Лъэс зекIонымкIэ Iофтхьабзэу «Гъэмафэм ипэгъокIэу» зыфиIорэр республикэм икъэлэ шъхьаIэ щыкIуагъ ыкIи ащ нэбгыри 190-рэ хэлэжьагъ. Ащ къыкIэлъыкIоу Мыекъуапэ физическэ культурэмкIэ ыкIи спортымкIэ и Комитет Урысые Iофтхьабзэу «ЩыIэныгъэм екIурэ лъэбэкъу мини 10» зыцIэм хэ­лэжьэнхэу регъэблагъэх.

Ар псауныгъэм и Дунэе мафэ фэгъэ­хьыгъ. Общественнэ органи­зациеу «Лига здоровья нации» зэхищэрэ марафоным къэралыгъом щыпсэурэ цIыфхэр зэреп­хых, япсауныгъэ агъэпытэным фещэх.
Мыщ хэлэжьэн гухэлъ зиIэхэр Мыекъуапэ игупчэу «Зэкъошныгъэм» мэлылъфэгъум и 6-м пчэдыжьым сыхьатыр 9-м щызэрэугъоищтых, сыхьатыр 10-м ягъогу техьащтых, Iофтхьабзэр зыщаухыщтыр къэлэ паркым дэт арт-псэуалъэу «МыIэрыс» зыфиIорэм дэжь. Зипсауныгъэ зыгъэпытэ зышIоигъохэр зэкIэ зэхэщакIохэм рагъэблагъэх. Ащ пае общественнэ организациеу «Лига здоровья нации» зыфиIорэм иофициальнэ сайтэу «ligazn.ru/10000» зыфиIорэм зыщышъутхын шъулъэкIыщт. Лъэ­бэкъу мини 10 къэзыкIухэрэм электроннэ сертификатхэр аратыщтых.