Теннис цIыкIум ифе­дерацие ипрограммэу «Урысыем инеущрэ маф» зыфиIорэм къыдыхэлъытагъэу мы спорт лъэп­къымкIэ зэнэкъокъушхо Мыекъуапэ щызэха­щэщт.

Илъэси 8-м щегъэжьагъэу 18-м нэс зыныбжь спортсменхэм заушэтыщт. Турнирым хэлэжьэнхэу макъэ къагъэIугъ Краснодар ыкIи Ставрополь крайхэм, Курскэ хэкум, Къэбэртэе-Бэлъкъарым ыкIи Донецкэ Народнэ Республикэм ялIыкIохэм.
Адыгэ къэралыгъо университетым иордэунэу Кобл Якъубэ ыцIэ зыхьырэм щызэнэкъокъущтых (мэлылъфэгъум и 15 – 18-м). ПэшIорыгъэшъэу зэрагъэнэфагъэмкIэ, турнирым нэбгырэ 350-м нахь мымакIэу хэлэжьэщт.
Адыгэ Республикэр къагъэлъэгъощт Мыекъуапэ, Адыгэкъалэ, Красногвардейскэ, Кощхьэблэ ыкIи Тэхъутэмыкъое районхэм арыт спорт еджапIэхэм ялIыкIохэм.