Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къызэритыгъэмкIэ, къэралыгъо шъэфыр зымыухъумэхэрэм ыкIи къумалыгъэ зезыхьэхэрэм Урысыем и Уголовнэ кодекс ия 275-рэ, ия 276-рэ статьяхэм зигугъу къашIырэ уголовнэ пшъэдэкIыжь арагъэхьы, илъэс 20-м нэсэу хьапс атыралъхьэ.

Хэгъэгум къумалыгъэ дызэрахьагъэкIэ алъытэ:

1. шпионажым пыщагъэхэ (IэкIыб къэралыгъохэм якъулыкъухэм (ахэм яагентхэм) яхэбзэнчъэ разведывательнэ IофшIэн хэщагъэхэ зыхъукIэ;
2. къэралыгъо шъэфэу щыт къэбархэр IэкIыб къэралыгъом, дунэе е IэкIыб организацием е ахэм ялIыкIохэм заIэкIагъахьэхэкIэ;

3) Урысыем ищынэгъончъагъэ зэщызыгъэкъощт мылъку, техническэ, консультационнэ е нэмыкI IэпыIэгъу IэкIыб къэралыгъом, дунэе е IэкIыб организацием е ахэм ялIыкIохэм зарагъэгъотыкIэ;

4) пыим зыкъуахьэхэкIэ (IэкIыб къэралыгъом, дунэе е IэкIыб организацием идзэхэу Урысые Федерацием джэгъогъуныгъэ къыдызиIэхэм ахэтэу Iашэхэмрэ дзэ техникэмрэ къызщызфагъэфедэрэ Iэшэ зэIуупIэныгъэхэм, заохэм захэлажьэхэкIэ).

Урысыем ищынэгъончъагъэкIэ зэрар хъун зылъэкIыщт Iофтхьабзэхэм ашIэзэ ахэлажьэхэрэм Урысыем и Уголовнэ кодекс ия 275.1-рэ статья диштэу  илъэсиим нэсэу хьапс атыралъхьан алъэкIыщт.

Урысые Федерацием и Законэу 1993-рэ илъэсым бэдзэогъум и 21-м аштагъэу N 5485-1-р зытетэу «Къэралыгъо шъэфым ехьылIагъ» зыфиIорэм зэрэщыгъэнэфагъэмкIэ, къэралыгъо шъэфым халъытэхэрэр къэралыгъом къыгъэгъунэрэ къэбархэу дзэ, IэкIыб политическэ, экономическэ, разведкэ Iофхэм, оперативнэ-лъыхъон IофшIэным япхыгъэхэр ары. Урысые Федерацием ищынэгъончъагъэ зэрарышхо рахыгъэу алъытэ а къэтпчъыгъэхэм афэгъэхьыгъэ къэбарыр нэмыкI къэралыгъохэм е IэкIыб къэрал организацие горэм зыIэкIагъахьэкIэ.

Къэралыгъо шъэфым хахьэхэрэр Урысые Федерацием и Президент еухэсых. А спискэм хэхьэх дзэм, экономикэм, наукэм, техникэм, IэкIыб къэрал политикэм япхыгъэ къэбархэр.

Урысыем ищынэгъончъагъэ пэшIуекIоу IэкIыб къэралыгъом, дунэе  е IэкIыб организацием е ахэм ялIыкIохэм мылъку, техникэ, упчIэжьэгъу IэпыIэгъу шIыкIэ зэфэшъхьафхэмкIэ аратын алъэкIыщт.

БзэджэшIагъэр ухыгъэкIэ залъытэрэр ащ фэдэ IэпыIэгъур зигугъу къэтшIыгъэхэм аIэкIагъэхьэгъахэ зыхъукIэ ары.

Урысыем и Уголовнэ кодекс ия 276-рэ статья зэрэщыгъэнэфагъэмкIэ, къэралыгъо шъэфэу щымыт къэбархэр зэраIэкIагъахьэхэрэри шпионажым хэхьэх. Урысые Федерацием ищынэгъончъагъэ зэщызыгъэкъорэ къэбархэу IэкIыб разведкэм пшъэрылъ къызэрафишIыгъэм тетэу къаугъоихэрэр ары зигугъу къэтшIырэр.

Урысыем и Уголовнэ кодекс ия 275-рэ, ия 276-рэ статьяхэм зигугъу къашIырэ бзэджэшIагъэхэр зезыхьагъэм хэбзэ къулыкъухэм ащкIэ ежь-ежырэу игъом макъэ заригъэIукIэ ыкIи Урысые Федерацием чIэнагъэ нахьыбэрэ ымышIыным ар фэIорышIагъэ зыхъукIэ, уголовнэ пшъэдэкIыжь рагъэхьырэп.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу