Анахь чэфхэмрэ акъыл чан зиIэхэмрэ язэхахьэ игупчэу Адыгеир хъущт.

КВН-м и Къыблэ лигэу зэхащэщтыр республикэм къыщызэIуахыщт. Я 36-рэ Дунэе фес­тивалэу Шъачэ щыкIуагъэм ар щырахъухьагъ. «Краснодар и Гупч» ыкIи «Хы ШIуцIэр» зыфиIорэ лигэхэу илъэс пчъагъэ хугъэу щыIэхэм мыщ фэдэ зэхъокIыныгъэшIухэр яхьатыр.
Адыгеим, Краснодар ыкIи Ставрополь крайхэм, Ростов хэкум, Темыр Кавказым ирес­публикэхэм якуп анахь дэгъухэр Къыблэ лигэм иапэрэ ешIэгъу хэлэжьэнхэу рагъэблагъэх. ЦIыфхэм апашъхьэ къихьанхэм хэушъхьафыкIыгъэ купым фигъэхьазырыщтых. Ащ хэхьагъэх: Дмитрий Никифоровыр («Утомленные солнцем»), Адзынэ Ан­заур (Город Магас») ыкIи Игорь Морозовыр («БАК-Соучаст­ники»).
— Сэмэркъэум, сэнаущыгъэ зыхэлъхэм ыкIи зэхашIэхэм ар ялъэгэпIакIэ хъущт. Шъуеплъы­нэу шъукъакIуи, купхэм Iэпы­Iэгъу шъуафэхъу, сэмэркъэу дахэм идунай щыщ зышъушI. Адыгеим и КВН тарихъыкIэ ар хъущт, — къыщаIуагъ АР-м ныбжьыкIэ IофхэмкIэ и Комитет.
Къыблэ лигэм иджэгунхэр Адыгэ къэралыгъо университетым щыкIощтых. АР-м ныбжьыкIэ IофхэмкIэ и Комитет ащкIэ IэпыIэгъущт. Апэрэ зэIукIэгъур мы мазэм и 25-м пчыхьэм сы­хьатыр 7 рекIокIыщт. ЫпкIэ хэмылъэу шIоигъоныгъэ зиIэхэр ащ еплъышъущтых.