Теннис цIыкIумкIэ Къыблэ федеральнэ шъолъырым изэнэкъокъу гъэтхапэм и 25-м къыщегъэжьагъэу и 30-м нэс къалэу Ростов-на-Дону щыкIуагъ. Зыныбжь илъэс 14-м емыхъугъэ кIалэхэр ыкIи пшъашъэхэр, зэкIэмкIи нэбгырэ 85-рэ, ащ хэлэжьагъэх.

Адыгэ Республикэр спортсмени 9-мэ къагъэлъэгъуагъ. Нэбгыри 7-р Мыекъуапэ щыщых, тIур Тэхъутэмыкъое районым ипсэупIэу Яблоновскэм илIыкIох.
ТикIалэхэм якъэгъэлъэгъонхэмкIэ тагъэгушIуагъ. Апэрэу Адыгеим икомандэ ящэнэрэ чIыпIэр къыдихыгъ. Артем Вариводинымрэ Адам Матюшинымрэ зэгъусэхэу зэнэкъокъум хэлэжьагъэх ыкIи финалныкъом ихьанхэм пэблэгъагъэх. Ау финалым щешIэгъэхэ Краснодар краим испортсменхэу Даниил Казарцевымрэ Кирилл Амосовымрэ къатекIуагъэх, пчъагъэр — 2:3.
Унэе зэнэкъокъухэр пштэмэ, Артем Вариводиным я 17-рэ чIыпIэр къыдихыгъ (зызыушэтыгъэр нэбгырэ 45-рэ), Ирина Славновар я 24-рэ хъугъэ.