БаскетболымкIэ Урысыем ичемпионат иапшъэрэ лигэ щешIэрэ Мыекъопэ «Динамо-МГТУ-р» республикэм икъэлэ шъхьаIэ щыIукIагъ зэнэкъокъум икомандэ анахь лъэшэу «Динамэм» (Уфа). Мыхэм ыпэкIэ зэдыряIэгъэ зэIукIэгъур уфимцэхэм ахьыгъ, пчъагъэр 81:50.

Мыекъуапэ щыкIогъэ ешIэгъум ипэублэ тибаскетболистхэм дэгъоу зыкъыщагъэлъэгъуагъ. Апэрэ такъи­къ­­хэм къащегъэжьагъэу «Динамо- МГТУ-р» ыпэкIэ илъыщтыгъ, ухъумэнри дэгъоу ыгъэцакIэщтыгъ. Ау хьа­кIэхэр ащ къезэгъыгъэхэп, яешIакIэ рагъэхъугъ ыкIи апэрэ едзыгъор 15:18-у ахьыгъ. ЯтIонэрэм ахэр хэп­шIы­кIэу нахь щылъэшыгъэх, очко 16-кIэ тикомандэ ыпэ ишъыгъэх. «Динамо-МГТУ-м» бэрэ Iэгуаор чIинэщтыгъ, ащ къыкIэлъыкIоу апэрэ кIэлъэны­къор 28:44-у шIуахьыгъ. Ящэнэрэ едзыгъом ипэубли хьакIэхэм дэгъоу зыкъы­щагъэлъэгъуагъ. Апэрэ такъикъхэм къащегъэжьагъэу ахэм очкохэр рагъэкъущтыгъ. ЕшIапIэм ит баскетболистхэр бэрэ зэрэзэбла­хъухэрэм ишIогъэшхо къакIощтыгъ. Пчъагъэр — 46:68. ЗэIукIэгъум еплъы­нэу къэ­кIуагъэхэм яшIуагъэкIэ аужырэ такъи­къипшIым бысымхэм яешIакIэ рагъэ­хъугъ, очко 22-у къазэрате­кIо­щтыгъэ­хэм щыщэу къэнагъэр 10 ныIэп. Ащ къыхэкIыкIэ Уфа икомандэ итренер шъхьаIэ тайм-аут ыштагъ. Мы гъэхъа­гъэм ыуж «Динамо-МГТУ-м» ащ нахьыбэ фызэшIокIыгъэп, 69:82-у хьакIэхэм текIоныгъэр къыдахыгъ.
ЗэIукIэгъум иешIэкIо анахь дэгъоу къыхагъэщыгъэхэр: хьакIэхэм — Владимир Фоменкэмрэ (очко 19) Данила Донсковымрэ (15), бысымхэм — Александр Нахимовыр (очко 21-рэ).
Чемпионатым я 5 — 8-рэ чIыпIэхэр щызыIыгъхэм тикомандэ янэкъокъущт, я 5-рэ чIыпIэм фэбэнэщт.