МэфипшIым къыкIоцI пневматическэ IашэмкIэ щэрыоным и Урысые первенствэу зыныбжь илъэс 19-м шIомыкIыгъэ кIалэхэр ыкIи пшъашъэхэр зыхэлэжьагъэхэр, джащ фэдэу щэрыонымкIэ Урысые зэнэкъокъухэу зыныбжь илъэс 19-м нэмысыгъэ кIалэхэм ыкIи пшъашъэхэм зызщаушэтыгъэхэр Адыгеим щыкIуагъэх.

Спорт Iофтхьабзэхэм къэралыгъом ишъолъыр 40-м къарыкIыгъэ спортсмен 420-м ехъу, джащ фэдэу судья 40 ахэлэжьагъэх. Тишъолъыр икомандэ спорт­смен 16 хэхьагъ — пшъэшъэ 13-рэ кIэли 3-рэ. Адыгеим икомандэ Урысыем ипервенствэ ящэнэрэ чIыпIэр къыщыдихыгъ. Урысые зэнэкъокъухэм типшъа­шъэхэу Анна Андращукрэ Мария Бушуевамрэ я 2-рэ ыкIи я 3-рэ чIыпIэхэр къащахьыгъэх.
«Псауныгъэр гъэпытэгъэным нахь чанэу пылъ шъолъырхэм илъэс заулэ хъугъэу Адыгеир ащыщ. Республикэм щыпсэу­хэрэм япроцент 60 фэдиз физическэ культурэм ыкIи спортым апыщагъэх.
Ащ фытегъэпсыхьэгъэ инфраструктурэр шъолъырым щытэгъэкIэжьы, къалэхэм ыкIи къо­джэ псэупIэхэм спорт псэолъа­кIэхэр ащытэшIых, ахэм ящыкIэгъэ псэуалъэхэр ыкIи оборудованиер ятэгъэгъоты.
Спорт лъэпкъ зэфэшъхьафхэм заушъомбгъуным, кIэлэцIыкIухэр ыкIи ныбжьыкIэхэр зэнэкъо­къухэм ахэлэжьэнхэм фэщэгъэнхэм тынаIэ тетэгъэты. АдыгеимкIэ анахь мэхьанэшхо зиIэ спорт лъэпкъхэм ащыщ щэрыоныр. ЩэрыонымкIэ республикэ спорт еджапIэу С.Г. Алифиренкэм ыцIэ зыхьырэм лъэны­къуиплIыкIэ нэбгыри 142-мэ зыщагъасэ. Мы аужырэ илъэси 5-м къэралыгъом щызэхащэгъэ зэнэкъокъухэм ахэм гъогогъу 50-м ехъурэ хагъэунэфыкIырэ чIыпIэхэр къащыдахыгъэх.
Мэхьанэшхо зиIэ зэнэкъокъухэр республикэм щырагъэкIокIых. Мы мафэхэм щэрыонымкIэ Адыгеим щыкIуагъэхэри ахэм зэу ащыщых.
Тиспортсмен ныбжьыкIэхэм ыкIи ахэм ятренерхэм сафэгушIо, тапэкIи гъэхъагъэхэр ашIынхэу, пшъэрылъэу зыфа­гъэуцужьыхэрэр щыIэныгъэм щыпхыращынхэу афэсэIо» — къащитхыгъ Адыгеим и ЛIышъхьэ исоциальнэ нэкIуб­гъохэм.