Адыгеим и ЛIышъхьэу КъумпIыл Мурат ­республикэм и Правительствэ зычIэт унэм зэIукIэгъу щыдыриIагъ Адыгэкъалэ ипащэу Хьачмамыкъо Азэмат, 2024-рэ илъэсым муниципалитетым социальнэ-экономикэ хэхъоныгъэм ылъэныкъокIэ Iофэу ышIагъэм икIэуххэр ащ къыщызэфихьысы­жьыгъэх.

Пащэм къызэриIуагъэмкIэ, къэлэ бюджетым ихахъохэр сомэ миллион 903-м ехъукIэ нахьыбэ хъугъэх. Джащ фэдэу къалэм ихахъохэри нахьыбэ зэрэхъугъэхэр ыкIи ахэр сомэ миллион 253,9-м зэрэнэсы­гъэхэр къыхигъэщыгъ. Мэрием муниципальнэ программэ 21-рэ ыкIи къулыкъу программи 4-рэ ыгъэцэкIэнэу щытыгъ. Бюджетым ихъарджхэр сомэ миллион 902,4-м нэсыгъэх.
ЗэIукIэгъум илъэхъан хэу­шъхьафыкIыгъэ дзэ операцием хэлажьэхэрэм ыкIи ахэм яунагъохэм адеIэгъэным иIофыгъо­хэр къаIэтыгъэх. Зэзэгъыныгъэ адэзышIыгъэхэм илъэсэу икIыгъэм сомэ миллиони 10-м шъхьа­дэкIыгъ зэхэубытагъэу муниципалитетым щаратыгъэр. Адыгеим и ЛIышъхьэ къыхигъэщыгъ а цIыф купхэм IэпыIэгъу ятыгъэнымкIэ икъоу лъэныкъохэр зэкIэ гъэцэкIагъэ зэрэхъухэрэм иуплъэкIун мэхьанэшхо зэриIэр.

«Ренэу унаIэ зытетын, уз­дэлэжьэн фэе Iофыгъошхоу ар щыт. ДзэкъулыкъушIэхэмрэ ахэм яунагъохэмрэ тишIуагъэ зэрядгъэкIырэр, тызэрафэгумэкIырэр зэхашIэн фае, уахътэ тешIэми а IофшIэным къыкIедгъэчы хъу­щтэп», — къыIуагъ КъумпIыл Мурат.
Хэгъэгум и Президент илъэсэу икIыгъэр Унагъом и Илъэсэу зэригъэнэфагъэм къыды­хэлъытагъэу Iофтхьэбзэ 34-м ехъу муниципалитетым щызэшIуахыгъ. ЦIыф куп гъэнэфа­гъэхэм ыкIи унагъохэм Iэпы­Iэгъу аратыгъ: сабыибэ зэрыс уна­гъохэм — чIыгу Iахьхэр, унэгъо ныбжьыкIэхэм — псэукIэ амалэу яIэхэр нахьышIу ашIыным пае сертификатхэр аратыгъэх, кIэлэ­цIыкIу къызыфэхъугъэхэм зэтыгъо ахъщэ IэпыIэгъу аIэкIагъэ­хьагъ ыкIи нэмыкI Iофтхьабзэ­хэр зэшIуахыгъэх.
Лъэпкъ проектыкIэхэу ыкIи къэралыгъо программэхэу экономикэмрэ социальнэ лъэны­къомрэ япхыгъэхэм ягъэцэкIэн зэрэкIорэм, предпринимательст­вэ цIыкIумрэ гурытымрэ, джащ фэдэу предприятие инхэм къэралыгъо IэпыIэгъоу аратырэм шIуагъэу къыкIакIорэм, къэлэгъэпсын Iофхэм ыкIи къалэм изэтегъэпсыхьан япхыгъэ проектхэр пхырыщыгъэ зэрэхъухэ­рэм шъхьафэу атегущыIагъэх.

Фэбэ къэкIуапIэхэм ягъэкIэ­жьынкIэ (ахэм япроцент 65-р лэжьагъэ) Iофэу зэшIуахыхэрэм афэгъэхьыгъэу Адыгэкъалэ ипащэ къыIотагъ. Программэу «Коммунальнэ инфраструктурэм къыхиубытэрэ псэуалъэхэр гъэкIэжьыгъэнхэр» зыфиIорэм къыдыхэлъытагъэу илъэсэу икIы­гъэм Iофтхьабзэхэр зэшIуахыхэу рагъэжьагъ. НепэкIэ кIэу фэ­бэрыкIопIэ километрэ 12,6-рэ фэдиз агъэпсыгъ.
Зэтегъэпсыхьан IофшIэнхэм адиштэу къызэрэхагъэщыгъэмкIэ, къэлэ цIыкIухэм уащыпсэун­кIэ щыIэкIэ-амал дэгъухэр цIыфхэм ягъэгъотыгъэнхэм те­гъэпсыхьэгъэ проект анахь дэгъум икъыхэхынкIэ Урысые зэнэкъокъоу кIуагъэм Адыгэ­къалэ ятIонэрэу текIоныгъэр къыщыдихыгъ. Грантэу сомэ мил­лион 81-рэ фэдиз хъурэр зыгъэпсэфыпIэ паркым ишIын ия 3-рэ чэзыу пэIуагъэхьащт. Зэнэкъокъум зэрэхэлэжьэщтхэмкIэ зичэзыу лъэIу тхылъыр агъэхьазырыгъах. Администрациемрэ ащ къыфэIорышIэрэ учреждениехэмрэ ащылажьэ­хэрэм Iофэу ашIагъэм пае зэ­ра­фэразэр КъумпIыл Мурат къыIуагъ.
ИкIэухым республикэм и ЛIышъхьэ анахьэу анаIэ зы­тыраригъэдзагъэр ТекIоныгъэшхом ия 80-рэ ыкIи Хэгъэгум иухъумакIо и Илъэсрэ яхъулIэу Адыгэкъалэ щызэрахьащтхэм языфэгъэхьазырынрэ язэхэщэнрэ зэрифэшъуашэу адэлэжьэгъэныр ары.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.