Адыгеим и ЛIышъхьэу КъумпIыл Мурат АР-м и УплъэкIокIолъытэкIо палатэ итхьаматэу Павел
Стаценкэм Iоф­шIэгъу зэIукIэгъу дыриIагъ. Ар зыфэгъэхьы­гъагъэр 2024-рэ илъэсым уплъэкIокIо къулыкъум Iофэу ышIагъэм икIэух­хэр ары.

Павел Стаценкэм къызэри­IуагъэмкIэ, илъэсэу икIыгъэм Палатэм уплъэкIун Iофтхьэбзэ 12 зэшIуихыгъ, ахэм ащыщэу 6-р – АР-м и ЛIышъхьэ кIэщакIо зэрэфэхъугъэм тетэу, 1-р — АР-м и Къэралыгъо Совет — Хасэм пшъэрылъ къызэрафи­шIыгъэм тетэу. Iофтхьабзэхэр зыфэгъэхьыгъагъэхэр хэбзэгъэу­цугъэхэр, шъолъыр проектхэмрэ къэралыгъо программэхэмрэ япхырыщын икIэуххэр, бюджет трансфертхэр аIэ къызэрэра­гъэхьагъэхэр ары. УплъэкIунхэм лъэныкъо 31-рэ къызэлъау­бытыгъ.
УплъэкIун Iофтхьабзэхэм ялъэхъан сомэ миллиарди 4,4-рэ фэдиз гъэфедагъэ зэрэхъугъэр ыкIи сомэ миллиарди 2 фэдиз баланс уасэ зыпэIухьагъэр агъэунэфыгъ.
Ащ нэмыкIэу 2024-рэ илъэсым палатэм эксперт-аналитическэ Iофтхьэбзэ 13, шэпхъэ ыкIи нэмыкI правовой актхэм япроектхэм япхыгъэ экспертизэ 24-рэ зэхищагъ.
Докладым къытегущыIэзэ республикэм и ЛIышъхьэ къызэ­рэхигъэщыгъэмкIэ, Урысыем и Президент къыгъэнэфэгъэ пшъэ­рылъхэр шIогъэ икъу къатэу зэшIохыгъэнхэмкIэ мылъкум епхыгъэ уплъэкIунхэм ыкIи лъэпкъ гухэлъхэр пхырыщыгъэн­хэм мэхьанэшхо яI.
«Макроэкономическэ лъэныкъохэмкIэ Адыгеим хэхъоныгъэ ешIы. Илъэс къэс бюджетым ихахъохэри нахьыбэ мэхъух, ахэм адакIоу социальнэ мэхьанэ зиIэ проектхэм япхырыщынкIи амалэу щыIэхэм нахь заушъомбгъу. Бюджет сомэ пэпчъ амал зэриIэкIэ нахьыбэу федэ къыкIэкIон ыкIи зыпэIухьэрэр нафэу щытын фае», — къыхи­гъэщыгъ КъумпIыл Мурат.
АР-м и УплъэкIокIо-лъытэкIо палатэ итхьаматэ къызэриIуагъэмкIэ, анахь пшъэрылъ шъхьа­Iэу палатэм иIэхэм ащыщ щыкIагъэхэр къыхэгъэщыгъэнхэмкIэ ыкIи дэгъэзыжьыгъэнхэмкIэ IэпыIэгъу тэрэз ятыгъэныр. Ащ фэдэ уплъэкIунэу зэхащэрэ пэпчъ епхыгъэ отчетхэр ащ исайт къырегъахьэх.
АР-м и ЛIышъхьэ зэIукIэгъум икIэуххэм ателъытагъэу мылъку уплъэкIунымкIэ IофшIэным илъэ­ныкъо шъхьаIэхэм ащыщхэм анаIэ тыраригъэдзагъ. Ахэм зы­кIэ ащыщых бюджет къэкIуа­пIэхэр зыпэIухьан фаехэм зэра­нэмысыхэрэм ыкIи шIогъэ икъу къызэрамытырэм къахэкIэу зэ­рарэу бюджетым ыхьыгъэр фэлъэгъужьыгъэныр, финанс къулыкъухэм яIофышIэхэм яIэпэIэсэныгъэ нахь зыкъегъэIэтыгъэныр.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.