Урыс драмтеатрэу А. С. Пушкиным ыцIэ зыхьырэм щагъэуцугъэ спектаклэу «Капитаным ыпхъу» зыфиIорэр апэрэу къагъэлъэгъуагъ.

Билетхэр зэкIэ ащэфыгъа­гъэх, гъэхъэгъэшхо хэлъэу спек­таклыр кIуагъэ. Адыгеим и ЛIы­шъхьэу КъумпIыл Мурат, республикэм итворческэ интеллигенцие илIыкIохэр, Москва къикIыгъэ хьакIэхэр, Московскэ губернскэ театрэм иIофы­шIэхэр, а театрэм ипащэу Лариса Вильясте ыкIи нэмыкIхэр ащ еплъыгъэх.
Театральнэ искусствэр зикIа­сэхэр спектаклэу «Капитаным ыпхъу» зыфиIорэр къызагъэлъэ­гъощтым ашIуабэ шIэу ежагъэх ыкIи зэрэгугъагъэхэу ар къы­чIэкIыжьыгъ. Александр Пушкиным иповесть техыгъэ спектаклым мэхьанэшхо зиIэ Iофы­гъохэр — гукIуачIэр пытэн, цIы­фыгъэ, намыс пхэлъын зэ­рэфаем епхыгъэ Iофыгъохэр къыщыIэтыгъэх. Анахь чIыпIэ къинми укъызэкIэмыкIоным, уишэнкIэ узэмыокIыным, шъыпкъагъэ пхэлъыным къарыкIырэм спектаклым еплъыгъэхэр ри­гъэгупшысагъэх. Къэхъущтым ыгъэгумэкIыхэу, зы нэгъэупIэпIэгъу фэдэу къэгъэлъэгъоныр кIуагъэу еплъыгъэхэм алъытагъ.
Классическэ сюжет зиIэ спектаклыкIэм режиссерым хэкIыпIэ гъэшIэгъонхэр щигъэфедагъэх, IэпэIэсэныгъэ ахэ­лъэу актерхэм рольхэр къашIыгъэх.
Къырагъэблэгъэгъэ режиссе­рэу Александр Мурити Урыс драмтеатрэм иактерхэм ягъусэу спектаклым Iоф дишIагъ. Теат­рэмрэ киномрэ яурысые актер цIэрыIоу, УФ-м инароднэ артис­тэу Сергей Безруковыр спектаклым итын хэлэжьагъ. АР-м и Театральнэ зэхахьэ ипащэу Ацумыжъ Рустам къызэриIуагъэмкIэ, спектаклэу «Капитаным ыпхъу» зыфиIорэр зэрагъэуцугъэр «АртМастерс Регионы» зыфиIорэ зэнэкъокъухэм Iофы­шхоу ащызэшIуахыгъэм къыкIэ­кIуагъ. Мы проектым ишIуагъэ­кIэ Урысыем икъэлэ зэфэшъхьафхэм яспециалистхэм спектаклым Iоф дашIагъ: гримымкIэ художникэу Андрей Волосатых Пермь, композиторэу Кон­стантин Новгородскэр Москва, нэфынэр атегъэпсэгъэнымкIэ художникэу Владимир Козати Владикавказ къарыкIыгъагъэх.
Спектаклэ ужым республикэм и ЛIышъхьэ актерхэми, творческэ купми зэрафэразэр къы­Iуагъ, ащ фэдэ проектхэр шъо­лъырхэм язэпхыныгъэ игъэпытэн, театральнэ искусствэм республикэм зыщегъэушъомбгъугъэным зэрафэIорышIэхэрэр къыхигъэщыгъ. Культурэ кIэныр къэухъумэгъэным, ныбжьыкIэхэр нахьыбэу урыс литературэм пы­щэгъэнхэм мэхьанэшхо зэря­Iэр КъумпIыл Мурат хигъэунэфыкIыгъ.
