2025-рэ илъэсым гъэтхапэм и 1-м къыщыублагъэу Росреестрэм электроннэ шIыкIэм тетэу юридическэ лицэхэм Iоф адишIэнэу ригъэжьагъ.

Амыгъэкощырэ мылъкум хэхьэрэ псэуалъэхэм ятхын ыкIи кадастрэ учетым хагъэуцонхэм фэшI ищыкIэгъэ тхылъхэм ятын зэхъокIыныгъэу фэхъугъэ­хэр Росреестрэм и ГъэIорышIапIэу АР-м щыIэм ичIыпIэ отделхэм яIофышIэхэм чIыпIэ зыгъэIорышIэжьыпIэ къулыкъухэм зэIукIэгъоу ащашIыгъэхэм къащаIотагъ.
Я 487-рэ Федеральнэ хэбзэгъэуцугъэм къызэрэщыдэлъытагъэмкIэ, юридическэ лицэхэм электроннэ шIыкIэм тетэу Росреестрэм тхылъхэр ратынхэм техьанхэр шIокI зимыIэ Iоф. Ащ имызакъоу, цIыфхэм яахъщэ къыхалъхьэзэ къатыбэу зэтет унэхэр зыгъэ­уцурэ псэолъэшIхэм апае шэпхъакIэхэр хэбзэгъэуцугъэм къыхэхьагъэх. Фэтэрхэр зиехэм зэратыжьырэ ужым, унэхэмкIэ фитыныгъэу яIэ хъугъэхэр арагъэтхынхэу ащ къыщеIо.
— Непэ амыгъэкощырэ мылъкум хэхьэрэ псэуалъэр учетым хэгъэуцогъэным ыкIи тхыгъэным пае тхылъхэр электроннэ шIыкIэм тетэу къыратыным епхыгъэр зэкIэ Росреестрэм егъэцакIэ. Адыгеим амыгъэкощырэ мылъкумкIэ ибэдзэршIыпIэ итхэм зэпхыныгъэ адытиIэу «Электроннэ ипотекэм» игъэпсын процент 85,8-м нэдгъэсыгъ. Юридическэ лицэу къэралыгъо кадастрэ учетым е фитыныгъэхэм ятхын пае лъэIу тхылъ къэзытыгъэхэм япроцент 61,3-мэ электроннэ шIыкIэр агъэфедагъ. Арэу щытми, гъэтхапэм и 1-м къыщегъэ­жьагъэу ар проценти 100-м нэсын фае. НэмыкI шIыкIэ щыIэжьэп, сыда пIомэ хэбзэгъэуцугъэм шапхъэхэр къыгъэнэ­фагъэх. Тхьапэм тетэу къахьырэр тиспециалистхэм аштэн фитхэп, ахэмыплъэ­хэу зэкIагъэкIожьыщтых, — къыIуагъ Рос­реестрэм АР-мкIэ и ГъэIорышIапIэ ипащэу Марина Никифоровам.
ЛъэныкъуитIоу амыгъэкощырэ мылъкум хэхьэрэ псэуалъэм ищэн-щэфын хэлажьэхэрэм язырэр физическэ лицэу щытмэ, мы шапхъэхэм къахиубытэхэрэп.
Росреестрэм ишъолъыр ГъэIорышIапIэ зэригъэ­унэфыгъэмкIэ, цIыфхэм ямылъку халъхьэзэ унэр арагъэшIыным епхыгъэ зэзэгъыныгъэр атхыным фэшI къатыгъэ лъэIу тхылъхэм япроцент 92,1-р электроннэ шIыкIэм тетэу къагъэхьыгъ.
Мэкъумэщ хъызмэтшIапIэхэм, чъыгхэтэ товариществэхэм, гараж, псэупIэ ыкIи псэупIэ-псэолъэшI кооперативхэм, унэхэр зиехэм ятовариществэхэм 2026-рэ илъэсым ищылэ мазэ и 1-м нэс тхьапэм тетэу тхылъхэр къатынхэу фитыныгъэ яI. Джащ фэдэу юридическэ лицом электроннэу тхылъхэр къытынхэ амал имыIэгоу, ар Росреестрэм иинтернет нэкIубгъо итхагъэмэ, тхьапэм тетэу къырихьылIэн ылъэкIынэу хэбзэгъэуцугъэм къыщеIо.