Адыгеим и ЛIышъхьэу КъумпIыл Мурат зэIукIэгъу дыриIагъ УФ-м инароднэ артистэу Сергей Безруковым. Театрэмрэ киномрэ яактер АР-м и Театральнэ зэхахьэ къыригъэблагъи, тиреспубликэ къэкIонэу хъугъэ шъолъыр творческэ проектхэм атегущыIэнхэм пае.

IофшIэгъу зэIукIэгъум хэлэжьагъэх щынэгъончъэнымкIэ федеральнэ къулыкъум АР-мкIэ и ГъэIорышIапIэ ипащэу Михаил Кемеровыр, АР-м культурэмкIэ иминистрэу Аулъэ Юрэ, АР-м и Теат­ральнэ зэхахьэ ипащэу Ацумыжъ Рустам.
КъумпIыл Мурат Сергей Безруковым шIуфэс рихыгъ ыкIи къыхигъэщыгъ рес­публикэм итворческэ амалхэм заушъом­бгъуным пае шъолъырым итеатральнэ IофышIэхэр актер цIэрыIохэм аIукIэнхэм имэхьанэ зэрэиныр. Адыгеим и ЛIышъхьэ Сергей Безруковым къыфиIотагъ лъэпкъыбэ зыщыпсэурэ Адыгеим икультурэ зэрэбаир, сэнаущыгъэ ин зыхэлъ нэбгырэ пчъагъэмэ, творческэ купыбэмэ зэрарыгушхорэр. Ахэм Iоф ашIэным пае тишъолъыр ищыкIагъэр зэкIэ щарагъэгъоты.
Ямылъку-техническэ зытет гъэкIэжьыгъэным пае хэбзэ къулыкъухэм илъэс къэс ахэм ахъщэ афатIупщы. Пушкиным ыцIэ зыхьырэ унэр, концерт гъэлъэгъуа­пIэу «Налмэсыр», къоджэ псэупIэхэм культурэм ипсэуалъэхэу адэтхэр агъэ­кIэжьыгъэх. Купхэм зэкIэми ацIэхэр зытет автобусхэр арагъэгъотыгъэх.
Театральнэ зэхахьэми иIофшIэн нахь ыгъэчаныгъ, актер IэпэIэсэныгъэм хэгъэхъогъэным пае ащ щылажьэхэрэр зэнэкъокъу ыкIи проект зэфэшъхьафхэм ахагъэлажьэх. Ащ нэмыкIэу, КъумпIыл Мурат ипшъэрылъкIэ, республикэм иактер ныбжьыкIэхэр Москва щырагъэджэнхэмкIэ IофшIэным ижъотыпI. Джырэ уахътэм ащ фытегъэпсыхьэгъэ курсхэм агъэкIощтхэм яугъоин зэшIуахы, къэралыгъом итеатральнэ апшъэрэ еджэпIэ шъхьаIэхэм ащыщ зыщеджэщтхэр. Адыгеим и ЛIышъхьэ джащ фэдэу игугъу къышIыгъ Евгений Шварц илъэхъан Мыекъуапэ итарихъ теплъэ зэрэзэтырагъэуцожьыщтым.
«ТиреспубликэкIэ театрэм фыщытыкIэ хэушъхьафыкIыгъэ фытиI; бэшIагъэу зэтеуцогъэ театральнэ хэбзэ шIагъохэр къызэтедгъэнэнхэм ыкIи ахэдгъэхъоным тыпылъ. Тарихъ ыкIи культурнэ кIэныр тэгъашIо, зэлъашIэрэ тичIыгогъу драматургэу Евгений Шварц фэгъэхьыгъэ проектхэр пхырытэщых. ГукъэкI гъэшIэгъонхэу тикупхэм ятворчествэ зыкъызэIуезыгъэхыщтхэм, ахэзыгъэхъощтхэм тиIэпыIэгъу ядгъэгъотыщт. Ащ фэIорышIэх зэлъашIэрэ цIыфхэу сэнаущыгъэ зыхэлъ­хэм адашIырэ проектхэр, зэIукIэгъу­хэр. Джащ пае лъэшэу тигуап тыкъызэрэпIукIэрэр ыкIи тишъолъыр итеатральнэ искусствэ хэгъэхъогъэным тызэрэтегущыIэрэр. Уитворчествэ шIу зылъэгъоу Адыгеим исыр бэ. Республикэм ренэу тыкъыщыожэ. Узхэлэжьэрэ IофшIагъэхэр тшIогъэшIэгъоных ыкIи тыщэгугъы титеатрэхэр лъэгэпIакIэхэм анэзыгъэсыщт проектхэр зэдытиIэнхэм», — къыIуагъ КъумпIыл Мурат.