«Лъэшэу сигуапэу спектак­лым сеплъыгъ. Режиссерымрэ актерхэмрэ IэпэIэсэныгъэшхо зэрахэлъым, Урыс драмтеатрэм щылэжьэрэ пстэури яIофшIэн зэрегугъугъэхэм яшIуагъэкIэ Пушкиным и Унэ непэ щыгуIэтыпIагъ, нэбгырэ пэпчъ культурэ проектышхом иIахь хэлъ фэдэу къыщыхъущтыгъ. Спектаклым тарихъ хъугъэ-шIагъэхэм нэмыкIынэкIэ таригъэплъыжьыгъ, ахэр цIыфхэм гурыIогъошIу къафишIыгъэх. Мыщ фэдэ спектакльхэм къаушыхьаты Адыгеим театрэм хэушъхьафыкIыгъэ фы­щытыкIэ зэрэщыфыряIэр ыкIи республикэм итеатрэхэр лъэгэпIэ инхэм зэранэсыгъэхэр. Ахэр къэухъумэгъэнхэм ыкIи хэхъоныгъэ ягъэшIыгъэным мэхьанэшхо яI. ТапэкIи проектыкIэхэм адедгъэтэшт, ахэм япхырыщын­кIэ ищыкIэгъэ амалхэр зет­хьа­щтых», — къыIуагъ КъумпIыл Мурат.
Пресс-зэIукIэр
Спектаклыр къызагъэлъэгъо мафэм АР-м и Театральнэ зэ­хахьэ пресс-конференцие щыкIуагъ.
Московскэ губернскэ театрэм ипащэу Лариса Вильясте, АР-м культурэмкIэ иминистрэу Аулъэ Юрэ, АР-м и Театральнэ зэха­хьэ ипащэу Ацумыжъ Рустам, режиссерэу Александр Мурити ащ хэлэжьагъэх.
Лариса Вильясте Адыгеим зыщыIэгъэ уахътэм Лъэпкъ те­атрэмрэ Урыс драматическэ театрэмрэ яIофшIагъэхэм нэ­Iуасэ зафишIыгъ. Ащ ялэжьакIэу ылъэгъугъэм ригъэшIыгъэ гу­пшысэхэмкIэ журналистхэм къа­дэгощагъ.
— Лъэпкъ театрэм тарихъ ыкIи культурнэ кIэныр зэригъэ­лъапIэрэр апэрэмкIэ хэзгъэу­нэфыкIы сшIоигъу. Сыхьатым къыкIоцI къагъэлъэгъогъэ Iоф­шIэн пычыгъом анахь осэ иныр фэзгъэшъуашэмэ сшIоигъу. ЛIэ­ужым ипIуныгъэ искусствэмкIэ зэрэзэшIуахырэм щэч хэлъэп, — къыIуагъ Лариса Вильясте.
— Театрэм цIыфыр епIу, щыIэныгъэм фегъасэ. Лъэхъаным диштэрэ къэгъэлъэгъонхэм Адыгеим и Театральнэ зэхахьэ Iоф адешIэ. АР-м культурэмкIэ и Министерствэ амалэу иIэмкIэ ащ IэпыIэгъу фэхъущт. Спектак­лыкIэу агъэуцугъэр къадэхъу­гъэу сэлъытэ. Режиссерым екIолIакIэу къыфигъотыгъэр, драматургым темэу ыштагъэр, артистхэм ярольхэр къызэрашIыгъэхэр шэпхъэшIухэм адештэ, — къы­Iуагъ Аулъэ Юрэ.
— Мыщ фэдэ зэхахьэхэр на­хьыбэу зэхэтщэнхэм мэхьанэшхо иI. Тиспектакльхэр алъэгъун­хэм фэшI цIыфхэр нахьыбэу къедгъэблэгъэнхэ фае. Московскэ губернскэ театрэм ипащэу Лариса Вильясте анахь театрэ цIэрыIохэу Урысыем итхэм ащыщым ипащ. Адыгеим и Теат­ральнэ зэхахьэ шэпхъэшIухэм адиштэу зэрэлажьэрэр едгъэлъэгъуныр типшъэрылъ шъхьэ­Iагъ. Актерхэм яIофшIагъэ рес­публикэм имызакъоу зэрэ Урысыеу ядгъэлъэгъун, зэлъядгъэшIэн фае. ТапэкIи зэнэкъо­къухэм тахэлэжьэщт, Адыгеим итеатрэхэр зэлъядгъэшIэщт, — къыIуагъ Ацумыжъ Рустам.
Къэбар жъугъэм иамалхэм ялIыкIохэм упчIабэ къатыгъ, журналистхэм зыгъэгумэкIхэрэм яджэуапхэри игъэкIотыгъэу агъотыжьыгъэх.
ЛIышэ Саниет, Лъэпшъыкъо Фатим.