Гъэтхапэм и 24-р — жъэгъэузым пэуцужьыгъэным и Дунэе маф. Ащ епхыгъэу зэпахырэ узым ебэныгъэным фэгъэхьыгъэ пресс-зэIукIэ жъэгъэузым пэуцужьыгъэнымкIэ Адыгэ республикэ клиническэ диспансерэу Шышъхьэ Долэт ыцIэ зыхьырэм щыкIуагъ.

Iофтхьабзэм хэлэжьагъэх диспансерым, общественнэ псауныгъэмкIэ ыкIи медицинэ профилактикэмкIэ Адыгэ республикэ Гупчэм яспециалистхэр, республикэ ыкIи къэлэ къэбарлъыгъэIэс амалхэм ялIыкIохэр. Фтизиатрическэ ыкIи зэхэт Iэзэным алъэныкъокIэ икIыгъэ илъэс IофшIэным изэфэхьысыжьхэм, къэкIощт илъэсым пшъэрылъэу агъэнэфагъэхэм къэзэрэугъоигъэхэр ащагъэгъозагъэх.
Урысые Федерацием фэдэу, Адыгэ Республикэми жъэгъэузымкIэ эпидемио­логие Iофхэм язытет зыпкъитыныгъэ хэлъ нахь мышIэми, пчъагъэхэм джыри уагъэрэхьатынэу щытэп. Жъэгъэузыр тхьабылхэм яорэ зэпахырэ уз. Псауныгъэр къэухъумэгъэ­нымкIэ Дунэе организацием къызэритырэмкIэ, лIэныгъэр къызхэкIырэ узи 10-м ар ащыщ. Зэрэдунаеу тштэмэ, илъэс къэс нэбгырэ миллиони 10-м мыр къяузы, миллион 1,5-м ядунай ахъожьы.
— Къэралыгъо программэу «Псауныгъэр къэухъумэгъэным хэхъоныгъэ егъэшIыгъэныр» зыфиIорэм ишIуагъэкIэ жъэгъэузыр пасэу къыхэгъэщыгъэнымкIэ уплъэкIунхэр зэхэтщэнхэ тэлъэкIы. Ыпэрэ илъэсхэм ягъэпшагъэмэ, ар къы­зэузыхэрэм япчъагъэ хэхъуагъэп, ау а пчъагъэри узым зиушъомбгъунымкIэ щынагъо къеты. 2024-рэ илъэсым ­Адыгэ Республикэм мы узыр нэбгыри 136-мэ яIэу щагъэунэфыгъ, 2023-рэ илъэсым нахь мэкIагъ — нэбгыри 117-рэ. Ахэм ащыщэу нэбгыри 122-м апэрэу къахагъэщыгъ, 125-р — шъолъырым ренэу щэпсэух, 3-р IэкIыб къэралыгъохэм ащыщхэу мыщ исых. Джащ фэдэу пчъа­гъэу зигугъу къэтшIырэм хэхьэрэ нэбгыри 4-р «БОМЖ» зыфаIохэрэм аха­лъытэ, хэушъхьафыкIыгъэ купэу хьапсым къыдэкIыжьыгъэу нэбгыри 2, адырэ нэ­бгырэ 14-м ядунай захъожь ужым зауплъэкIухэм, жъэгъэузыр яIагъэу къы­чIэкIыгъ. Узыр анахьыбэу къызщыха­гъэщыгъэхэр Джэджэ ыкIи Мыекъопэ районхэр, къалэу Мыекъуапэ, — къы­Iотагъ диспансерым иврач шъхьаIэу Мамый Нурбый.
Илъэс зэкIэлъыкIохэм жъэгъэуз зиIэу агъэунэфырэ кIэлэцIыкIухэм ­япчъагъэ бэп зэрэзэхъокIырэр. ­Нэбгырэ мини 100-м телъытагъэу зы хъугъэ-шIагъ е тIу. 2024-рэ илъэсым кIэлэцIыкIуи 4-мэ къахагъэщыгъ, ыпэрэ илъэсми джащ фэдиз. Урысые гурыт къэгъэлъэгъонхэм ялъытыгъэмэ, ар мэ­кIэ дэд.

Пресс-зэIукIэм къыщыгущыIэгъэ врач пстэуми зэрэхагъэунэфыкIыгъэмкIэ, мы уз щынагъор хэмыужъыныхьэзэ пасэу къыхэбгъэщымэ, нахь гъэхъужьыгъошIу мэхъу. Арышъ, япсауныгъэ игъом лъыплъэнхэм, илъэсым зэ флюорографие арагъэшIыным врачхэр къыфэджагъэх.
Iофтхьабзэу
«Ромашкэ фыжьыр»
Хабзэ зэрэхъугъэу, илъэс къэс Мые­къуапэ игупчэ флюорографие зыщашIын алъэкIыщт автомобилыр къеуцо. Ащ ишIуагъэкIэ ныбжь зэфэшъхьаф зиIэу республикэм щыпсэухэрэм уплъэкIунхэр ашIынхэ алъэкIы. Жъэгъэузым зы­щеIэ­зэхэрэ диспансерым иврач шъхьаIэ игуадзэу Валерий Терещенкэм къызэ­ри­IуагъэмкIэ, мыгъэ нэбгырэ 48-мэ флю­орографиер акIугъ.
Iэшъынэ Сусан.