Мы мафэхэм общественнэ движениеу «Адыгэ Хасэм» ныбжьыкIэхэм зэнэкъокъу гъэшIэгъон афызэхащагъ. «Адыгэ квиз» зыфиIорэ грантэу къалэжьыгъэм къыдыхэлъытагъэу ар агъэпсыгъ.

Зэнэкъокъур уцугъуитIоу гощыгъагъ. Муниципальнэм текIоныгъэ къыщыдэзыхыгъэ купхэм адыгабзэмкIэ шIэны­гъэу яIэр, сэнаущыгъэу ахэлъыр къагъэлъэгъуагъ.
Къэзэрэугъоигъэхэм шIуфэс къари­хыгъ Адыгэ Хасэм итхьаматэу ЛIымыщэкъо Рэмэзан.
— Муниципальнэ уцугъом зэрифэшъуа­шэу зыкъыщыжъугъэлъэгъуагъ, адыгабзэм дахэу, губзыгъэу шъузэрэдэлажьэрэр нафэ, ащкIэ лъэшэу тышъуфэраз. Ны­дэлъфыбзэм шъутемыукIытыхьэу шъуры­гущыI, шIэныгъэу шъуиIэхэм ахэжъу­гъахъу, — къариIуагъ ащ.
АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч мыщ фэдэ ныбжьыкIэхэр респуб­ликэм зэриIэм зэрэрыгушхорэр, ныдэлъфыбзэм нахь лъапIэ зэрэщымыIэр къыхигъэщыгъ ыкIи ащ икъызэтегъэнэн, икъэухъумэн афэгъэхьыгъэ Iофтхьабзэхэр Адыгэ Хасэм зэрэзэхищэрэмкIэ зэрафэразэр къыIуагъ. АР-м и ЛIышъхьэу КъумпIыл Мурат мы Iофыгъом лъэшэу ынаIэ зэрэтетыр ыкIи амалэу щыIэмкIэ IэпыIэгъу зэрафэхъурэр къыкIигъэ­тхъыгъ.

— Шъощ фэдэ ныбжьыкIэхэр тиIэмэ, бзэм хэхъоныгъэхэр зэришIыщтым тицыхьэ телъ. Ар жъугъэлъапIэ, «тищыкIэгъэщтэп» шъумыIо, ныдэлъфыбзэр умышIэмэ, уасэ уиIэщтэп. ЛъэгэпIэ инхэр шъуиныдэлъфыбзэкIэ шъушIынэу тэгугъэ, — къыIуагъ АР-м лъэпкъ Iоф­хэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамал­хэмкIэ и Комитет итхьаматэу Шъхьэ­лэхъо Аскэр.
Зэнэкъокъум купи 6 хэлэжьагъ, ахэр Теуцожь районымкIэ Гъобэкъое гурыт еджапIэм, АдыгэкъалэкIэ Лъэустэн Юсыф ыцIэ зыхьырэ гурыт еджапIэу N 3-м, Тэхъутэмыкъое районымкIэ Пэнэхэс гурыт еджапIэм, Красногвардейскэ районымкIэ Улэпэ гурыт еджапIэм, Шэуджэн районымкIэ Хьатыгъужъыкъое гурыт еджапIэм, Кощхьэблэ районымкIэ Фэдз гурыт еджапIэм къарыкIыгъэ кIэлэеджа­кIох.
Зэнэкъокъум пылъ шапхъэхэр къафиIотагъ ыкIи ар зэрищагъ Адыгэ Хасэм иныбжьыкIэ къутамэ ипащэу Уджыхъу Айтэч. Апэрэ уцугъор упчIэ-джэуап джэгукIэу кIуагъэ, лъэпкъ тарихъымкIэ шэн-хабзэхэмкIэ, культурэмкIэ, IорIуа­тэмкIэ ныбжьыкIэхэм шIэныгъэу яIэр къагъэлъэгъуагъ. Адыгабзэм фэгъэхьыгъэ усэхэр къаIуагъэх, лъэпкъ шэн-хабзэхэр къизыIотыкIырэ къэгъэлъэгъонхэр къашIыгъ.
Израиль къикIыгъэу джурт лъэпкъым щыщэу Андрей мы мафэхэм Мыекъуапэ щыIэу тефагъ, игуапэу ар Iофтхьабзэм къеблэгъагъ. КIэлэ ныбжьыкIэм шIогъэшIэгъонэу, ежь игукъэкIыкIэ адыгабзэр зэрегъашIэ, ар къыушыхьатэу къэзэрэугъоигъэхэм усэ къафеджагъ.
Зэфэхьысыжьхэм къызэрагъэлъэгъуа­гъэмкIэ, анахь Iушэу ыкIи губзыгъэу зыкъэзыгъэлъэгъуагъэр Гъобэкъое гурыт еджапIэм къикIыгъэ купыр ары. Ащ хэтых Iэшъынэ Аидэ, СтIашъу Заирэрэ Самирэрэ, ЛIыхъукIэ Тамилэ, Уджыхъу Динарэ.
— Мыщ фэдэ зэнэкъокъухэм тикIэлэеджакIохэр ахэлэжьэнхэм мэхьэнэ­шхо иI, яшIэныгъэхэр къызэрагъэлъагъорэм имызакъоу, ахэм ахагъахъо, адыгабзэм, адыгэ культурэм нахь афэщагъэ мэ­хъух. Амалэу щыIэмкIэ тахэлажьэ, кIэлэеджа­кIохэм ашIогъэшIэгъон. ПэшIорыгъэшъэу зэнэкъокъум зыфэдгъэхьазырыгъ, нартхэм афэгъэхьыгъэ къэбархэр нахь игъэкIотыгъэу зэдгъэшIагъэх ыкIи ахэр къафэфедэжьыгъэх, ащ фэгъэхьыгъэ упчIабэ хэтыгъ. Къин къафэхъугъэ упчIэхэри къахэкIыгъэх, анахьэу адыгэ орэдыжъхэм афэгъэхьыгъэхэр, ау джэ­уап тэрэзхэр агу раубытагъэх, кIэу бэ зэрагъэшIагъэр, — къыIуагъ кIэлэегъа­джэу ягъусэгъэ Тхьаркъохъо Сусанэ.
ДЕЛЭКЪО Анет.
Сурэтхэр: Адыгэ Хасэм иныбжьыкIэ къутам.