Абхъазым и Президентэу Бадра Гунба иIэнатIэ зэрэIухьагъэм фэгъэхьыгъэ Iофтхьабзэм Адыгеим и ЛIышъхьэу КъумпIыл Мурат хэлэжьагъ. Адыгэ Республикэм илIыкIохэм ахэтыгъэх Урысыем IофшIэнымкIэ и ЛIыхъу­жъэу МэщбэшIэ Исхьакъ, Адыгеимрэ Краснодар краимрэ ямуфтиеу Къэрдэн Аскэрбый.

А Iофтхьабзэм хэлэжьагъэх Урысые Федерацием и Президент и Администрацие ипащэ иапэрэ гуадзэу Сергей Кириенкэр, Урысыем ишъолъырхэм япащэхэр, Абхъазым блэгъэныгъэ къыдызиIэ хэгъэгухэм ялIыкIохэр.
КъумпIыл Мурат къош республикэм ипащэ зэрэхадзыгъэм пае фэгушIуагъ, Адыгеимрэ Абхъазымрэ лIэшIэгъубэ хъугъэу къошныгъэ зэфыщытыкIэхэр, культурэмрэ нэмыкI лъэныкъохэмрэкIэ зэпхыныгъэхэр зэрэзэдыряIэхэр къыхигъэщыгъ. Абхъаз Республикэу лIэшIэгъу­бэ къызэпызычыгъэ культурэ бай, ижъы­рэ хэбзэ-зэхэтыкIэ дахэхэр зиIэм Ады­геим щыпсэухэрэми гуфэбэныгъэ фыряI ыкIи агъэлъапIэ.
«Шъуиреспубликэ къыщыхъурэ пстэуми Адыгеир ренэу ынаIэ атетэу алъэплъэ, гъэхъагъэу шъу­шIыхэрэм ащэгушIукIы, къош абхъаз лъэпкъым лъэхъэнэ гумэкIыгъоу ыкIи ушэтыпIэу къыфыкъокIы­хэрэмкIи ишIуагъэ регъэ­кIы. Адыгеимрэ Абхъазымрэ ащыпсэурэ цIыфхэм ижъыкIэ къыщегъэжьа­гъэу блэгъэныгъэ­рэ цыхьэ зэфэшIыныгъэрэ азыфагу илъ. Ахэр дэгъоу зэрэзэгурыIохэрэм имызакъоу, лъэныкъо пстэумкIи язэдэлэжьэныгъэ джыри нахь зэрагъэпытэщтым ыуж итых. Ащ фэдэ къошныгъэ зэфыщытыкIэхэр тапэкIи нахь зэрэпытэщтхэм, нахь зызэраушъом­бгъущтым сицыхьэ телъ», — къы­Iуагъ Адыгэ Респуб­ликэм и ЛIышъхьэ.
Адыгеим и ЛIышъхьэ къызэрэхигъэщыгъэмкIэ, Абхъазым щыпсэурэ цIыфхэм Бадра Гунба цыхьэшхо зэрэфашIырэм лъапсэ фэхъугъэр республикэм ыпашъхьэ гъэхъагъэу щыриIэхэр, илъэсыбэ хъугъэу Iофэу ышIэрэм кIэухышIухэр зэрэфэхъухэрэр, экономикэм илъэныкъо пстэухэмкIи зэхъокIыныгъэшIухэм афытегъэпсыхьэгъэ гъогур пхырищыным, игупсэ республикэ джыри нахь зэтегъэ­псыхьагъэ хъуным гуетыныгъэ зэрэфыриIэр ары.

КъумпIыл Мурат къызэриIуагъэмкIэ, Абхъазым социальнэ-экономикэ лъэныкъомкIэ амал инхэр иIэх, экономикэмкIэ, пстэуми анахьэу зекIонымкIэ ыкIи инфраструктурэм ишIынкIэ хэкIыпIэ дэгъухэр иIэх. Урысые Федерацием товарэу IэкIигъахьэрэми хэпшIыкIэу нахь зеушъомбгъу.
«Iо хэлъэп, непэ Абхъазыр ищы­Iэныгъэ ихэхъоныгъэкIэ чэзыукIэм хэхьагъ, ащ пшъэрылъ шъхьа­Iэу иIэр игъэхъагъэхэр джыри нахь ыгъэпытэжьынхэр, хэ­дзакIохэр къызэрэщыгугъы­хэрэр къыгъэшъыпкъэжьынхэр, рес­публикэм илъ щыIакIэм епхыгъэ Iофыгъо шъхьаIэхэр зэшIо­хы­гъэнхэр ары. Лъытэныгъэ зыфэ­сшIырэ Бадра Зураб ыкъор! Адыгеим щыпсэухэрэм ацIэкIэ сыгу къыздеIэу сыпфэлъаIо Абхъазым и Президент къэралыгъо IэнэтIэшхом узщыIутыщт лъэ­хъаным шIуагъэ къытэу уипшъэ­рылъхэр бгъэцэкIэнхэу, уимурад уфэкIонымкIэ гуетныгъэу пхэ­лъым Абхъаз Респуб­ликэм хэхъоныгъэ ышIынымкIэ ишIуагъэ къы­зэрэкIощтым, цIыфхэм ящыIакIэ нахьышIу зэрэхъущтым фытегъэпсыхьэгъэ Iоф­тхьабзэхэр гъэхъагъэ хэлъэу зэрэзэшIопхыщтхэм тицыхьэ телъ», — къыIуагъ Адыгеим и ЛIышъхьэ.
КъумпIыл Мурат Президентэу хадзыгъэм псауныгъэ пытэ иIэнэу, IофшIэнымкIэ гъэхъагъэхэр ышIынхэу, къош абхъазхэр мамырэу, щыIэкIэшIу яIэу псэунхэу афэлъэIуагъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.