Пневматическэ IашэмкIэ щэрыоным и Урысые первенствэ ыкIи щэрыонымкIэ Урысые зэнэкъокъухэр Мыекъуапэ щыкIуагъэх. Зыныбжь илъэс 19-м емыхъугъэ спортсменхэм заушэтыгъ.

Зэнэкъокъухэр гъэшIэгъонэу, узыIэпащэу рекIокIыгъэх. Щэры­онымкIэ республикэ спорт еджапIэу С. Г. Алифиренкэм ыцIэ зыхьырэм зыщызыгъасэхэрэм гъэхъэгъэшIухэр ашIыгъэх. Анна Андращук, Мария Бушуевам ыкIи Арина Калнинам команднэ зэнэкъокъухэм джэрз медальхэр къащахьыгъэх. ХагъэунэфыкIырэ чIыпIэм фэбэнэнхэм фэшI Волгоградс хэкум илIыкIохэм 16:12-у атекIуагъэх. Санкт-Петербург икомандэ ятIонэр, текIоныгъэр къыдэзыхыгъэхэр Краснодар краим испортсменкэхэр ары.
Унэе зэнэкъокъухэм республикэм икъэлэ шъхьаIэ къэзыгъэлъэгъогъэ нэбгыритIу къащыхэщыгъ. Анна Андращук тыжьын медаль къыфагъэшъошагъ, Мыекъуапэ щыщ Мария Бушуевам ящэнэрэ чIыпIэр къыдихыгъ.