Фабэу къызэрэпэгъокIыгъэм пае рэзэ­ныгъэ гущыIэхэр ЛIышъхьэм къыфигъэзагъэх Сергей Безруковым. Хэбзэ къу­­лыкъухэм культурэм анаIэ къытетыным мэхьанэшхо зэриIэр ащ къыIуагъ.
«Адыгеим апэрэп сыкъызэрэкIорэр, мыщ ичIыопс гур къеIэты. Аужырэ уахътэм республикэр зэрэзэхъокIыгъэр нэ­рылъэгъу — хэхъоныгъэхэр ешIых, нахь зэтегъэпсыхьагъэ мэхъу, ижъырэ псэуа­лъэхэр зэтырагъэуцожьых. Анахь гъэ­шIэ­гъонхэм ащыщ Пушкиным ыцIэ зыхьырэ народнэ унэр. УегъэгушIо тарихъ мэхьанэ зиIэ пкъыгъохэр къызэрэзэтырагъэнагъэм. Театрэр зэхэзыщагъэ­хэм апсэ ахэм ахэлъ. Республикэм итеатральнэ зэхахьэ пэщэныгъэ дызезыхьэрэ ныбжьыкIэхэу гукъэкI гъэшIэгъонхэр зиIэхэми адесэгъаштэ. Теат­рэхэм зэкIэми хэхъоныгъэ яIэн фае нысхъэпэ театрэхэм ыкIи ныбжьыкIэ цIыкIухэм апае театрэм къащыублагъэу. ПIуныгъэр искусствэр ары зэрэзэшIопхынэу щытыр», — къыхигъэщыгъ Сергей Безруковым.
Адыгеим ипроект гъэшIэгъонхэм къа­дыригъэштэным зэрэфэхьазырыр актерым къыIуагъ ыкIи джырэблагъэ щыIэщт культурнэ Iофтхьабзэм — фестивалэу «Фабрика Станиславского» зыфиIорэм — шъолъырыр хэлэжьэнэу ригъэблэ­гъагъ. УФ-м культурэмкIэ и Министерствэ иIэпыIэгъоу ар мэкъуогъум и 8 — 20-м кIощт. ЗэхэщакIохэр — Москва Губернскэ театрэмрэ социокультурнэ проектхэм яхэхъоныгъэрэ IэпыIэгъу ягъэгъотыгъэнымрэкIэ Сергей Безруковым и Фондрэ. Урысыем ишъолъыр зэфэшъхьафхэм къарыкIыщт актер ныбжьыкIэхэмрэ театральнэ апшъэрэ еджа­пIэхэм ачIэсхэмрэ апае гъэсэныгъэ программэ шъуашэм илъэу ар мыгъэ рагъэкIокIыщт. Фестивалым хэлэжьэнхэу Адыгеим иактер ныбжьыкIи 6-мэ зыкъа­гъэлъэгъуагъ.
Театральнэ искусствэм ихэхъоныгъэ къытегущыIэзэ Сергей Безруковым къыхигъэщыгъ Адыгеим мы лъэныкъомкIэ амалышIухэр зэрэIэкIэлъхэр.

Джащ фэдэу ащ уасэ къыфишIыгъ АР-м и Театральнэ зэхахьэ и Урыс драматическэ театрэу А.С. Пушкиным ыцIэ зыхьырэм иаужырэ театральнэ IофшIагъэхэм ащыщ — Сергей Безруковыр хэлажьэзэ спектаклэу «Капитанская дочка» зыфиIорэр тыгъуасэ атыгъ. Мы мазэм и 9-м ар апэрэу къагъэлъэ­гъощт (спектаклым фэгъэхьыгъэ къэбарыр нахь игъэкIотыгъэу я 7-рэ нэкIубгъом ит).
Гастрольхэр, Сергей Безруковри ахэ­лажьэзэ, зэхэщэгъэнхэм иIофыгъуи зэIукIэгъум щытегущыIагъэх. КIэухым шъолъырым ыпашъхьэкIэ гъэхъагъэхэу ышIыгъэхэм ыкIи итеатральнэ искусствэ ихэхъоныгъэ иIахьэу хилъхьагъэм афэшI АР-м и ЛIышъхьэ актер цIэрыIом фигъэ­шъошагъ званиеу «Адыгэ Респуб­ликэм инароднэ артист» зыфиIорэр. Сергей Безруковым КъумпIыл Мурат рэзэныгъэ гущыIэхэр къыриIожьыгъэх ынаIэ къызэрэтыригъэтыгъэм, итворчествэ осэ ин къызэрэфишIыгъэм апае.
АР-м и ЛIышъхьэ ипресс-къулыкъу къытыгъэ къэбархэмкIэ
МэшIодз Саид