Урысыем и Следственнэ комитет Адыгэ Респуб­ликэмкIэ иследственнэ гъэIорышIапIэ иследст­веннэ отдел Урысые ­Федерацием илъэпкъ гвардие идзэхэм я Федеральнэ къулыкъу Адыгэ РеспубликэмкIэ и ГъэIорышIапIэ мылъкум игъэзекIонкIэ иотдел пэщэныгъэ дызезыхьэщты­гъэм фэгъэхьыгъэ уголовнэ Iоф къызэIуихыгъ.

УФ-м и Уголовнэ кодекс ия 286-рэ статья ия 3-рэ Iахь ипунктэу «е»-м къыдилъытэрэ бзэджэшIагъэр (ышъхьэкIэ ифе­дэхэм апае IэнатIэу ыIыгъыр къызфигъэфедагъ) зэрихьагъэу хъулъфыгъэм егуцафэх.
ЩынэгъончъэнымкIэ Федеральнэ къулыкъум Адыгэ Рес­публикэмкIэ и ГъэIорышIапIэ къаIэкIигъэхьэгъэ материалхэмкIэ уголовнэ Iофыр къаIэтыгъ.
ПэшIорыгъэшъэу зэрагъэунэфыгъэмкIэ, 2022-рэ илъэсым шэкIогъум Адыгеим и Росгвардие мылъкум игъэзекIонкIэ иотдел пэщэныгъэ дызезыхьэщтыгъэр зыкIэтхэжьыгъэ актыр зыфэгъэхьыгъагъэр шъолъыр гъэIорышIапIэм пае гъэстыныпхъэкIэ агъэфедэрэ пхъэр къа­IэкIигъэхьанымкIэ зэзэгъыныгъэ зэрэзэдашIыгъэр ары. Ау пхъэр нэужым къаIэкIагъахьэми хъу­нэу фэIо-фашIэхэр зыгъэцэкIэрэ организацием илIыкIо хъулъфыгъэр езэгъыгъагъ. Мылъ­кумкIэ пшъэдэкIыжь ежь ымы­хьыным пае организацием ипа­щэ пхъэр къымыщэми хъунэу ащ гуригъэIуагъ. Сыдэу щыт­ми, пхъэм ылъэныкъокIэ зэдашIыгъэ зэзэгъыныгъэу гъэ­цэкIагъэ мыхъугъэм пае ор­ганизациехэм яфитыныгъэхэмрэ яфедэхэмрэ укъуагъэ хъу­гъэх, сомэ мин 556-м ехъу гъэ­цэкIагъэ мыхъугъэ фэIо-фашIэхэм апае пкIэнчъэу атын фаеу хъугъэ.
Уголовнэ Iофым ылъапсэ изытет шъыпкъэ гъэунэфы­гъэным пае зэхэфын Iофтхьабзэхэр макIох, IэубытыпIэхэр зэфахьысыжьыщтых.
ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ипресс-къулыкъу