ФутболымкIэ Урысыем изэнэкъокъу иятIонэрэ лигэ икупэу «Б-м» хэт Мыекъопэ «Зэ­къошныгъэр» мы мафэхэм «Севастополь» дешIагъ.

ЗэIукIэгъур узIэпищэу кIуагъэ, ешIэгъур окIофэ ощхэу къещхыгъэми ар нахь гъэшIэгъон къы­шIыгъ. Командэхэм къэлапчъэм Iэгоуи 7 дадзагъ. Кобл Заид ятIонэрэ такъикъым пчъагъэр къызэIуихыгъ. УхъумэкIуитIу къы­зэринэкIи, къэлапчъэм метрэ 16-кIэ пэчыжьэу ар дэуагъ — 1:0. Я 32-рэ такъикъым хьакIэхэм яфутболистэу Редван Османовым пчъагъэр зэфэдиз ышIыгъ. Такъикъ заулэ тешIагъэу ащ пчъагъэм хигъэхъуагъ — 1:2. Ащ ыуж Делэкъо Аскэр пчъагъэр зэфэдиз ышIи, апэрэ таймыр 2:2-у аухыгъ.
ЯтIонэрэр хьакIэхэм нахь лъэ­шэу рагъэжьагъ. Я 49-рэ та­къи­къым «Севастополь» хэт Лев Потаповым пчъагъэр зэблихъугъ — 2:3. Я 61-рэ такъикъым тифутболистхэм джыри зэ къэлап­чъэм Iэгуаор дадзагъ, Никита Сергеевым пчъагъэр 3:3 ышIыгъ. Нэужым командэхэм Iэгуаор дадзэнымкIэ амалышIухэр яIагъэх, анахьэу Алихан Малкан­дуевым. Ау, футболым зэрэщаIоу, «о дэмыдзэмэ, о къыпфыда­дзэщт». Я 89-рэ такъикъым Владимир Скавыш тикъэлапчъэ Iэгуаор къыдидзагъ ыкIи 4:3-у хьа­кIэхэм текIоныгъэр къыдахыгъ.
Турищэу щыIагъэм ыуж «Зэ­къошныгъэр» я 12-рэ чIыпIэм щыт. КъыкIэлъыкIощт ешIэгъур мэлылъфэгъум и 9-м иIэщт, «Шъа­чэ-2-м» дешIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-2» — 9.
2. «Севастополь» — 9.
3. «Кубань Холдинг» — 7.
4. «Шъачэ-2» — 7.
5. «Динамо Ставрополь» — 6.
6. «Легион» — 6.
7. «Рубин Ялта» — 6.
8. «Победа» — 4.
9. «Спартак Налщык» — 3.
10. «Нарт» — 3.
11. «Астрахань» — 1.
12. «Зэкъошныгъ» — 0.
13. «Динамо-2» — 0.
14. «Ангушт» — 0.