Росгвардием и ГъэIорышIапIэ икъутамэу Адыгеим щыIэм икомандэ Урысые Федерацием идзэ лъэпкъ гвардие и Къыблэ шъолъыр дзюдомкIэ ичемпионат щатекIуагъ.

Зэнэкъокъур къалэу Армавир — Урысыем и ЛIыхъужъэу Геннадий Трошевым ыцIэ зыхьырэ Гупчэм щыкIуагъ
Шъолъыр гъэIорышIапIэхэу ыкIи дзэ частьхэу Краснодар краим, Астраханскэ, Волгоградскэ, Рос­тов хэкухэм, Адыгэ Республикэм, Къалмыкъым ыкIи Къырым ащыIэхэм якомандэ 28-рэ, зэкIэмкIи дзэкIолI ыкIи къулыкъушIэ нэбгыри 140-рэ зэнэкъокъухэм ахэлэжьагъ. Яонтэгъугъэ елъытыгъэу купиблымэ ахэм яухьазырыныгъэ ащаушэтыгъ.
Командэхэм язэнэкъокъу хэлажьэхэрэм яапэрэ куп пштэмэ, Росгвардием и ГъэIорышIапIэ икъутамэу Адыгеим щыIэм икомандэ дышъэ медалыр къыди­хыгъ. ЯтIонэрэ чIыпIэр Ростов хэкум щыщхэм ахьыгъ, Къырымрэ Севастопольрэ ягвардейцэхэм джэрз медальхэр къалэ­жьыгъэх.
Адыгеим икъулыкъушIэхэр купиплIымэ дэгъоу ащыбэнагъэх. Килограмм 81-рэ къэзыщэчыхэ­рэм якуп апэрэ чIыпIэр къыщыдихыгъ полицием истаршэ лейтенантэу Мэрэтыкъо Адам. Килограмми 100 къэзыщэчыхэрэмкIэ, полицием икапитанэу Шъхьэ­фыжь Аскэр ятIонэрэ хъугъэ. Полицием имладшэ сержантэу Бэгъ Тимур ыкIи Ахътэо Ерстэм килограмм 73-рэ ыкIи 90-рэ къэ­зы­щэчыхэрэм зябэнхэм джэр­зэ медальхэр командэм къыфа­хьыгъ.
ТекIоныгъэ къыдэзыхыгъэхэм кубкэхэр, медальхэр ыкIи щытхъу тхылъхэр къаратыгъ.