Гандбол командэу ЦСК-м къикIэу къэбар гушIуагъо къытлъыIэсыгъ. Урысыем ичемпионкэхэм якомандэ рагъэблэгъагъ (охътэ гъэнэфагъэкIэ) гандболымкIэ Мыекъопэ еджапIэм зыщызыгъэсэгъэ, спортымкIэ мастерэу Диана Казихановар.

Дианэ илъэс 22-рэ ыныбжь, спортеджапIэу С. М. Джэнчатэм ыцIэ зыхьырэм зыщигъэхьазы­рыгъ. Тренер-кIэлэегъаджэу Никита Голуб Iоф зыдишIэгъэ пшъэ­шъэжъыер Урысыем ипервенствэу 2002-рэ илъэсым къэхъугъэхэр зыхэлэжьагъэхэм мызэу, мытIоу къащыхагъэщыгъ, 2018-рэ илъэсым «АГУ-Адыифым» хэтэу урысые Суперлигэм хэлэжьагъ, ащыгъум ащ илъэс 16 ыныбжьыгъэр. 2023-рэ илъэсым игъэмафэ «Кубань» зыфиIорэ командэм хэхьагъ. Мы ешIэгъу лъэхъаным а командэм хэтэу Дианэ ешIапIэм такъикъ 1076-рэ итыгъ, Iэгоо 68-рэ къэлапчъэм дигъэфагъ, ежь ишIуагъэкIэ гъогогъу пчъагъэрэ зыхэт командэм Iэгуаор къэлапчъэм дидзагъ. Арышъ, Дианэ командэ лъэшым зэрэрагъэблэгъагъэр къылэжьыгъэ шъыпкъ, ыпэкIэ лъыкIотэгъэнымкIэ лъэбэ­къушIу.
— СэркIэ мы командэм хэтхэм сызэрадешIэщтыр сисэнаущыгъэ къэзгъэлъэгъонымкIэ амалышIоу щыт. ТапэкIэ «Кубань» хэтыгъэ пшъэ­шъэжъыехэу Лера Собкало ыкIи Катя Левчинар синэ­Iуасэх, Юля Баевам «АГУ— Адыифым» сыдыхэтыгъ. Командэм сишIуагъэ езгъэкIыным пае сиамал къыхьырэр сшIэщт, — къыIуагъ Диана Казихановам.