Къэралыгъом и Президентэу Владимир Путиным пшъэрылъ къызэришIыгъэм тетэу Урысыем ишъолъырхэм яхэнэрэ Дунэе Iофтхьабзэу «ШIэжьым и Чъыгхат» зыфиIорэр ащэкIо. Адыгеири мыщ чанэу хэлажьэ.

ЗэкIэмкIи агъэтIысхьанэу агъэнафэрэр чъыг миллион 27-рэ — Хэгъэгу зэошхом илъэ­хъан фэхыгъэ нэбгырэ пэпчъ ишIэжь ыкIи хэушъхьафыкIыгъэ дзэ опе­рацием лIыхъужъныгъэ щызезыхьагъэхэм апай.
Мы илъэсым Iофтхьабзэм имэхьанэ нахь ин – ТекIоныгъэш­хом ия 80-рэ илъэс зыщыдгъэ­мэфэкIырэм къэралыгъом ишъо­лъыр пстэуми, IэкIыбыми шIэжь чъыгхэр ащагъэтIысхьащтых.
«ШIэжьым и Чъыгхатэ» къыхиубытэу тыгъуасэ Мыекъуапэ ипарк бзыфым игъэтIысыжь 80 щагъэтIысхьагъ. Iофтхьабзэм хэлэжьагъэх Мыекъуапэ ипащэу Геннадий Митрофановыр, АР-м и Къэралыгъо Совет – Хасэм и Тхьаматэ игуадзэу, Урысыем и ЛIыхъужъэу Цэй Эдуард, Мые­къуапэ инароднэ депутатхэм я Совет итхьаматэу Джарымэкъо Азмэт, мэзхэмкIэ гъэIорышIапIэм ипащэу Былымыхьэ Рэщыд, АР-м иветеранхэм я Совет ипащэу Къоджэ Аслъан, Мыекъуапэ иветеранхэм я Совет ипащэу, республикэм икъэлэ шъхьаIэ ипащэ игуадзэу Юрий Томчак, фондэу «Хэгъэгум и УхъумакIо­хэр» зыфиIорэм ишъолъыр къу­тамэ ипащэу ПIатIыкъо Аслъан, юнармейцэхэр, кIэлэцIыкIухэмрэ ныбжьыкIэхэмрэ яурысые движениеу «Движение первых» зыфиIорэм хэтхэр, Росгвардием илIыкIохэр, волонтерхэр, студентхэр, еджакIохэр.

— Мы Iофтхьабзэр — тятэжъ пIашъэхэм лIыгъэу зэрахьагъэм, миллион 27-у Хэгъэгу зэошхом хэкIодэгъэ нэбгырэ пэпчъ лъы­тэныгъэу фэтшIырэм ятамыгъ. ТичIыпIэгъухэр мы Iофтхьабзэм чанэу къызэрэхэлажьэхэрэр къы­хэзгъэщымэ сшIоигъу. ШIэжьым цIыфхэр зэрепхых, зыкIыныгъэмрэ хэгъэгум шIулъэ­гъуныгъэ фыряIэу ныбжьыкIэхэр къэтэджынхэмрэ афэIорышIэ, — къыIуагъ Геннадий Митрофановым.