын фыте­гъэпсыхьэгъэ IофшIапIэм иIофшIэн зэ­рэзэхэщагъэри зэрагъэлъэгъугъ.
Адыгеим икIыгъэхэм къалэм ипащэ­хэмрэ бизнесым илIыкIохэмрэ зэIукIэгъу адыряIагъ. 2018-рэ илъэсым зыкIэтхэгъэгъэхэ зэзэгъыныгъэм къыдыхэлъытагъэу яблэгъэныгъэ зэфыщытыкIэхэр джыри лъагъэкIотэн, нахь зарагъэу­шъомбгъун мурад зэряIэр лъэныкъуитIуми къагъэшъыпкъэжьыгъ.
ЗэIукIэгъум илъэхъан муниципалитетхэм япащэхэу Геннадий Митрофановымрэ Чжайшэнь Цайрэ анахьэу къыз­щыуцугъэхэр урысые-китай зэфыщы­тыкIэхэр гъэпытэгъэнхэмкIэ яшIуагъэ къы­зэрагъэкIощтыр, экономикэм, культу­рэм, гъэсэныгъэм ыкIи нэмыкI лъэныкъохэмкIэ язэдэлэжьэныгъэ бгъуитIумкIи федэ хэлъэу зэрэлъагъэкIотэщтыр ары. Чжайшэнь Цай къызэрэхигъэщыгъэмкIэ, къэлитIумэ ялIыкIохэр зэдэлэжьэныгъэм иIофыгъохэр нахь псынкIэу ыкIи нахь дэгъоу зэшIохыгъэ хъунхэмкIэ амалэу щыIэхэм къапкъырэкIых. Адыгеим икIыгъэхэр Китаим зэрэкIуагъэхэм джыри зэ къыгъэшъыпкъэжьыгъ Мыекъуапэрэ Цюаньчжоурэ язэблэгъэныгъэ тапэкIи агъэпытэн гухэлъ зэряIэр. Урысыемрэ Китаимрэ культурэм иилъэсхэм къады­хэлъытагъэу язэфыщытыкIэхэр нахь пытэ зэрэхъухэрэри къыхагъэщыгъ.
Геннадий Митрофановым гуфэбэныгъэ хэлъэу къызэрапэгъокIыгъэхэм пае къа­лэм ипащи ащ щыпсэухэрэми зэрафэразэр къыIуагъ. Мыекъуапэ имэр къызэрэхигъэщыгъэмкIэ, Адыгеим щыпсэу­хэрэм ыкIи бизнесым пылъхэм лъэныкъуитIу зэпхыныгъэхэр тапэкIи агъэпы­тэнхэ мурад зэряIэр зэдэгущыIэгъухэм къахэщыгъ.
Адыгеим илIыкIо купрэ Дэнэ шэкI гъогукIэ заджэхэрэ шъолъырым къыхиубытэрэ къалэхэм я Ассоциацие ипащэу, къалэу Цюаньчжоу и СатыушIэ палатэ пэщэныгъэ дызезыхьэрэ Чэнь Цансунрэ зэдэгущыIэгъухэр зэдыряIагъэх. Сатыу­шIынымрэ инвестициехэмрэ алъэныкъо­кIэ еплъыкIэу яIэхэр къызэфаIотагъэх, гъомылэпхъэшI лъэныкъомкIэ язэдэлэ­жьэныгъэ джыри нахь агъэпытэнымкIэ амалэу щыIэхэм къащыуцугъэх. ГущыIэм пае, Чэнь Цансун къызэриIуагъэмкIэ, Китаим ис цIыфхэм Урысыем къыдигъэ­кIырэ гъомылапхъэхэм осэшхо афашIы, ахэр зэрэдэгъухэр ренэу къыхагъэщы. Китаим анахь агу щырихьыхэрэм, анахь къызкIэупчIэхэрэм ащыщых цумпэ ­лъэпкъ зэфэшъхьафхэр, тыгъэгъазэм хашIыкIырэ дагъэр, лыр, пхъэшъхьэ-­мышъ­хьэхэм къакIафырэ псыр ыкIи нэмыкIхэр.
ЗэдэгущыIэгъухэм ялъэхъан лъэныкъохэр зэзэгъыгъэх нахьыбэрэ зэIукIэнхэу ыкIи бизнесымкIэ IофшIэкIэшIоу аIэкIэлъ хъугъэмкIэ зэкIэрыплъыжьынхэу. ИкIэухым УФ-м сатымукIэ илIыкIохэм я IофшIапIэ икъутамэу Китайскэ Народнэ Республикэм щыIэм ипащэу Сюмер Палкиным зэIукIэгъу дыряIагъ. Китаим къыщыдагъэкIыхэрэр нахьыбэу къаIэ­кIэхьанымкIэ ыкIи Адыгэ Республикэм ипродукцие Китаим нахьыбэу ыкIи нахь дэгъоу щыIукIынымкIэ амалэу щыIэхэм атегущыIагъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.