Урысыем голболымкIэ и Первенствэ Адыгэ Республикэм икомандэ ащытекIуагъ.

Зэнэкъокъухэр Москва хэкум, къалэу Раменское щыкIуагъэх. «Спортивная школа адаптивного спорта паралимпийского и сурдлимпийского резерва» зыфиIорэм зыщызыгъэсэхэрэ Юрий Курочкиныр, Михаил Дрыгиныр, Илья Кошелевыр ыкIи Даниил Семчуковыр ялэгъухэм къахэщыгъэх.

Мы спорт лъэпкъымкIэ анахь лъэш шъолъырибл зэнэкъокъум имедальхэм афэбэнагъэх. Адыгэ Республикэм икомандэ текIоныгъэр мыщ къыщыдихыгъ. ТикIалэ­хэр финалым зыщыIукIэгъэхэ Москва хэкум икомандэ 15:8-у къышIуахьыгъ. Анахь ешIэкIо дэгъоу зэнэкъокъум къыщыхахыгъ Мыекъуапэ щыщ Юрий Курочкиныр. Командэр зэнэкъокъум фи­гъэхьазырыгъ тренерэу Елена Минаевам.
Пшъэшъэжъыехэм медаль къа­хьынымкIэ мэкIэ дэд зыщыкIагъэ­хэр. Ящэнэрэ чIыпIэм фэбанэхэзэ зыIукIэгъэхэ Нижегородскэ хэкум икомандэ пчъагъэр 3:8-у къатекIуагъ, яплIэнэрэ хъугъэх.