Псауныгъэр къэухъумэгъэнымкIэ язэдэлэжьэныгъэ лъагъэкIуатэ

Адыгеим иврач-специалистхэм ябригадэ Абхъазым къикIыжьыгъ. Ащ хэтхэм тхьамэфитфым къыкIоцI Гудаут районым иеджапIэхэм ыкIи икIэлэцIыкIу IыгъыпIэхэм ачIэсхэм япсауныгъэ ауплъэкIугъ.
Республикэм икIыгъэ бригадэм хэхьагъэх: травматолог-ортопедыр, педиатритIу, психиатрэр, уролог-врачыр, ЛОР-врачыр, хирургыр. Адыгеим икIыгъэ командэм игъусагъэх къалэу Саратов къикIыгъэхэ неврологыр, гинекологыр, эндокринологыр, Тамбов щыщ офтальмологыр.
ПэшIорыгъэшъ медицинэ уплъэкIунэу врачхэм зэрахьагъэхэм якIэуххэр Абхъаз Республикэм псауныгъэр къэухъумэгъэнымкIэ и Министерствэ занкIэу агъэхьыщтыгъ. Нэужым ахэм ахэплъэнхэшъ, ищыкIагъэ хъумэ ятIонэрэ едзыгъоу джыри уплъэкIунхэр афызэхащэнхэм е сымэджэщхэм ачIагъэгъолъхьанхэм ар фытегъэпсыхьагъ.
Врачхэм акIуачIэ зэхэлъэу рагъэкIокIыгъэ диспансеризацием ыкIи уплъэкIун зэфэшъхьафхэм яшIуагъэкIэ кIэлэцIыкIу мини 2-м ехъумэ япсауныгъэ изытет зэрагъэшIагъ. Тиспециалистхэм яIофшIагъэ рэзэныгъэ тхылъхэмкIэ зэрэхагъэунэфыкIыгъэм нэмыкIэу, кIэлэцIыкIухэр къазэрэфэразэхэр къизыIотыкIырэ сурэтшIыгъэхэр къаратыгъэх.
— ЯщыкIэгъэ медицинэ уплъэкIунхэр кIэлэцIыкIухэм арагъэкIугъ, ахэм ащыщхэм дагъохэр къахагъэщыгъэх, зэряIэзэщтхэр афагъэнэфагъ. ЯпсауныгъэкIэ щыкIагъэ зиIэ кIэлэцIыкIу 701-рэ агъэунэфыгъ, нэбгырэ 667-мэ узхэр апэрэу къахагъэщыгъ, — къыIуагъ министрэу Мэрэтыкъо Рустем.
Шъугу къэтэгъэкIыжьы Адыгеим иврачхэр партиеу «Единэ Россием» зэхищэгъэ Iофтхьабзэу «Псауныгъэм имэшIоку» зыфиIорэм шышъхьэIум къыщегъэжьагъэу зэрэхэлэжьагъэхэр ыкIи ащ къыдыхэлъытагъэу Геническэ районым зэрэщыIагъэхэр. Мэзищым къыкIоцI нэбгырэ мини 10 ауплъэкIугъ. Ахэм ащыщэу 1300-р кIэлэцIыкIух, операцие 35-рэ ашIыгъ. Зышъхьэ къезыхьыжьэжьыгъэхэмрэ нэмыкI чIыпIэ агъэкощыгъэхэмрэ IэпыIэгъу ягъэгъотыгъэныр мэхьанэшхо зиIэ лъэныкъохэм ащыщ. Волонтерхэр, предпринимательхэр, общественнэ IофышIэхэр, республикэм иорганизацие зэфэшъхьафхэм аIутхэр зышъхьэ къезыхьыжьэжьын фаеу хъугъэхэм атегъэпсыхьэгъэ Iофтхьабзэхэм чанэу ахэлажьэх, Донбасс, Херсон хэкум арысхэм, Адыгеим щыщ дзэ къулыкъушIэхэу хэушъхьафыкIыгъэ дзэ операцием хэлажьэхэрэм шIушIэ IэпыIэгъоу алъагъэIэсыщтым иугъоин яIахь хашIыхьэ.
Сурэтыр: АР-м и ЛIышъхьэ ипресс-къулыкъу
- ВКонтакте
- РћРТвЂВВВВВВнокласснРСвЂВВВВВВРєРСвЂВВВВВВ
- Telegram