Академическэ мэкъамэм ифестиваль
Непэ академическэ мэкъамэм ишъолъыр фестиваль Адыгэ Республикэм и Къэралыгъо филармоние къыщызэIуахыщт. Адыгэ Республикэм культурэмкIэ и Министерствэрэ республикэм и Концерт зэхахьэрэ Iофтхьабзэм кIэщакIо фэхъугъэх.
Программэу «Культурэм ихэхъоныгъ» зыфиIоу 2025 — 2027-рэ илъэсхэм ателъытагъэм къыдыхэлъытагъэу академическэ мэкъамэм ишъолъыр фестиваль я IV-рэу зэхащэ.
КъыткIэхъухьэрэ лIэужхэм яхэгъэгу шIу алъэгъоу пIугъэнхэм лъэпкъ академическэ музыкальнэ искусствэм хэхъоныгъэ ышIыным ар фытегъэпсыхьагъ. Академическэ музыкэм ныбжьыкIэхэр хэщэгъэнхэм, шъолъырхэм ыкIи лъэпкъ зэфэшъхьафхэм азыфагу илъ культурнэ зэпхыныгъэр гъэпытэгъэным фэIорышIэ. Илъэс къэс ащ мэкъэмакIэхэр хагъахьэ ыкIи Iофтхьабзэр нахь гъэшIэгъон зэрашIыщтым зэхэщакIохэр пылъых.
Адыгеим исимфоническэ оркестрэ зэлъашIэрэ оперэ зэфэшъхьафхэм япычыгъохэр къыригъэIощтых. ПстэумкIи произведение 14 программэм хахьэ.
ИскусствэхэмкIэ колледжым ихоррэ АР-м инароднэ артистэу, дирижерэу Аркадий Хуснияровымрэ программэр зэдагъэхьазырыгъ. Джащ фэдэу зэлъашIэрэ орэдыIоу Дарья Хумбинар фестивалым хэлэжьэщт, произведениищ къыригъэIощт.
Непэ сыхьатыр 7-м ыныкъом пчыхьэзэхахьэр рагъэжьэщт. Академическэ мэкъамэр зикIасэхэр республикэ филармонием рагъэблагъэх.