ХьакIэгъогъу Къэсэй Яхье ыкъор

РСФСР-м искусствэхэмкIэ изаслуженнэ IофышIэшхоу, зэлъашIэрэ адыгэ режиссерэу ыкIи театральнэ IофышIэу ХьакIэгъогъу Къэсэй идунай ыхъожьыгъ.
Къэсэй Яхье ыкъор щылэ мазэм и 30-м 1949-рэ илъэсым Тэхъутэмыкъуае къыщыхъугъ. Краснодар драматическэ театрэм истудие ыкIи культурэмкIэ Краснодар институтым режиссурэмкIэ иотделение,
театрэм, музыкэм ыкIи кинематографием якъэралыгъо институтэу Ленинград (Санкт-Петербург) дэтым драматическэ искусствэмкIэ истудие къыухыгъэх.
Адыгеим имызакъоу, ХьакIэгъогъу Къэсэй шъолъырыбэмэ ащыцIэрыIу, Краснодар, Налщык, Владикавказ, Сыхъум спектаклэхэр ащигъэуцугъэх, Адыгеим, Краснодар краим, Темыр Осетием ятеатрэхэм ярежиссер шъхьэIагъ. Апэрэ адыгэ художественнэ фильмэу «Гугъэм имэзах» зыфиIорэм ирежиссерыгъ.
Классикэм ыкIи непэрэ драматургием игъэкIотыгъэу Iоф адишIагъ, Лъэпкъ театрэм ишэн-хабзэхэр лъигъэкIотагъэх. ХьакIэгъогъум ыгъэуцугъэ спектаклэхэр Адыгеим и Лъэпкъ театрэ идышъэ хъарзынэщ хэхьагъэх.
2003 — 2005-рэ илъэсхэм АР-м культурэмкIэ и Министерствэ ипэщагъ. 2016 — 2021-рэ илъэсхэм АР-м и Лъэпкъ театрэ ихудожественнэ пэщагъ. Театральнэ искусствэм хэхъоныгъэ зэрэфишIыгъэм пае РСФСР-м и Апшъэрэ Совет и Президиум и Щытхъу тхылъ 1982-рэ илъэсым ХьакIэгъогъу Къэсэй къыфагъэшъошэгъагъ.
АР-м культурэмкIэ и Министерствэ ХьакIэгъогъу Къэсэй идунай зэрихъожьыгъэр гухэкI щыхъоу иунагъо, иIахьыл-благъэхэм афэтхьаусыхэ.
Тхьэм джэнэт лъапIэр къырет.