Адыгэ Республикэм и Къэралыгъо академическэ лъэпкъ ансамблэу «Налмэсым» изакъоу апэрэу Кремлым иор­дэунэ и Залышхо непэ концерт къыщитыщт. Уры­сыем щыпсэурэ лъэпкъ цIыкIухэм якультурэ кIэн къызэте­гъэнэгъэным ар фэлажьэ. Адыгэ лъэпкъым икультурэ, итарихъ къашъом ыбзэкIэ артистхэм къыраIотыкIы.

«Налмэсым» Iофтхьабзэм игъэкIотыгъэу зыфигъэхьазырыгъ. Ансамблэм икъэшъокIуи 100 тихэгъэгу исценэ шъхьа­Iэ къытехьагъ. Лъэпкъ кIэным икъэухъу­мэн зэрэфэлажьэхэрэр къагъэшъыпкъэ­жьы, Адыгэ Республикэм ихэхъоныгъэхэр къашъохэмкIэ къагъэлъагъо.
Купым ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан зэрэхигъэунэфыкIыгъэм­кIэ, «Тэры Урысыер» зыфиIорэ къэралыгъо программэм къыдыхэлъытагъэу Кремлым щыкIорэ Iофтхьабзэр гастрольхэм яапэрэ къэгъэлъэгъон хъущт. Ащ ыужкIэ «Росконцертым» зэзэгъыныгъэу дыриIэм къыдыхэлъытагъэу Урысыем икъалэхэу Муром, Нижний Новгород, Арзамас, Чебоксары, Димитровград, Кузнецк, Пенза программэу «ГъашIэм пхырыщыгъэу» зыфиIорэр къыщатыщт. Лъэпкъ къашъом искусствэм ибаиныгъэ къыреIотыкIы, еIэты, тикультурэ лъэпкъ зэфэшъхьафхэм алъегъэIэсы.
Лъэпкъ искусствэр хэгъэгум нахьы­шIоу щашIэным фэшI концертхэр зэхащэщтых. Ижъырэ къашъохэм къащегъэ­жьагъэу джырэ уахътэм нэсэу ансамблэм къышIыхэрэр зэхэпхъагъэхэу къа­гъэлъэгъощт. Ижъырэ адыгэ къа­шъор, лъэпкъ шъуашэр, купым иоркестрэ имэкъамэхэр сценэшхом зэрифэшъуашэу къыщагъэлъэгъощт.
Урысыем ис цIыф лъэпкъ зэфэ­шъхьафхэм адыгэ къашъохэр зэрашIогъэ­шIэгъоным уегъэгушIо ыкIи уегъэгушхо. Ащ ишIуагъэкIэ лъэпкъым итарихъ зэлъашIэ, ишэн-хабзэхэр ухъумагъэхэ мэхъу.
«Налмэсым» гъэхъагъэу ышIырэмкIэ Адыгеим ыцIэ лъагэу дунаим щеIэты. Ар хэгъэгум ымакъ, республикэм икультурэ инамыс.