Мэлылъфэгъум и 1-м къыщегъэжьагъэу унэгъо ипоте­­кэмкIэ нэмыкIхэр зыщыпсэугъэхэ унэр джы пщэ­фын плъэкIыщт. Мыщ фэдэ зэхъокIыныгъэхэм къахи­убытагъэ-хэр унакIэхэр макIэу зыщашIырэ къалэхэр ары.

Хэбзэгъэуцугъэм пылъ шапхъэхэмкIэ, зэхъокIыныгъэхэр зылъыIэсыгъэхэр къатыбэу зэтет унитIум къемыхъоу зыща­гъэуцурэ къалэхэр ары. Ащ унэу къащыпщэфыщтыр зашIыгъэр илъэс 20-м къехъу хъущтэп. ЗэрагъэнэфагъэмкIэ Урысыем икъалэхэм япроцент 80-р ащ дештэх. АдыгеимкIэ ахэм ахэхьэ Адыгэкъалэ. Къэлэ администрацием тызэрэщигъэгъозагъэмкIэ, мы шапхъэхэм адиштэрэ къатыбэу зэтет унэ 18 Адыгэ­къалэ дэт. Зы унэм фэтэр 40 къыдыхэ­лъытагъ, адрэхэр тIокI-тIокIых. Арышъ, зыгорэм ыщэжьын ыгу къэкIымэ, унэгъо ипотекэмкIэ зыщэфы зышIоигъохэм къызфагъэфедэн алъэкIыщт.
Унэгъо ипотекэм иамалыкIэхэр къыз­фэзгъэфедэшъущтхэр унагъохэу зы­ныбжь илъэсиблым нэсэу кIэлэцIыкIухэр зэ­рысхэр ары. ЧIыфэ штэнымкIэ процентыр унэ ашIыгъакIэу, апэрэу ащэфырэм пылъым фэдиз — проценти 6-м нэсы. Арэу зыхъурэм, ащ фэгъэзэгъэ къулыкъухэм къызэралъытагъэмкIэ, хэбзэгъэу­цугъакIэм Iоф зыщишIэрэ къалэхэм ащыпсэухэрэм программакIэм ишIуагъэ­кIэ процент 30-кIэ нахь пыутэу псэупIэхэр ащэфышъущтых.
Анцокъо Ирин.